Xa se pode descargar o SP1 para Windows Vista

luns, 24 de marzo do 2008 Marcus Fernández

Fiestra de instalación do SP1 para Windows Vista

Como se viña a falar nos últimos días, o Service Pack 1 para Windows Vista xa está dispoñible para a súa descarga, de xeito que os usuarios que conten co último sistema operativo de Microsoft poderán descargar un arqhivo de 434,5 Mbytes que soluciona uns 551 problemas detectados en Windows Vista, e que durante o mes de abril se incorporará coma actualización automática.
Este SP1 xa funciona para as versións de Vista en inglés, francés, alemán, español e xaponés, tanto para versións do sistema de 32 e 64 bits, e nalgún caso pode chegar a mellorar o rendemento do sistema nun 86%, polo que podería axudar a lavar a imaxe que ten ese sistema operativo.
Os novos equipos informáticos tamén incluirán en breve esta grande actualización preinstalada, no que se supón que será unha vantaxe para os usuarios, que terán unha mellor experiencia de uso do sistema operativo co que se venden os ordenadores actualmente.
Os usuarios que aínda continúen a empregar Windows XP co Service Pack 2 tamén contarán nos vindeiros días cunha nova actualización (SP3) que tamén promete mellorar considerablemente o rendemento dos seus equipos, aínda que hai que lembrar que o XP está chamado a ser descontinuado por Microsoft.

PUBLICIDADE