Zuckerberg anuncia que Horizon mellorará os seus gráficos

O anuncio da chegada de Horizon Worlds a España e Francia chegou acompañado dunha imaxe que simulaba ser un selfie de Mark Zuckerberg no mundo virtual que supostamente é o precursor do metaverso, desencadeou unha manchea de parodias facendo burla do feito de que o nivel gráfico da aplicación de realidade virtual é inferior ao do xogo dos Sims, estando máis na liña dos avatares da Wii.
Tal foi o bochorno que Zuckerberg tivo que facer unha publicación para anunciar que están a preparar actualizacións gráficas para Horizon, de xeito que en breve esta plataforma de mundos virtuais dará un grande salto gráfico do que presentou unha mostra na que podemos ver como sería o avatar de Zuckerberg e un escenario tridimensional relativamente realista.
As novidades que chegarán a Horizon presentaranse oficialmente no evento Connect, que aínda non ten unha data fixada, aínda que previsiblemente serían o vindeiro mes de outubro.