Xiaomi prepara unha cámara de móbil de 108 Mpíxeles

Xiaomi está a colaborar con Samsung Electronics, e froito desta relación teremos en breve unha cámara de 64 Mpíxeles que integrarase inicialmente en smartphones da familia Redmi, á vez que sorprenderon anunciando que tamén están a preparar un sensor de cámara de móbil de 108 Mpíxeles, capaz de producir fotografías cunha resolución de 12.032 x 9.024 píxeles, logro inédito nun sensor de imaxe dun smartphone. Este sensor valería para, por exemplo, conseguir unha imaxe de 27 Mpíxeles aplicando un zoom 2x, ou sexa, que dobraría o número de píxeles dunha cámara de smartphone con teleobxectivo de 12 Mpíxeles. Aínda que a carreira polos Mpíxeles non pareza levar a ningunha parte, o uso de sensores de alta resolución permite conseguir imaxes máis luminosas en resolucións inferiores (a través da agrupación de píxeles).