Yubico estrea unha chave de seguridade compatible con Lightning

mércores, 21 de agosto do 2019 Marcus Fernández

Para dificultar o roubo de identidades en liña leva tempo recomendándose o uso de chaves físicas para mellorar a identificación, e un destes produtos que está a chamar poderosamente a atención é a YubiKey 5Ci, por ser a primeira chave de seguridade compatible con Lightning, ou sexa, que este pequeno trebello conta tanto con conector USB-C (válido para ordenadores persoais e dispositivos con Android) como con conector Lightning (podendo así empregarse tamén co iPhone).
Este accesorio sae á venda a un prezo de 70 dólares (63 euros) nos EE.UU., aínda que en poucas semanas debería chegar á canle de distribución española (na que están dispoñibles con facilidade o resto de chaves de seguridade da mesma compañía).
A YubiKey 5Ci é compatible coas aplicacións de xestión de contrasinais para iOS máis populares (como 1Password ou LastPass), así como con certos servizos en liña a través do navegador web Brave para iOS, estando cada vez presente en máis software (como a aplicación de Dropbox), de xeito que resulta cada vez máis práctico empregar este tipo de solución para protexer as nosas contas en liña.

Vídeo promocional da YubiKey 5Ci

PUBLICIDADE