Xiaomi renova os seus ultraportátiles e incorpóralles 4G

venres, 23 de decembro do 2016 Marcus Fernández

O pasado verán Xiaomi entrou ao grande no mercado dos ordenadores portátiles cos seus atractivos Mi Notebook Air, que pretendían ser alternativas aos MacBook Air de Apple pero cun prezo moi inferior, e en vista da boa resposta comercial (venderon 220.000 equipos en 3 meses) veñen de presentar o seu sucesor natural, o Mi Notebook Air 4G, unha revisión dos portátiles de Xiaomi que integran conectividade móbil 4G (achegada por China Mobile, compañía que inclúe cos equipos un bono de 48 GB que pode consumirse durante un ano).
Os novos equipos chegan con pantallas Full HD de 12,5 e 13,3 polgadas, que no caso do equipo máis cativo tería procesador Intel Core m3, 4 GB de RAM, 128 GB de SSD, gráfica nVIDIA GeForce 940MX con 1 GB de memoria, Wi-Fi AC, Bluetooth 4.1, USB-C, USB 3.0, saída HDMI, teclado retroiluminado e webcam, pesaría só 1,07 quilogramos, tería un grosor de só 12,9 milímetros e o seu prezo sería de 4.699 iuans (647,41 euros), o que resulta moi económico para un equipo de tan boas prestacións, que aínda mellora o modelo con pantalla de 13,3 polgadas, xa que opta por un potente procesador Intel Core i7 de sexta xeración, 8 GB de RAM e 256 GB de SSD, o que supón un incremento no número de portos (conta cun segundo porto USB 3.0), en grosor (14,8 milímetros) e peso (1,28 quilogramos), así como unha pequena redución na autonomía (até 9,5 horas), pero cun prezo de 6.999 iuans (964,30 euros) que pode parecer caro, pero se temos en conta que podería compararse con MacBook Pro de 1.699 euros (que aínda que conta cunha pantalla superior, carece de 4G) poucos dubidarán que estamos ante un portátil gañador.
O fabricante chinés presume de que o Mi Notebook Air 4G consegue velocidades de descarga móbiles até 11 veces máis rápidas que un router 4G e o dobre de velocidade que un iPad Pro con LTE.
Este novos ordenadores con Windows 10 comezarán a venderse en China en xaneiro, deixando a moitos consumidores europeos coas gañas de facerse con un. Os portátiles de Xiaomi son relativamente doados de conseguir de importación, pero cómpre lembrar que, aínda que sexa posible configurar Windows 10 en español e galego, o teclado continuará a ser o internacional, o que pode ser un atranco para moitos usuarios.

Os Mi Notebook Air 4G chegan en 2 configuración diferentes, ambas cunha magnífica relación entre prestacións e prezo

PUBLICIDADE