Xinzo de Limia acolle a partir do 11 de agosto un campamento dixital para a rapazada

A ANPA do IES Lagoa de Antela coa colaboración do Concello de Xinzo de Limia organiza un campamento dixital de balde para rapaces e rapazas de entre 9 e 14 anos (nados entre 2011 e 2016), cunha programación educativa e divertida pensada para formar ás novas xeracións no uso seguro, racional, enriquecedor, creativo e responsable das tecnoloxías.
Nesta actividade de capacitación a rapazada participante aprenderá a xestionar o seu tempo online, a configurar a súa privacidade en redes sociais, a previr o ciberacoso, a buscar emprego en liña e a empregar ferramentas de programación e desenvolvemento como Canva e Genially. Trátase dunha actividade gratuíta, formativa e entretida para este verán. As inscricións cómpre facelas na Casa da Cultura de Xinzo de Limia. O campamento dixital desenvolverase entre os días 11 e 14 de agosto.