YouTube bloquea durante 7 días a canle de Trump

A canle oficial de YouTube de Donald J. Trump é a última plataforma do aínda presidente dos EE.UU. en ver restrinxidas as súas publicacións, xa que, tras detectarse un novo vídeo que podería incitar á violencia, incumprindo as normas do servizo, dende YouTube decidiron eliminar ese contido, enviar un primeiro aviso á conta (lembremos que a reiteración de avisos pode traducirse na cancelación da conta de usuario) e o bloqueo da suba de novo contido durante un mínimo de 7 días.
Ante os riscos para a seguridade pública, YouTube decidiu tamén desactivar os comentarios de toda a canle de Trump, evitando así que puidese converterse nun foro que puidese alentar comportamentos violentos no mundo real.
Cómpre lembrar que nos últimos días Twitter expulsou da súa plataforma a Trump, Facebook suspendeu a súa conta até que remate a transición presidencial e o resto de plataformas sociais eliminaron os contidos incendiarios que Trump pretendía difundir tras o asalto ao Capitolio, por considerar que alentaban á violencia.