Xenet incrementa os datos das súas tarifas móbiles

martes, 21 de marzo do 2023 Marcus Fernández

O operador Xenet, pese a ser un grande descoñecido, consegue destacar polos seus prezos agresivos, e desta volta consegue que as súas novas tarifas de móbil sexan as que chaman a atención, xa que incrementou substancialmente o volume de datos incluídos con cobertura de Orange, de xeito que as liñas con chamadas ilimitadas e 32 GB de datos custan 6,90 euros/mes, mentres que para 70, 140 e 160 GB de datos cobran 9, 14 e 17 euros/mes. Por 21 euros/mes achegarían datos ilimitados.
A mesma compañía ofrece tamén liñas móbiles con cobertura de Movistar, cuns prezos moito menos atractivos, xa que por 6,90 euros/mes só achegan 5 GB de datos, e por 9 euros/mes 30 GB de datos, polo que claramente son tarifas destinadas a quen simplemente móvese por lugares onde non hai boa cobertura móbil de Orange.
Lembremos que Xenet tamén ofrece conexións de fibra a 300 Mbps con fixo con chamadas ilimitadas a fixos e 60 minutos a móbiles por 21,90 euros/mes, así como tamén ofrece combinados de fibra e móbil a prezos bastante atractivos.

PUBLICIDADE