ZTE quere financiar en Kickstarter un smartphone con seguimento de mirada

A comercialización de produtos por parte de compañías consolidadas partindo de campañas de micromecenado non é algo que o público reciba moi ben, principalmente pola confusión que xeran, xa que plataformas como Kickstarter, Indiegogo ou Verkami non son tendas en liña, de aí que resulte rechamante que ZTE aproveite a celebración do CES de Las Vegas para lanzar unha campaña en Kickstarter para financiar o seu teléfono Project CSX, para o que buscan que os interesados paguen por adiantado 199 dólares (uns 190 euros).
O novo teléfono de ZTE chamaríase Hawkeye, e destacaría principalmente pola súa proposta de mans libres, de xeito que integraría tecnoloxía se seguimento da mirada para, por exemplo, empregar os nosos ollos para o desprazamento vertical de páxinas que esteamos a ler, mentres que o resto de funcións de control poderiamos facelas mediante voz. Amais, o teléfono tería unha funda adhesiva opcional para poder colocalo en paredes e outras superficies, de xeito que non teriamos que suxeitar o teléfono cunha man para o seu uso. Temos así un dispositivo optimizado para o seu uso cando temos as mans ocupadas.
Sobre o teléfono en si, sería bastante ordinario dentro dos móbiles de fabricación chinesa, cunha pantalla Full HD de 5,5 polgadas, dobre SIM e lector de pegadas dixitais, destacando o feito de que contaría con dobre cámara traseira e cunha versión recente de Android (inicialmente Nougat).
En calquera caso, a campaña de financiamento aínda durará 44 días, e de trunfar, o móbil non comezaría a remitirse aos seus mecenas até o mes de setembro, o que son unhas condicións que non parecen moi razoables (de feito, son bastantes as campañas de crowdfunding de smartphones que fracasaron polo exceso de confianza que teñen que depositar os consumidores apoiando a un produto que ao adiarse perdería todo o seu atractivo (xa que poden chegar ao mercado varios trebellos na mesma liña, con mellores prestacións, prezos máis reducidos e a posibilidade de probalos antes de facerse cos mesmos).