Xiaomi presenta un concepto de móbil con pantalla de cuádrupla curva

venres, 5 de febreiro do 2021 Marcus Fernández

Como demostración de que Xiaomi é un fabricante chinés innovador presenta un smartphone conceptual cunha pantalla en cascada de catro curvas, ou sexa, que en vez da tradicional pantalla curva polos laterais, este prototipo de teléfono estende a pantalla tamén pola parte superior e inferior do terminal, o que supón todo un reto xa que esas zonas aprovéitanse normalmente para colocar altofalantes e micrófonos, e así pode presumir de levar ao máximo expoñente o concepto de todo pantalla sen chegar a converter en pantalla tamén a parte traseira do terminal.
Dende Xiaomi describen esta pantalla como con cristal de curvado cuádruplo de 88 graos, o que resulta máis complicado que o proceso ordinario de cristal curvo, e aínda que o proceso de fabricación sexa o elemento máis complexo deste teléfono, o detalle que tería máis rechamante para o usuario é que estariamos ante un móbil sen portos e sen botón físicos, de xeito que todas as interaccións realizaríanse a través da pantalla táctil.
Para poder facer posible que un dispositivo así funcione hai que combinar numerosas tecnoloxías, como cámara frontal oculta na propia pantalla, carga sen fíos, eSIM (xa que carece de bandexa para tarxetas SIM) e distintos sensores de presión para que un teléfono tan revolucionario sexa funcional.
Queda por ver se este produto chegará realmente ás tendas, xa que falamos dun móbil que non tería unha demanda real e o seu prezo sería moi elevado, polo que podemos entender a súa presentación como unha simple demostración de forza de Xiaomi.

Vídeo co que Xiaomi presenta o seu móbil conceptual con pantalla de cuádrupla curva

PUBLICIDADE