YouTube non limitará a reprodución dos vídeos en 4K

martes, 18 de outubro do 2022 Marcus Fernández

Un par de semanas atrás YouTube iniciou probas para analizar se a limitación de resolucións de vídeo superiores a 1.440p a usuarios de pagamento era un bo incentivo para contratar YouTube Premium, experimento que recibiu grande atención mediática, por supor un importante cambio no funcionamento habitual de YouTube, o que provocou un grande rexeitamento do público, de aí que agora recoñezan que o experimento cesou definitivamente, polo que os contidos en 4K volven estar dispoñibles para todos os usuarios.
Outra das probas que realizaron recentemente afectaba á publicidade, coa incorporación dun volume cada vez maior de anuncios, chegando incluso a encadear 10 seguidos, así como tamén están a promover os anuncios bumper, que durante como máximo 6 segundos e non poden saltarse, sendo un formato que cada día cobrará máis peso, pois YouTube está a medir a resposta do público ante os distintos xeitos de programar os cortes publicitarios para poder establecer cal é o máximo tempo que poden durar os bloques de anuncios e que formatos son os que mellor funcionan (actualmente os bumpers son os máis cotizados).

PUBLICIDADE