Xa se poden presentar ofertas para o desenvolvemento da plataforma de turismo intelixente de Ourense
venres, 31 de xullo do 2020
- Fernando Suárez e Manuel Baltar na sede da Deputación
A plataforma
de contratación do sector público vén de publicar os pregos
correspondentes ao subministro para o desenvolvemento da iniciativa
Hai un Ourense en ti, unha iniciativa de turismo
intelixente coa que a Deputación de Ourense quere estar na vangarda
do turismo interactivo. Este programa vén cunha contía de preto de
3 millóns de euros e incluirá, entre outras cousas, unha plataforma
smart, aplicacións para móbiles, unha guía con contidos
interactivos, cámaras para monitoraxe de rutas e seguimento dos
lugares máis visitados.
En palabras do presidente Manuel Baltar, “trátase
dun innovador sistema para experiencias turísticas que permitirá
aos visitantes acceder aos recursos turísticos da provincia de
Ourense coa tecnoloxía máis vangardista aplicada ao ocio, a
cultura, o termalismo, a natureza e a gastronomía”.
O prazo de presentación de ofertas finaliza o
vindeiro 23 setembro.
A iniciativa desenvolverase entre a Deputación de
Ourense e Red.es baixo o lema Hai un Ourense para ti. Descúbreo.
Como dixemos, porá en xogo unha plataforma smart e
aplicacións para móbiles, ademais dun portal web de información
turística; un planificador de rutas baseadas nos gustos dos
usuarios; sistemas de Realidade Virtual e de Realidade Aumentada, e
experiencias inmersivas 360º con fotografías e vídeo. O proxecto
enmárcase na convocatoria de axudas de Destinos Turísticos
Intelixentes de Red.es, na que se seleccionaron 24 iniciativas de 9
comunidades autónomas, cun montante económico total de 68,3 millóns
de euros.
Desta maneira, a plataforma permitirá aos
turistas que se acheguen á provincia de Ourense dispoñer dun acceso
rápido, sinxelo e intuitivo de toda a información de interese dos
principais recursos turísticos da provincia (liña Ourense ao teu
alcance); de servizos personalizados baixo demanda (liña Sinte
Ourense), e terán acceso a experiencias inmersivas (liña
Ourense guíate).
Os aspectos clave do proxecto son a integración
nun único punto de toda a información turística da provincia por
medio do uso dun modelo tecnolóxico aberto (esquema Open Data)
sobre a que se fomente a participación, o diálogo e a colaboración
entre os turistas a través das novas tecnoloxías e as canles
dixitais.
Tamén, entre as innovacións do proxecto
analizadas hoxe destaca a interoperabilidade, xa que a plataforma
será capaz de obter información de diferentes fontes de datos.