Xa se poden descargar as demos de Left 4 Dead para Xbox 360 e PC

A semana que vén chegará ás tendas o xogo Left 4 Dead para Xbox 360 e PC, e os usuarios que queiran saber se deben gardar cartos para facerse con este xogo de acción de zombis poden descargar tanto a través do Bazar de Xbox LIVE (ocupa 1,2 Gb) ou da plataforma Steam (neste caso ocupa 3,2 Gb) a versión de demostración deste xogo.
Left 4 Dead non sitúa nunha cidade ateigada de mortos viventes da que hai que lograr fuxir, para o que un grupo de catro persoas teñen que colaborar para sobrevivir. No xogo faremos uso de multitude de armas (pistolas, rifles, cócteles molotov, ametralladoras...) e nos enfrontaremos a distintos tipos de zombis, así como a enormes grupos dos mesmos que atacan en horda. A escura ambientación está moi lograda e o xogo cooperativo promete ser a perla da coroa deste título desenvolvido por Valve.
Sorprende que aparte de para Xbox 360 tamén apareza para PC (plataforma habitualmente marxinada polos grandes títulos), sendo preciso contar cun equipo con Windows XP ou Vista, cun procesador Pentium 4 a 3 GHz (ou superior), cun mínimo de 1 Gb de RAM, cunha tarxeta gráfica cun mínimo de 128 Mb de memoria e con 7,5 Gb de espazo de disco duro libre, aínda que se recomende contar cun procesador Intel Core 2 Duo a 2,4 GHz e unha tarxeta gráfica de certa potencia para poder gozar dunha mellor experiencia visual.