X proba a cobrar nun par de países para poder publicar na plataforma

mércores, 18 de outubro do 2023 Marcus Fernández

X/Twitter vén de iniciar en Nova Zelandia e Filipinas o programa Not a Bot, que é un novo servizo de subscrición en probas que se aplicará unicamente a novos usuarios coa desculpa de servir para mitigar o spam e que sería preciso para poder interactuar en na plataforma social, de xeito que de non subscribirse só sería posible ler os contidos, pero nin publicar nin responder ás publicacións realizadas.
Deste xeito, cando alguén se dá de alta en X en Nova Zelandia e Filipinas só pode ver publicacións, ver vídeos e seguir contas, pero non establecer outros tipos de interaccións até que verifique o seu número de teléfono e pague unha subscrición de 1 dólar estadounidense ao ano (realmente 1,43 dólares neozelandeses ou 42,51 pesos filipinos ao ano).
Supostamente esta medida busca loitar contra os bots en X, o que sería bastante discutible, xa que os servizos de pagamento actuais incluso poderiamos entender que conseguiron o efecto contrario, dando a impresión de que a medida realmente o que persegue é que os usuarios introduzan a súa información de pagamento en X de cara á futura ampliación de servizos económicos da compañía.
Aínda que estas probas só teñen lugar nun par de países, é posible que se amplíe ao resto do mundo, o que sería un grande atranco para o crecemento da plataforma, pois a fricción de ter que realizar un pagamento para manter o servizo plenamente activo pode retraer a moitos usuarios de empregar o servizo, como puidemos ver no seu día con WhatsApp, servizo que tivo que retirar a súa reducida cota anual para manter a súa base de usuarios.

PUBLICIDADE