Zeltia Lado visita a sede de Deloitte na Coruña

Esta mañá a directora xeral de Formación e Cualificación para o Emprego, Zeltia Lado, visitou a sede da compañía de servizos profesionais Deloitte na Coruña para continuar avanzando na detección das necesidades de formación que as compañías do sector TIC teñen en Galicia.
Lado agradeceu a implicación desta compañía coa formación e destacou a colaboración de Deloitte co Centro de Novas Tecnoloxías de Galicia (CNTG), dependente da Dirección Xeral de Formación e Cualificación para o Emprego. No marco desta cooperación, Deloitte impartiu unha serie de seis seminarios técnicos, cada un deles de dúas horas de duración, sobre diferentes temáticas relacionadas co desenvolvemento de aplicacións na nube.
Os seminarios (abertos a traballadores e a desempregados interesados na materia) permitiron a formación de 214 persoas e foron impartidos por persoal cualificado da compañía en Galicia e doutros equipos dos centros de excelencia que a empresa ten en España.