X permitirá compartir vídeo en 4K

Actualmente a plataforma social de Elon Musk, X, ofrece a posibilidade de compartir vídeos en resolución 720p cunha duración máxima de 140 segundos e cun tamaño máximo de 512 MB para os usuarios ordinarios, mentres que para os que contan cunha subscrición de pagamento poden subir ficheiros de vídeo a 1080p de até 16 GB cunha duración de até 4 horas. Pero iso está a piques de mudar, e hoxe anuncian que iniciaron a ampliación da capacidade de publicación de vídeos para soportar contidos en 4K, sen detallar aínda o tamaño máximo nin a duración máxima que terían os vídeos en ultra alta definición.
Nos últimos meses o tamaño e a duración dos vídeos que podían compartir os subscritores de pagamento foi incrementándose paulatinamente, e probablemente aconteza agora o mesmo co material en 4K, aínda que son moitas as dúbidas sobre a aposta de X polo vídeo, xa que a capacidade para a reprodución de vídeo da plataforma está moi por detrás da súa competencia directa (Meta e Google) e só superaría a plataformas máis modestas como Bluesky (que incluso limita a cantidade de vídeos que poden subirse ao día).