Xbox permitirá denunciar abusos en chats de voz

mércores, 12 de xullo do 2023 Marcus Fernández

Estamos afeitos a ver sistemas de moderación e denuncia en redes sociais, de xeito que textos, imaxes e vídeos que poidan resultar ofensivos son eliminados tras detectarse, pero dende Microsoft van un paso máis aló, e anuncian que esta semana inician o lanzamento dun novo mecanismo que permite capturar conversas de voz dentro dos xogos que puidesen resultar desapropiadas para remitirllas ao equipo de seguridade de Xbox para que tomen medidas ao respecto.
O sistema que están a desenvolver captura clips de vídeo de 60 segundos, que inclúen as conversas entre os xogadores, como proba do incumprimento das normas de comportamento nas partidas en liña. Deste xeito buscan que os usuarios estean máis seguros participando en chats de voz durante as súas partidas multixogador. Ao estar ante un procedemento que precisa de revisión humana, polo momento as denuncias sobre os chats de voz limítanse a mercados de fala inglesa e a usuarios inscritos no programa de Xbox Insiders. Prevén incrementar paulatinamente as linguas dispoñibles na moderación de voz.

PUBLICIDADE