Como estaba previsto, Paramount completou hoxe a adquisición de Warner Bros. Discovery (WBD), unha operación que dá lugar a unha nova compañía denominada Skydance e que reúne baixo unha mesma estrutura dous dos grandes grupos históricos do entretemento estadounidense.

A operación, aprobada polos organismos de competencia de preto de 70 xurisdicións, integra dous grandes estudios cinematográficos, dous servizos globais de streaming e unha ampla carteira de televisión, incluíndo CBS, HBO e as redes de cable de Paramount e WBD. Tamén pasan a formar parte do novo grupo CBS News, CNN, CBS Sports e TNT Sports, ademais de franquías como Top Gun, Harry Potter, The White Lotus e SpongeBob SquarePants.

A nova Skydance asegura que parte dun catálogo audiovisual que considera o máis diverso entre os grandes estudios, máis de 200 millóns de subscritores nos seus servizos de streaming e unha carteira deportiva de gran dimensión. O grupo comprométese a producir polo menos 30 películas para salas cada ano, todas elas cunha xanela mínima de 45 días, ademais das máis de 180 series e programas de televisión que xa ten en marcha.

A integración tamén afectará á oferta de streaming. Os diferentes servizos directos ao consumidor das dúas compañías iranse unificando co tempo nunha única plataforma, acompañados de melloras nos produtos e na infraestrutura tecnolóxica.

David Ellison, presidente e conselleiro delegado de Skydance, cualificou a operación de «día histórico» e asegurou que o obxectivo é crear «un competidor máis forte», con recursos e alcance suficientes para desenvolver contidos en todos os xéneros e plataformas.

A operación ten tamén unha importante dimensión financeira. Skydance estima uns ingresos anuais próximos aos 70.000 millóns de dólares e fixa como obxectivo obter máis de 6.000 millóns de dólares en sinerxías recorrentes nos próximos tres anos. Os aforros procederán principalmente da integración tecnolóxica, compras, márketing e racionalización de activos inmobiliarios.

O novo grupo prevé superar os 10.000 millóns de dólares de fluxo de caixa libre en 2030 e reducir o seu nivel de endebedamento ata unha ratio de 3 veces ao final de 2029. O investimento en contidos superou os 30.000 millóns de dólares no período de doce meses anterior ao peche da operación.

A adquisición supuxo tamén a saída de Warner Bros. Discovery do Nasdaq. Os seus accionistas recibiron 31,01666668 dólares en efectivo por cada acción, mentres que as accións de clase B de Skydance comezan a cotizar este mesmo martes na Bolsa de Nova York baixo o símbolo SKYD.

A familia Ellison mantén a maior participación accionarial en Skydance, mentres que a propia familia Ellison e RedBird Capital Partners son os únicos titulares das accións ordinarias de clase A, que concentran o 100 % dos dereitos de voto da compañía combinada. A operación contou con 47.000 millóns de dólares de novo investimento en capital, achegados pola familia Ellison, RedBird, o Public Investment Fund, L’IMAD, Qatar Investment Authority e LionTree.

A Escola Técnica Superior de Enxeñaría da Universidade de Santiago vai acoller este xoves 8 de outubro ao mediodía (de 12.30 a 14.00 horas) unha charla sobre como pode revolucionar a IA o ámbito da saúde. Trátase da charla A revolución da intelixencia artificial e dos datos na sanidade: como a tecnoloxía está a transformar a prevención, o diagnóstico e a atención sanitaria. Será impartida por Benigno Rosón Calvo, subdirector xeral de Sistemas e Tecnoloxías da Información do Servizo Galego de Saúde (SERGAS).

A actividade encádrase no programa da Aula Profesional Enxeñaría Informática e Intelixencia Artificial, dende a que se lembra (contextualizando a sesión) que durante moito tempo, a tecnoloxía foi considerada un apoio para a sanidade, “pero hoxe xa non é así, xa que a tecnoloxía converteuse nunha parte esencial da propia asistencia sanitaria e os centros sanitarios son grandes ecosistemas dixitais nos que se xestionan millóns de datos, conéctanse mancheas de aplicacións e dispositivos, manéxase información especialmente sensible que é necesario protexer e todo isto debe funcionar de forma ininterrompida as vinte e catro horas do día, todos os días do ano”.

Porén, engádese que a verdadeira transformación non consiste simplemente en introducir novos algoritmos: consiste en redeseñar os procesos e converter os datos en coñecemento, o coñecemento en mellores decisións e esas decisións nunha atención máis personalizada, preventiva e segura.

Benigno Rosón é enxeñeiro en Informática pola Universidade da Coruña (1990–1995) e mestrado en Dirección de Sistemas e Comunicacións polo Instituto Nacional de Administración Pública e a Universidade Politécnica de Madrid.

Desde 2009 é subdirector xeral de Sistemas e Tecnoloxías da Información na Consellería de Sanidade da Xunta de Galicia, desde onde se desenvolveron proxectos pioneiros de grande repercusión tecnolóxica e asistencial, como a informatización da historia clínica, a implantación da receita electrónica ou a dixitalización de toda a imaxe médica xerada no SERGAS. Tamén se lideraron importantes proxectos de Compra Pública de Tecnoloxía Innovadora, como H2050, Innova Saúde ou Código 100, cun orzamento superior aos 100 millóns de euros e considerados modelos de referencia en Europa.

Na actualidade, o seu departamento está a acometer un proceso de transformación dixital, impulsando iniciativas como a telemonitoraxe domiciliaria, a conectividade mediante a Internet das Cousas (IoT) de dispositivos electromédicos empregados polos pacientes, a incorporación da análise da información a gran escala (Big Data) bo proceso de toma de decisións clínicas, o uso da IA no diagnóstico asistido por computador e o desenvolvemento de aplicacións móbiles para o autocoidado da saúde.

No ano 2015, o Colexio Profesional de Enxeñaría en Informática de Galicia concedeulle o Premio á Traxectoria Profesional polo seu “decisivo papel no deseño do futuro modelo de sanidade pública galega”. Conta, ademais, con outros recoñecementos, como os da Sociedade Española de Informática da Saúde (SEIS) e da Asociación Unión Profesional de Galicia.

As inscricións para asistir ao relatorio cómpre facelas a través da conta aula.profesional@usc.es indicando no asunto Aula Prof. GrEI-GrIA 0602.

Non son poucos os seareiros de Star Wars que botaban en falla xogos como o de carreiras de vaíñas que se inspirara no Episodio I da saga galáctica de George Lucas, polo que agora poden recibir cos brazas abertos a Star Wars: Galactic Racer, que sorprende porque, á vez que chega ás tendas, tamén está dispoñible en Amazon Luna. Os membros Prime con acceso ao servizo poden xogar desde hoxe á campaña para un xogador e participar en carreiras de alto risco por diferentes planetas do universo de Star Wars.

Desenvolvido por Fuse Games, estudio formado por veteranos de xogos de carreiras que traballaron en franquías como Burnout e Need for Speed, o título sitúa os xogadores nun circuíto clandestino e non autorizado de carreiras nunha galaxia moi, moi afastada.

A aventura transcorre nos primeiros anos da Nova República, cando a galaxia trata de recuperarse tras a caída do Imperio. Neste escenario nace a Galactic League, unha competición clandestina na que pilotos rivais, trazados perigosos e poderosos sindicatos se enfrontan por converterse nos máis rápidos.

Os xogadores encarnan a Shade, un piloto solitario que busca gloria e vinganza nunha aventura de carreiras estruturada en runs. Cada competición permite tomar decisións que afectan ao percorrido, desde escoller rutas e eventos ata seleccionar melloras e configurar o vehículo de acordo co estilo de condución.

A velocidade varía en función da clase de vehículo. Os landspeeders están pensados para os derrubamentos agresivos e as curvas suaves, mentres que as speeder bikes apostan por freadas intensas e aceleración explosiva. O skim speeder recompensa o impulso, as trazadas fluídas e a precisión en espazos estreitos. Os podracers, pola súa banda, ofrecen a maior velocidade e contan con carreiras exclusivas entre vehículos desta clase.

As competicións percorren escenarios coñecidos e novos do universo de Star Wars. En Jakku, os pilotos atravesan o Cemiterio de Xigantes entre Destrutores Estelares e AT-AT derrubados, mentres que Ando Prime pon a proba a capacidade para manter o impulso sobre superficies xeadas. En Sentinel I, os gases tóxicos e os ríos de ácido engaden novos perigos aos circuítos.

O xogo tamén recupera personaxes coñecidos da saga, entre eles Sebulba, o piloto Dug presentado no Episodio I, que regresa á competición xunto con novos pilotos e rivais.

A campaña permite desenvolver o piloto, probar diferentes vehículos e melloras e avanzar cara ao campionato da Galactic League. Ademais, o título incorpora os modos Arcade e Scenarios. O primeiro propón eventos breves nos que hai que competir contra o reloxo ou cumprir un obxectivo concreto cun vehículo determinado, mentres que Scenarios presenta desafíos máis longos con regras e personaxes diferentes.

O Centro de Investigación en Tecnoloxías da Información e as Comunicacións (CITIC) da UDC acollerá o vindeiro mércores 14 de outubro, ás 11:00 horas, a conferencia Engineering Neurosymbolic AI: Case Studies in Robotics, Media and Scholarly Analytics, impartida por Enrico Motta, profesor de Tecnoloxías do Coñecemento no Knowledge Media Institute de The Open University (Reino Unido). 

A actividade, promovida polo grupo de investigación LIDIA da UDC, abordará o potencial das arquitecturas de intelixencia artificial neuro-simbólica, un enfoque que combina as capacidades de aprendizaxe dos modelos de linguaxe de gran tamaño con técnicas de representación formal do coñecemento e razoamento. 

Ao longo da súa intervención, Enrico Motta presentará diferentes casos de estudo que ilustran como estas tecnoloxías poden contribuír a resolver problemas complexos en ámbitos como a robótica cognitiva, a análise científica e de medios de comunicación. 

No eido da robótica cognitiva, analizará como a integración de modelos de aprendizaxe profunda e LLM con módulos de razoamento de sentido común pode axudar aos robots a comprender mellor as contornas reais, así como a detectar situacións relevantes, como anomalías, riscos para a seguridade ou incumprimentos relacionados coa saúde e a seguridade. 

A conferencia tamén abordará as posibilidades da intelixencia artificial aplicada á análise da produción científica, por exemplo identificando e predicindo tendencias na literatura académica e proporcionando ferramentas de apoio á avaliación da investigación. 

Por último, o científico analizará o uso da intelixencia artificial para estudar o discurso político nos medios de comunicación, con especial atención a cuestións como os nesgos, o equilibrio e a imparcialidade na cobertura informativa. 

Enrico Motta é profesor de Tecnoloxías do Coñecemento no Knowledge Media Institute (KMi) de The Open University, onde dirixe o grupo de investigación Intelligent Systems and Data Science.

Doutor en Intelixencia Artificial por The Open University e graduado en Ciencias da Computación pola Universidade de Pisa, a súa traxectoria investigadora abrangue eidos como a ciencia de datos, as tecnoloxías semánticas e da linguaxe, os sistemas intelixentes e a robótica, así como a interacción persoa-ordenador.

A súa investigación actual inclúe o uso da intelixencia artificial na publicación académica, a robótica aplicada a contornos sanitarios e urbanos e a análise a grande escala de noticias e discurso mediático. 

A entrada será libre ata completar aforo (inscricións abertas en liña)

As investigadoras do Centro de Investigación en Tecnoloxías da Información e as Comunicacións (CITIC) da Universidade da Coruña Laura Nieto Riveiro, Paula de Santos Dorrego, Patricia Concheiro Moscoso e Betania Groba González participaron en setembro nunha experiencia de colaboración co servizo de Terapia Ocupacional do Hospital de Día de Psiquiatría do Complexo Hospitalario Universitario de Ferrol (CHUF).

Segundo explica o CITIC, a iniciativa consistiu nunha estadía que combinou investigación, tecnoloxía creativa e participación social para “explorar o potencial das ferramentas de programación e creación dixital no eido da saúde mental”. A experiencia desenvolveuse durante dous días á semana e centrouse no traballo colaborativo das persoas participantes mediante as plataformas Makey Makey (que permite conectar elementos físicos con dispositivos dixitais e usalos como interfaces de interacción) e Scratch (que familiariza aos usuarios coa programación mediante unha contorna visual moi accesible). A partir destas ferramentas, as e os participantes organizáronse en grupos para pensar e desenvolver os seus propios proxectos creativos, dende a concepción inicial ata a programación e posta en funcionamento. Entre as propostas traballadas atopáronse obxectos interactivos como un piano ou un tambor, segundo confirmaron as investigadoras.

Salientaron tamén que un dos aspectos centrais da experiencia foi o “carácter cooperativo dos talleres”. O obxectivo non se limitaba á aprendizaxe ou ao resultado tecnolóxico, senón que buscaba que “cada persoa puidese contribuír ao proxecto dende as súas propias capacidades, achegando solucións en diferentes fases do proceso”. Deste xeito, a creación colectiva convértese tamén “nunha oportunidade para favorecer a interacción e o establecemento de novas conexións entre as persoas que participan da mesma”, engadiron.

A actividade intégrase nunha proposta máis ampla de Terapia Ocupacional desenvolvida polo Hospital de Día durante o mes de setembro. Xunto cos obradoiro de tecnoloxía creativa, o equipo asistencial levou tamén á comunidade o obradoiro Hábitos e rutinas para o sono, ocuparnos do descanso é ocuparnos da saúde, celebrado no centro cívico de Canido e orientado a reflexionar sobre as rutinas cotiás e a súa relación co descanso. Esta actividade terá continuidade o último venres de outubro.

Esta iniciativa permite así conectar o traballo desenvolvido dende o CITIC da UDC coa práctica asistencial do Hospital de Día de Psiquiatría do CHUF, achegando a investigación tecnolóxica a un contexto real e explorando novas aplicacións das tecnoloxías dixitais dende unha perspectiva inclusiva e centrada nas persoas.

Estes días (ata mañá) estanse a desenvolver na Facultade de Comunicación do Campus de Pontevedra as xornadas Redes sociais e IA para mellorar a visibilidade científica e académica, uns encontros que se indica no seu nome van dirixidos a compartir recursos e ferramentas para favorecer a divulgación investigadora a través a través da intelixencia artificial.

Promovidas polo grupo CP2 Comunicación Persuasiva, concibíronse como “un espazo de intercambio, exploración e traballo práctico arredor das posibilidades que ofrecen as redes sociais e a intelixencia artificial como aliadas para mellorar a comunicación pública das nosas investigacións, proxectos e accións de transferencia”, sinalan desde a organización.

Coordinadas pola profesora Mónica Valderrama e abertas ao conxunto da comunidade universitaria, estas xornadas teñen como obxectivo contribuír a “mellorar a visibilidade da actividade científica” do grupo CP2.

O programa abrangue catro obradoiros, impartidos por profesionais e centrados en aspectos como a xeración de contidos accesibles e rigorosos para redes sociais, que contidos son máis axeitados para cada plataforma ou a creación de recursos divulgativos con ferramentas de intelixencia artificial.

Precedidas dun encontro coa vicerreitora do Campus de Pontevedra, Marián Fernández, e a vicerreitora de Oferta Académica, Esther Pillado, as xornadas abríronse cun relatorio sobre o uso de redes sociais para a comunicación científica, a cargo do xestor de redes da Universidade de Sevilla Sergio Fernández. Esta actividade permitiu ás persoas participantes coñecer as “pautas para comunicar a través das redes sociais” e posibilitou que as e os participantes obtivesen un conxunto de recomendacións “para traballar a súa marca persoal, dentro do aspecto profesional”.

O relator debullou as estratexias e plataformas a empregar para a divulgación científica, e tamén os públicos e formatos de cada rede, co propósito de achegar aos asistentes claves para “transformar o coñecemento científico en contidos atractivos, doados de entender e rigorosos”.

Nesa mesma liña, a actividade continuou na tarde deste mércores cun obradoiro de Blanca Rodríguez, creadora de contido na axencia Trend, centrado en proporcionarlles “pautas e boas prácticas para aproveitar mellor as posibilidades que ofrecen as distintas plataformas”, afondando en que contidos poden funcionar mellor en cada rede.

A xornada do mércores estará dedicada ás posibilidades que achega a intelixencia artificial en materia de divulgación, a través de dous obradoiros. O primeiro deles correrá a cargo de Joel Bucio, responsable da axencia Goose & Hooper, e centrarase no deseño de prompts, na xeración e adaptación de contidos e na creación de recursos en diferentes formatos a partir dunha mesma información.

Deseguido, José Alcañiz, director executivo (CEO) de Esterea Comunicación Digital, porá o foco nas ferramentas e recursos dixitais que “poden contribuír a mellorar a difusión, o posicionamento e o alcance do traballo científico e académico”.

Por outra banda, desde a organización sinalan tamén que o obxectivo é que este encontro sirva tamén para comezar a construír un “repositorio compartido de recursos” que permitan facer máis visible o traballo do grupo CP2, incorporando guías, recomendacións, prompts ou materiais de consulta.

O proxecto Concello Dixital, a iniciativa de administración electrónica e transformación dixital impulsada pola Deputación da Coruña para apoiar ás entidades locais da provincia, celebra o vindeiro xoves 8 de outubro unha nova edición da súa xornada técnica no Pazo de Mariñán.

Baixo o título Encontro de representantes de administración electrónica, Concello Dixital, a xornada concíbese como “un espazo de traballo e posta en común entre os distintos e-responsables implicados no proceso de transformación dixital da administración local”, segundo informou a Deputación.

O encontro contará coa asistencia e participación de representantes institucionais e técnicos da Deputación Provincial da Coruña.

Nesta edición, a xornada centrarase en poñer en valor o papel do persoal das entidades locais da provincia que participan no proxecto e en traballar e mellorar competencias e aspectos como a xestión do cambio, a intelixencia emocional, a comunicación, a creatividade, o liderado ou a resolución de problemas, ferramentas clave para fortalecer a comunicación, e a cohesión dos equipos humanos nas administracións locais da provincia.

A axenda integra dinámicas de grupos, role-plays prácticos e un espazo de intercambio de experiencias entre os e-responsables asistentes, informou a Deputación, engadindo que a xornada encádrase na súa estratexia por modernizar tecnolóxica e organizativamente os concellos, promovendo accións que contribúan a mellorar a eficiencia dos servizos públicos e o clima laboral no eido público local.  

A mediados de setembro chegou as tendas o xogo para Nintendo Switch 2 Fire Emblem: Fortune’s Weave sorprendendo polo feito de que semella ter certa relación con Galicia e España, xa que no continente de Dagda, onde se desenvolve a acción, aparecen numerosos topónimos e referencias que poden resultarnos familiares.

Entre os exemplos máis evidentes están Ribeira, Aguiño e Orens. Ribeira coincide co nome do municipio coruñés e, no xogo, é unha localidade costeira e unha vila de pescadores na que vive Cai, un dos protagonistas.

Aguiño tamén corresponde cunha parroquia do concello de Ribeira, mentres que Orens podería ser unha referencia a Ourense. A presenza destes tres nomes nun mesmo territorio fai difícil atribuír as coincidencias á casualidade.

Outras referencias españolas

O mapa de Dagda inclúe ademais outros nomes con posibles referencias á xeografía española, como Benyera, vinculada nesta ocasión a unha localización de Castela e León, así como o Forte de Granada, a Ponte de Santana ou o Bosque do Faro. Dagsion, a capital ficticia do continente, tamén presenta unha arquitectura con claras influencias románicas.

A inspiración non se limita aos topónimos. Leda, unha das protagonistas, presenta unha estética claramente relacionada co flamenco e exerce como artista sobre os escenarios. O seu instrumento é unha vihuela, instrumento de corda moi vinculado á tradición musical española dos séculos XV e XVI e considerado un dos antecedentes da guitarra española.

A música tamén podería conter algunha destas influencias. A nova versión de Together We Ride, composta para Fortune’s Weave, incorpora nos seus arranxos elementos que poden lembrar a sonoridades flamencas, aínda que neste caso a conexión depende máis da interpretación que de referencias explícitas.

A partir do 9 de outubro Google endurecerá as condicións de acceso á versión de balde de Gemini. Os usuarios que non conten cunha subscrición a un dos plans de Google AI perderán o acceso aos modelos Gemini Flash e Gemini Pro e quedarán limitados a Gemini Flash-Lite, a versión máis pequena da familia de modelos da compañía.

Flash-Lite continuará permitindo xerar textos, analizar imaxes e procesar documentos, polo que manterá capacidade suficiente para tarefas sinxelas como traducións ou resumos breves. As tarefas máis esixentes, como a análise de documentos extensos, o tratamento de datos complexos ou determinados traballos de programación, quedarán reservadas aos plans de pagamento.

Os cambios tamén afectan aos usuarios que xa pagan por Gemini. O plan AI Plus, cun prezo de 4,99 euros ao mes, deixará de incluír Gemini Pro e ofrecerá unicamente Flash-Lite e Flash, aínda que con límites de uso superiores aos da modalidade gratuíta. Para manter o acceso aos tres modelos será necesario contratar AI Pro, cun custo de 21,99 euros ao mes.

Google tamén introducirá en outubro diferentes niveis de esforzo para os modelos dispoñibles, denominados baixo, medio e alto. A elección dun nivel superior permitirá obter respostas máis elaboradas, pero consumirá unha maior cantidade do límite de uso dispoñible. Os subscritores de AI Ultra terán ademais acceso á función Deep Think, orientada ás tarefas que requiren unha maior capacidade de razoamento.

O sistema de límites de Gemini tamén se baseará no consumo de capacidade de cálculo. O límite renovarase cada cinco horas ata alcanzar o máximo semanal e o cálculo terá en conta factores como a complexidade das consultas, as funcións utilizadas e a extensión das conversas. As funcións máis esixentes, entre elas a xeración de imaxes, vídeo e música, Deep Research, os modelos Pro e as opcións de razoamento avanzado, consumirán máis capacidade.

A conselleira de Política Social e Igualdade, Fabiola García, presentou esta mañá a futura Lei de Medidas Integrais contra o Acoso e a Violencia Dixital de Galicia, que inicia agora a súa tramitación parlamentaria. Antes do comezo do debate, instou os grupos parlamentarios «a buscar o consenso e traballar para facer desta lei, a primeira deste tipo en España e Europa, un espazo de encontro».

Na súa intervención, a conselleira explicou que o obxectivo da norma é establecer medidas integrais para a sensibilización, prevención e detección do acoso e da violencia dixital, así como para a protección e o apoio ás persoas que os sofren, «especialmente aos colectivos máis vulnerables: como menores, mulleres ou persoas LGBTI». Tamén se pretende impulsar a formación do persoal da Xunta, do sector público e das forzas e corpos de seguridade do Estado, ademais de establecer medidas específicas de protección e apoio ás vítimas.

Fabiola García, acompañada polo director xeral de Loita contra a Violencia de Xénero, Roberto Barba, detallou o proceso desenvolvido pola Xunta durante a tramitación do texto. Neste proceso destacou as alegacións recibidas e «as reunións mantidas con vítimas e familiares, para escoitalas e coñecer por boca delas as súas necesidades e demandas».

Entre as medidas previstas figura a inclusión obrigatoria de contidos formativos en competencia dixital nos currículos de todas as etapas educativas non universitarias, así como a aprobación dun Plan integral contra o acoso escolar e o ciberacoso. Tamén se promoverán acordos ou convenios con persoas e empresas dentro das competencias da Xunta e porase en marcha un servizo gratuíto de borrado da pegada dixital para eliminar material que continúe accesible na rede e que fose empregado como instrumento de acoso ou violencia.

A futura lei contempla tamén a creación dun servizo gratuíto de asesoramento no que as vítimas recibirán apoio técnico e información para previr novos ataques ou situacións de violencia dixital. Garantirase igualmente o acceso a información, orientación e apoio xurídico desde o primeiro momento, sen necesidade de presentar unha denuncia previa. Por último, elaborarase unha guía informativa sobre os dereitos das vítimas de acoso e violencia dixital.

Plan de formación pioneiro

Fabiola García explicou que o obxectivo é «garantir a asistencia xurídica gratuíta para todas as vítimas de acoso e violencia dixital, con independencia da idade ou do xénero». Tamén puxo en valor que a Xunta «xa puxo en marcha un plan de formación pioneiro en España», destinado a formar a todo o persoal técnico da Administración autonómica en violencia de xénero dixital.

Esta formación xa foi realizada por máis de 200 profesionais dos CIMS, da rede de acollemento, dos centros Quérote+ e do colectivo LGTBI, entre outros ámbitos.