Código Cero - Diario Tecnolóxico de Galicia

O Parlamento Europeo reabre a porta ao escaneo voluntario de mensaxes sen cifrado

Redacción — 2026-07-09T19:42:02Z

O Parlamento Europeo concluíu a segunda lectura da proposta para restablecer ata abril de 2028 a excepción temporal á Directiva sobre a privacidade nas comunicacións electrónicas que permite a determinados provedores de servizos dixitais detectar voluntariamente material de abuso sexual infantil e casos de captación de menores (grooming) nas comunicacións privadas. A decisión mantén vivo un intenso debate entre quen considera estas ferramentas necesarias para protexer a infancia e quen alerta dos seus efectos sobre a privacidade e os dereitos fundamentais.
O procedemento parlamentario tivo un desenlace pouco habitual. A maioría simple dos eurodeputados apoiou rexeitar a posición do Consello (314 votos fronte a 276), pero a normativa de segunda lectura esixía unha maioría absoluta de 360 escanos para modificar ou bloquear o texto. Ao non alcanzarse ese limiar, a posición do Consello segue adiante, aínda que o Parlamento incorporou unha serie de emendas que agora deberán ser aceptadas ou non polos Estados membros.
Entre esas modificacións figura unha das máis relevantes para o sector tecnolóxico: deixar expresamente fóra do ámbito da excepción as comunicacións protexidas mediante cifrado de extremo a extremo, unha medida coa que a Eurocámara pretende evitar que a norma poida interpretarse como unha vía para debilitar este tipo de cifrado.
A proposta responde ao baleiro legal xerado tras a expiración, o pasado 3 de abril, da anterior excepción temporal. Desde entón, as negociacións entre Parlamento e Consello sobre unha solución permanente non lograron pecharse, polo que o Consello decidiu recuperar unha prórroga ata 2028 mentres continúan as conversacións. O propio regulamento subliña que o seu carácter é temporal e limitado, á espera dun marco estable para combater os abusos sexuais contra menores en liña.
A excepción permite que os provedores de servizos de comunicacións interpersoais independentes da numeración (como plataformas de mensaxería ou correo electrónico compatibles coa norma) empreguen de forma voluntaria tecnoloxías para detectar material coñecido de abuso sexual infantil e indicios de captación de menores, sempre baixo unha serie de condicións. Entre elas figuran a realización de avaliacións de impacto sobre protección de datos, consultas previas coas autoridades competentes, supervisión humana antes de comunicar novo material ás autoridades, mecanismos de reclamación para os usuarios, obrigas de transparencia e informes anuais sobre o funcionamento dos sistemas e as súas taxas de erro.
O texto tamén establece que as tecnoloxías empregadas deberán ser as menos intrusivas posibles e, cando analicen texto, non poderán reconstruír o contido das comunicacións, senón unicamente detectar patróns compatibles con posibles situacións de abuso.
A Eurocámara xa defendera durante a primeira lectura limitar o alcance destas ferramentas e introducir maiores garantías, entre elas a autorización xudicial para determinadas actuacións. Con todo, non foi posible alcanzar un acordo co Consello antes da expiración da normativa anterior.

Un debate que continúa aberto

As organizacións defensoras da privacidade consideran que a votación supón un retroceso. O ex eurodeputado e activista Patrick Breyer criticou que a excepción saíse adiante malia que a maioría dos votos emitidos apoiaban o seu rexeitamento, debido ás regras procedementais da segunda lectura. Ao seu xuízo, manter os escaneos voluntarios de comunicacións privadas resta incentivos para negociar unha regulación permanente baseada en actuacións dirixidas contra sospeitosos concretos e non en análises masivas.
Breyer tamén sostén que non existen probas concluíntes de que este sistema incrementase as condenas ou permitise rescatar máis vítimas, e lembra que continúan dispoñibles outras ferramentas como as investigacións autorizadas por orde xudicial, as denuncias dos propios usuarios ou a análise de contidos públicos.
Pola súa banda, as institucións europeas defenden que a excepción pretende cubrir un baleiro legal mentres se negocia o marco definitivo e destacan que a protección dos menores constitúe unha prioridade da Unión. O regulamento insiste en que a medida busca compatibilizar esa finalidade co respecto aos dereitos fundamentais mediante garantías adicionais, limitacións temporais, obrigas de transparencia e supervisión das autoridades de protección de datos.

O futuro da chamada Chat Control

A decisión non pecha o debate sobre a coñecida como Chat Control 2.0, a proposta de regulación permanente para combater o abuso sexual infantil en Internet. O Parlamento Europeo aposta por un modelo máis focalizado, baseado en ordes específicas e salvagardas reforzadas, mentres varios Estados membros seguen defendendo manter a posibilidade de que os provedores realicen escaneos voluntarios das comunicacións non cifradas.
Agora será o Consello quen deba decidir se acepta as emendas aprobadas pola Eurocámara. Se non hai acordo, ambas institucións terán que abrir un procedemento de conciliación para intentar consensuar o texto definitivo. Mentres tanto, a excepción temporal seguirá sendo unha peza clave nun dos debates máis sensibles da lexislación dixital europea: como compatibilizar a protección da infancia coa privacidade das comunicacións electrónicas.

Mundos Digitales 2026 abre as súas portas

Redacción — 2026-07-09T19:36:00Z

A XXIV edición de Mundos Digitales botou a andar este xoves na Coruña cunha primeira xornada que serviu para ofrecer unha ampla panorámica do momento que atravesa a industria da creación dixital. Desde primeira hora da mañá, o congreso reuniu profesionais do audiovisual, a animación, os videoxogos e os efectos visuais arredor dun programa no que a innovación técnica conviviu coa reflexión sobre os procesos creativos e a evolución das profesións vinculadas ao sector.
Aparte do programa de actividades propias dun congreso deste tipo, Mundos Digitales tamén estreou a súa zona de showroom na que poden comprobarse moitas das tecnoloxías innovadoras que captas as miradas dos profesionais do sector de cara a traballos futuros e tamén comezaron as sesións de entrevistas da feira de emprego que xa é un dos puntais deste encontro, xogando un rol activo na articulación deste sector profesional tan dinámico.
Tras a presentación oficial de benvida, a conferencia inaugural correu a cargo de Paul Debevec, responsable de investigación en produción de contidos de Netflix e unha das figuras máis influentes no desenvolvemento da iluminación baseada en imaxes. Baixo o título Iluminación basedada en imaxes: pasado, presente e futuro, o investigador repasou a evolución dunha tecnoloxía que revolucionou a captura da luz en contornos dixitais e que continúa marcando o desenvolvemento das producións audiovisuais máis avanzadas.
A partir dese punto, a programación desenvolveuse de maneira paralela nos distintos auditorios, ofrecendo unha mostra da diversidade que caracteriza actualmente a creación dixital. No Auditorio Animum, Craig Caldwell, profesor da Universidade de Utah, centrou a súa intervención na estrutura e desenvolvemento dunha historia, reivindicando a narrativa como un elemento esencial incluso nun contexto no que as ferramentas tecnolóxicas evolucionan a gran velocidade. Mentres tanto, no Auditorio Lightbox Academy, Yago Pérez abordou a creación de niveis para videoxogos, explicando como o deseño dos espazos condiciona tanto a experiencia do xogador como a construción do propio relato interactivo.
A sesión do mediodía estivo especialmente orientada á aplicación práctica das novas tecnoloxías. Lorena Ares e Carlos Fernández de Vigo presentaron DINOGAMES. Cómo crear unha IP dende cero d no extinguirse no intento, unha reflexión sobre os desafíos que implica construír unha propiedade intelectual propia nun mercado cada vez máis competitivo. En paralelo, Patricia Cano afondou no papel do denominado algoritmo humano dentro dos procesos de produción de efectos visuais e animación, mentres Andrew Lebrov explicou un fluxo de traballo baseado na tecnoloxía 3D Gaussian Splatting, unha das innovacións que está a abrir novas posibilidades para a captura e representación tridimensional de escenarios.
Xa durante a tarde, o programa orientouse cara ás transformacións que está a experimentar o sector. Jordi Barés centrou a súa conferencia na aplicación da intelixencia artificial á produción audiovisual, abordando o impacto destas ferramentas sobre os fluxos de traballo actuais. Ao mesmo tempo, Xavier Oyarzabal ofreceu unha perspectiva pouco habitual nun congreso destas características ao analizar os retos financeiros das empresas especializadas en efectos visuais, mentres que Raúl Rocha repasou a evolución da súa traxectoria profesional baixo o título Todos ven as películas, ninguén ve as cicatrices, unha intervención centrada na experiencia acumulada tras anos de traballo na industria.
Outro dos bloques da xornada estivo dedicado á formación e ao desenvolvemento profesional. Bill Kopp (reputado animador que, entre moitas outras cousas, participou nas curtas de animación que deron lugar á serie de Los Simpson) pechou a súa participación cun relatorio dedicado á promoción persoal e á construción dunha carreira sostible no sector creativo, mentres David Martín presentou a evolución dos motores gráficos cara ao seu uso na produción de efectos visuais en tempo real, unha tendencia cada vez máis presente tanto no cinema como nas series e nos videoxogos.
A programación reservou tamén espazo para ámbitos moi especializados. Rubén Alba explicou o proceso creativo desenvolvido para o deseño conceptual de Alien: Earth, María Valle Soriano reflexionou sobre o papel da iluminación como ferramenta narrativa, Adrián Puya analizou a incorporación da intelixencia artificial ao ámbito dos efectos visuais e outra das sesións abordou a utilización da produción virtual como recurso para a formación práctica en realización cinematográfica en tempo real. Completou a oferta unha conferencia dedicada á visualización da evolución xeolóxica da Terra na época dos dinosauros, exemplo da presenza que tamén teñen no congreso proxectos vinculados á divulgación científica mediante ferramentas de visualización dixital.
O percorrido da primeira xornada deixou clara a vontade de Mundos Digitales de abordar a creación dixital desde unha perspectiva ampla, na que conviven disciplinas como a narrativa, a dirección artística, os videoxogos, os efectos visuais, a produción virtual, a intelixencia artificial ou a xestión empresarial. Máis que concentrarse nunha única tecnoloxía, o programa debuxou un panorama no que todas elas se entrelazan para definir o presente e o futuro dunha industria en permanente transformación.

A Sony RX10 V achega pequenas melloras para manter vivo este concepto de cámara versátil

Redacción — 2026-07-09T19:05:00Z

Sony presentou a RX10 V, a quinta xeración da súa familia de cámaras compactas de altas prestacións (que levaba 9 anos sen actualizarse), un modelo que mantén a filosofía de integrar nun único corpo un obxectivo de gran alcance e incorpora tecnoloxías procedentes da gama Alpha para mellorar o enfoque automático, o seguimento de suxeitos e a gravación de vídeo.
A cámara equipa un obxectivo ZEISS Vario-Sonnar T de 24-600 milímetros con apertura F2.4-4.0 (zoom óptico de 25 aumentos), estabilización óptica e capacidade de enfoque macro desde apenas 3 centímetros na posición angular. O sensor Exmor RS CMOS empillado de tipo 1 polgada e 20,1 megapíxeles efectivos, combinado co procesador BIONZ XR, permite capturar imaxes con baixo nivel de ruído e vídeo 4K ata 120 fotogramas por segundo, ademais de ofrecer un desenfoque natural do fondo grazas ao tamaño do sensor e á luminosidade da óptica.
Un dos principais avances da RX10 V é a incorporación dunha unidade de procesamento con IA para o sistema de enfoque automático con recoñecemento en tempo real. Esta tecnoloxía identifica automaticamente persoas, animais, aves, insectos, automóbiles, trens e avións, mantendo o enfoque incluso cando os suxeitos cambian de posición ou levan elementos como cascos ou lentes de sol. Tamén incorpora seguimento en tempo real mediante selección táctil.
O rendemento tamén mellora coa captura continua de ata 30 fotogramas por segundo sen escurecemento do visor e cunha velocidade de ata 60 cálculos de enfoque e exposición por segundo, o que facilita fotografar escenas de acción, deportes ou fauna salvaxe. Ademais, inclúe unha función para incrementar a velocidade de disparo durante unha secuencia.
As prestacións de vídeo inclúen gravación 4K a 120 fps, estabilización Active Mode para reducir as vibracións durante a gravación a man, perfís S-Cinetone e S-Log3, compatibilidade con LUT personalizadas e unha función Auto Framing baseada en IA que mantén automaticamente o suxeito encadrado durante a gravación. A zapata Multi Interface permite conectar micrófonos compatibles con transmisión de audio dixital.
Sony tamén renovou a ergonomía tomando como referencia as cámaras Alpha. A RX10 V incorpora un visor electrónico OLED Quad-VGA de 3,68 millóns de puntos con ampliación de 0,78x e unha pantalla LCD traseira de 3 polgadas con 1,62 millóns de puntos. O deseño inclúe unha empuñadura revisada e un selector multidireccional de oito direccións para facilitar o manexo.
A autonomía aumenta de forma significativa grazas á batería NP-FZ100, que permite realizar aproximadamente 630 fotografías por carga, arredor dun 50 % máis que o modelo anterior. O equipo conta tamén con resistencia ao po e á humidade, conectividade Wi-Fi de 2,4 e 5 GHz, porto USB-C para transferencia de datos e emisión en directo en 4K a 30 fps, ademais de integración coa aplicación Creators'' App para controlar a cámara desde o teléfono móbil, actualizar o firmware e transferir fotografías e vídeos.
A Sony RX10 V xa figura na tenda oficial española cun prezo de 2.499 euros (que pode parecer moi elevado, pero cómpre salientar que o modelo da anterior xeración, pese a ter xa 9 anos, aínda pode atoparse nas tendas a 1.999 euros, polo que nun primeiro momento era de esperar un prezo nesta liña) e os primeiros envíos están previstos para o 17 de xullo.

Vídeo de presentación da cámara Sony RX10 V

OpenAI pisa o acelerador con GPT 5.6 e pon fin ao navegador Atlas

Redacción — 2026-07-09T17:42:00Z

OpenAI entrou na segunda semana de xullo cunha batería de anuncios que redefinen tanto a súa oferta de modelos como a súa estratexia de produto. A compañía de Sam Altman presentou oficialmente GPT‑5.6, unha nova familia de modelos que promete máis intelixencia por token, mellor rendemento por dólar e capacidades ampliadas para tarefas profesionais e científicas. Ao mesmo tempo, confirmou a retirada de Atlas, o navegador experimental que serviu como banco de probas para a integración de axentes na web.
O novo GPT‑5.6 chega en tres variantes (Sol, Terra e Luna) e sitúase como a xeración máis ambiciosa de OpenAI. Sol, o modelo insignia, marca novos máximos en avaliacións de codificación, análise profesional e uso de ferramentas, superando con claridade os resultados de GPT‑5.5 e modelos competidores. OpenAI destaca que Sol é capaz de acadar mellores resultados con menos tokens e menor custo, e que a súa configuración ultra pode coordinar varios axentes en paralelo para acelerar tarefas complexas, unha das innovacións máis salientables da actualización.
Tamén subliñan melloras substanciais en ámbitos como o deseño de interfaces, a creación de documentos profesionais e a integración con ferramentas de traballo. GPT‑5.6 demostra unha capacidade refinada para interpretar sistemas de deseño, seguir patróns de presentación e producir artefactos listos para compartir con maior fidelidade e precisión, algo especialmente relevante para equipos que dependen de fluxos de traballo complexos en plataformas como Slack, Notion ou Microsoft 365.
A outra gran novidade chega da man de James Sun, responsable de produto en OpenAI, que confirmou en X que Atlas será descontinuado o 9 de agosto. O navegador, concibido como unha plataforma experimental para explorar como os axentes podían mellorar a navegación e o traballo na web, deixa paso ao novo ChatGPT Desktop, que integra capacidades de navegador e axentes nun único contorno. Sun recoñece que as aprendizaxes obtidas cos primeiros usuarios de Atlas foron clave para o desenvolvemento das novas ferramentas, pero que o futuro pasa por unha experiencia unificada dentro da aplicación principal de ChatGPT.
Esta transición forma parte dun movemento máis amplo: OpenAI está consolidando funcións antes dispersas entre ChatGPT, Codex e Atlas nunha aplicación de escritorio que aspira a ser o centro operativo para traballo asistido por IA.
Finalmente, OpenAI tamén ampliou información sobre ChatGPT Trabajo, a nova experiencia orientada a equipos profesionais que aproveita GPT‑5.6 para transformar documentos, notas e fluxos de traballo en resultados pulidos e interactivos. A ferramenta está a chegar progresivamente a macOS, Windows e a versión web, e promete converterse nunha peza central para empresas que buscan automatizar tarefas complexas sen perder control sobre o proceso creativo ou analítico.

Startup Galicia e Galicia Constrúe impulsan a innovación na construción nun encontro entre 20 empresas e startups

S. P. — 2026-07-09T16:07:00Z

Startup Galicia celebrou na Nave de Vidán de Santiago a cuarta edición de Conecta Empresas, un encontro que reuniu 9 empresas galegas consolidadas do mundo da construción e 11 novas firmas innovadoras (startups), co obxectivo de impulsar a innovación aberta e contribuír á modernización do sector da construción mediante a colaboración entre compañías consolidadas e proxectos emerxentes.
Organizada por Startup Galicia en colaboración con Galicia Constrúe e o Instituto Galego de Promoción Económica (IGAPE), a iniciativa é en palabras das ditas entidades “unha aposta por reducir a distancia entre industria e emprendemento, creando un espazo de diálogo no que identificar oportunidades de colaboración e de negocio arredor dos principais retos que afronta o sector”.
A apertura institucional contou coa participación de Carmen Pumariño, presidenta de Startup Galicia; Pablo Vázquez, xerente de Galicia Constrúe; e Rosa Méndez, directora da Área de Innovación do IGAPE, que destacaron a necesidade de fortalecer a colaboración entre empresas consolidadas e o ecosistema emprendedor como motor de innovación, competitividade e crecemento para Galicia.
Nesta edición rexistráronse como participantes empresas como Abeiro de Rehabilitación, Casas Arraigo, Civis Global, Construcciones Ramírez, Finsa, Grupo Rodiñas, Obras y Servicios Gómez Crespo, Porexgal e Prometal Tecnoloxía e Innovación que tiveron a oportunidade de coñecer de primeira man as solucións desenvolvidas por startups como Cargoffer, Timetime, Zebra Brain, Dokken, Metlabs, Lupeon, Nigal, Birdmind, Muutech, Docuten e Noukee.
Ao longo da mañá, as empresas presentaron os seus proxectos e participaron nun formato dinámico que combinou presentacións breves, reunións rápidas individuais e espazos de networking, favorecendo o intercambio de coñecemento e a identificación de sinerxías entre compañías de distintos tamaños e ámbitos de actividade.
A xornada puxo de manifesto a importancia de que as empresas consolidadas coñezan de primeira man o talento e a capacidade innovadora das startups e non busquen fóra solucións que se están a desenvolver en Galicia, segundo explicaron as entidades organizadoras, engadindo que “nun momento no que o sector da construción afronta importantes desafíos relacionados coa dixitalización, a industrialización dos procesos, a sustentabilidade, a eficiencia enerxética e a incorporación de novas tecnoloxías, a colaboración co ecosistema emprendedor constitúe unha ferramenta estratéxica para acelerar a súa transformación e reforzar a competitividade das empresas galegas”.
Como novidade desta edición, a xornada incluíu un Focus Group sobre a identificación de necesidades no sector da construción , moderado polo equipo de Designthinking.gal. Trátase dunha dinámica participativa desenvolvida coas empresas asistentes para identificar os principais retos, barreiras e oportunidades de innovación do sector.

Santiago achega este verán obradoiros tecnolóxicos nos centros socioculturais

S. P. — 2026-07-09T15:34:00Z

A rede de Centros Socioculturais do Concello de Santiago oferta nos meses de xullo e setembro un amplo programa de actividades de lecer, educativas e culturais, dirixidas a públicos de todas as idades, baixo o epígrafe Vive o Verán. O obxectivo, explicou o concelleiro Xan Duro, “non é só ofertar alternativas de ocio nos equipamentos máis próximos á cidadanía, senón tamén fomentar as relacións sociais e o tempo compartido entre os veciños e veciñas de Santiago”.
No programa inclúense diferentes propostas como roteiros, actividades sobre novas tecnoloxías, obradoiros artísticos, accións relacionadas co medio ambiente e tamén espectáculos culturais para o público infantil e familiar.
No capítulo de experiencias dixitais, haberá actividades adaptadas a públicos de diferentes idades.
Así, no Centro Sociocultural do Ensanche desenvólvese o proxecto educativo do club xuvenil Camp Tech, dirixido a mozos e mozas de entre 13 e 15 anos que participen nas actividades das Cativadas de verán; pero tamén haberá obradoiros para persoas adultas os luns e mércores, de 17 a 19 horas. Neles abordaranse cuestións como a identificación de estafas, a utilización da intelixencia dixital ou a edición de fotos co móbil. Mentres, no CSC das Fontiñas desenvólvese un obradoiro para a mocidade sobre o programa de deseño Tinkercad e o programa de laminado Cura.

Telefónica e Amper actualizan as redes de comunicacións críticas do Aeroporto da Coruña

S. P. — 2026-07-09T15:01:30Z

Telefónica España e Amper serán as empresas encargadas de renovar as redes de radiocomunicacións DMR e TETRA en dez aeroportos españois xestionados por AENA, listaxe entre os que se atopa o Aeroporto da Coruña.
Telefónica explica que a renovación destas redes de radiocomunicacións (sistemas de comunicacións de confianza e a proba de fallos), “permitirá mellorar a resiliencia e dispoñibilidade das solucións que soportan a coordinación dos distintos servizos aeroportuarios, contribuíndo a garantir a seguridade e eficiencia das operacións en contornas de alta esixencia operativa”.
En concreto, o proxecto contempla a modernización das infraestruturas existentes mediante a implantación de mecanismos avanzados de autenticación e cifrado, tanto na rede como nos terminal de usuario. Así se poderán reforzar os estándares de seguridade, integridade e protección das comunicacións críticas na contorna aeroportuaria, garantindo unha maior fiabilidade nos sistemas de coordinación operativa.
Os aeroportos sobre os que se traballará nos próximos 36 meses son: Josep Tarradellas Barcelona – El Prat, Málaga – Costa do Sol, Palma de Mallorca, A Coruña, Xirona – Costa Brava, Tenerife Sur, Forteventura, Seve Ballesteros – Santander, La Palma e Valencia, todos eles considerados como infraestruturas críticas dentro da rede aeroportuaria xestionada por Aena.
Con esta adxudicación, Amper e Telefónica reforzan a súa colaboración e incrementan a súa capacidade para abordar proxectos de complexidade tecnolóxica en contornas que requiren altos niveis de dispoñibilidade, seguridade e continuidade do servizo.
A rede DMR (Digital Mobile Radio), amplamente implantada en contornas empresariais, industriais e empresariais, consiste “nun sistema de radio dixital que permite que persoas ou equipos comuníquense por voz e datos de forma clara e eficiente”, explica Telefónica.
Pola súa banda, a rede TETRA (Terrestrial Trunked Radio) supón o estándar de radiocomunicacións dixitais de misión crítica, deseñado para ofrecer comunicacións seguras e de alta dispoñibilidade cando se requiren funcionalidades avanzadas e un alto nivel de dispoñibilidade.

O CITIC conclúe o proxecto Erasmus+ Design2Freedom

S. P. — 2026-07-09T11:55:11Z

O proxecto europeo Erasmus+ Design2Freedom finalizou oficialmente tras trinta e un meses de traballo conxunto entre a Confederación Española de Persoas con Discapacidade Física e Orgánica (COCEMFE), a Universidade da Coruña, Vilniaus Kolegija (Lituania), Creative District (Bélxica) e Technicka Univerzita v Kosiciach (Eslovaquia).
A iniciativa pecha desta maneira unha etapa na que “contribuíu a transformar o ensino universitario mediante metodoloxías de deseño centrado na persoa, situando as persoas con discapacidade no centro dos procesos de innovación”, segundo explicaron dende o CITIC, engadindo que o proxecto foi coordinado pola investigadora Betania Groba (CITIC), cuxa contribución foi determinante para trasladar a investigación a contornos reais de aprendizaxe e favorecer a colaboración entre universidade, entidades sociais e cidadanía.
O centro da UDC desempeñou un papel clave tanto no desenvolvemento de actividades de innovación como na validación de metodoloxías e recursos destinados a fomentar unha educación superior máis accesible e inclusiva.
Os últimos meses do proxecto estiveron marcados pola celebración dos eventos multiplicadores organizados polas entidades socias en España, Bélxica, Lituania e Eslovaquia. En total, preto de 500 persoas participaron nestas xornadas, entre profesorado, estudantado, persoal investigador, profesionais e representantes de entidades sociais.
A Universidade da Coruña foi unha das sedes destes encontros, contribuíndo a difundir os resultados do proxecto e a reforzar o intercambio de experiencias entre os distintos axentes implicados.
O peche oficial tivo lugar os días 11 e 12 de xuño en Bruxelas, onde se celebrou a última reunión transnacional do consorcio. En representación da UDC participaron as investigadoras Betania Groba e Patricia Concheiro, que traballaron xunto ao resto das entidades socias na revisión final de todos os resultados do proxecto, na avaliación das experiencias piloto e na definición da estratexia para garantir a continuidade dos materiais desenvolvidos. Durante eses días tamén se celebrou o encontro internacional Promoting Person-Centered Design for Disability in Higher Education, organizado por Creative District, que reuniu especialistas europeos para reflexionar sobre os retos do deseño inclusivo e o futuro da formación universitaria.
Un dos principais legados de Design2Freedom é o conxunto de recursos educativos abertos desenvolvidos durante o proxecto. Entre eles destacan un curso en liña gratuíto de quince horas de duración, un mapa internacional de experiencias inclusivas, un kit de ferramentas dixitais para o profesorado e unha guía de boas prácticas para incorporar o deseño centrado na persoa aos plans de estudo universitarios. Todos estes materiais están dispoñíbeis de balde e en varios idiomas, co obxectivo de facilitar a súa transferencia e ampliar o seu impacto máis aló da duración do proxecto.
Segundo explicou Betania Groba, coordinadora do proxecto na Universidade da Coruña, “o propósito foi xerar ferramentas útiles e transferibles que permitan consolidar un cambio na formación universitaria e contribuír a que o deseño inclusivo forme parte da práctica docente e profesional”.
Ao longo destes dous anos e medio, o CITIC impulsou algunhas das accións máis representativas do proxecto, converténdose nun espazo de encontro entre investigación, innovación tecnolóxica e participación social. Entre elas destaca o hackathon europeo Inclusive Design Lab, celebrado en decembro de 2024 nas instalacións do centro de investigación. Durante este encontro, equipos internacionais e interdisciplinares traballaron xunto a persoas con discapacidade para desenvolver solucións tecnolóxicas inclusivas, poñendo en práctica metodoloxías de cocreación e deseño centrado na persoa.

CLUSAGA presenta catro proxectos que revolucionan o eido alimentario con IA, IoT e blockchain

S. P. — 2026-07-09T10:10:59Z

O Clúster Alimentario de Galicia (CLUSAGA) presentou os resultados dos catro proxectos de I+D+i desenvolvidos ao longo do último ano no marco da convocatoria de 2025 do programa de apoio ás Agrupacións Empresariais Innovadoras (AEI) do Ministerio de Industria e Turismo. Trátase dos proxectos GEMIAL, SIIOMA, SIMBA e SmartLaCO2, nos que participaron un total de 25 entidades pertencentes ao ecosistema agroalimentario, tecnolóxico e de innovación, deron lugar ao desenvolvemento e validación de novas solucións dixitais orientadas a acelerar a transformación tecnolóxica da industria alimentaria.
A presentación dos resultados tivo lugar durante o Demo Day: Transformando o sector alimentario a través da innovación, unha xornada na que empresas, centros tecnolóxicos e entidades colaboradoras compartiron os principais avances acadados e analizaron o potencial destas ferramentas para a súa transferencia ao tecido empresarial.
O proxecto SmartLaCO2 culminou co desenvolvemento dunha plataforma de análise da circularidade baseada nunha superestrutura dixital ambiental que integra tecnoloxías de IoT (Internet das Cousas), intelixencia artificial e cadea de bloques (blockchain). O principal resultado foi a creación dun Pasaporte Verde Dixital, capaz de certificar de forma inmutábel a sustentabilidade de cada lote de produto, reforzando a rastrexabilidade ambiental, combatendo o greenwashing e facilitando o cumprimento das futuras esixencias normativas europeas, como a Directiva CSRD.
No caso de SIMBA, desenvolveuse unha plataforma intelixente para favorecer a simbiose industrial entre empresas xeradoras de subprodutos e provedores de tecnoloxías. Entre os fitos acadados destaca a validación, en contorna industrial relevante (TRL 5), dun sistema de identificación e matching de recursos cun nivel de aceptación superior ao 80 %, capaz de impulsar novos modelos de economía circular e contribuír a reducións potenciais das emisións de gases de efecto invernadoiro de entre o 20 % e o 50 % de cara a 2030.
Pola súa banda, SIIOMA validou unha solución baseada en intelixencia artificial xerativa en catro contornas industriais reais dos sectores da automoción, bebidas, conservas e lácteos. A ferramenta desenvolvida integra a dixitalización de activos e documentación técnica para facilitar o mantemento preditivo e o aseguramento da calidade, mellorando o acceso ao coñecemento industrial e optimizando a toma de decisións en planta.
Finalmente, GEMIAL permitiu consolidar un xemelgo dixital da produción e do frío industrial que integra tecnoloxías IoT, sensórica avanzada, visión artificial e intelixencia artificial para monitorizar procesos en tempo case real. A solución facilita a optimización enerxética, reduce mermas, mellora a eficiencia operativa e establece un marco interoperábel de datos que favorece a descarbonización, o cumprimento dos criterios ESG e a competitividade das pemes agroalimentarias.
Innovación colaborativa para transformar o sector
Os catro proxectos contaron coa participación dun consorcio formado por 25 entidades do ecosistema agroalimentario, tecnolóxico e de innovación, entre elas Clusaga, DIHGIGAL, BIOGA, VIRATEC, Soltec Ingenieros, Panoimagen, Gradhoc Smart, Grupo ECO3G, Coesco Deza, Conservas Cambados, Queixería Barral, Snop Estampación, ASM Soft, Logicmelt Technologies, Kiwi Atlántico, ODS Protein, Queizuar, Isanatur, Contactica, Medrar, Hermanos Paniagua e Ignacio González Montes.
Durante a xornada tamén se celebrou o Pitch de Provedores Homologados de CLUSAGA, un espazo destinado a presentar solucións innovadoras e favorecer novas oportunidades de colaboración entre empresas do ecosistema.

Corgos lembra dende a Aula CeMIT de Ribeira que o 37,6% dos galegos contan xa con competencias dixitais avanzadas

S. P. — 2026-07-09T09:48:26Z

O conselleiro de Facenda e Administración Pública, Miguel Corgos, visitou a Aula CeMiT de Ribeira esta mañá. Alí destacou a aposta da Xunta pola “capacitación dixital para reducir fendas e contribuír a unha sociedade máis preparada para afrontar os retos neste eido”. Amais, subliñou que a modernización tecnolóxica debe ir sempre acompañada de capacitación, “para que as persoas poidan utilizala con confianza, seguridade e responsabilidade”.
Sobre este punto, subliñou que esa aposta pola capacitación dixital da cidadanía e o traballo desenvolvido, empeza a dar os seus froitos. Así, na actualidade, o 37,6 % da poboación galega de entre 16 e 74 anos conta xa con competencias dixitais avanzadas, o que supón que máis dun terzo da cidadanía acadou o nivel máis alto neste eido.
Corgos recordou tamén que a porcentaxe de galegos con este nivel de coñecementos e habilidade “medrou máis dun 4 % no último ano, situándose Galicia por riba da media europea en varios ámbitos da capacitación dixital como a comunicación, información, resolución de problemas e seguridade”.
Tamén resaltou que en 2025 a Administración galega emitiu máis de 42.400 certificados de capacitación dixital e destacou o éxito de iniciativas de formación e dinamización como a que se está a impartir nesta aula de Ribeira (Finanzas para todos), un curso que, impulsado pola Axencia para a Modernización Tecnolóxica de Galicia (AMTEGA) e en colaboración co Banco de España, aborda cuestións prácticas como a saúde financeira persoal, o impacto da inflación, o uso de contas e medios de pago, as hipotecas, o diñeiro en efectivo e as ferramentas do Banco de España e a protección fronte aos riscos dixitais.
Miguel Corgos concluíu agradecendo a colaboración do Banco de España e a implicación do persoal encargado da formación, “porque unha cidadanía máis formada, dixo, é tamén unha cidadanía máis libre, máis segura e mellor preparada”.

O Porriño contará cunha aplicación móbil de comunicación veciñal grazas ao obradoiro de emprego Eco-Necta

S. P. — 2026-07-09T08:11:27Z

Esta semana deron comezo no Porriño os obradoiros duais de emprego O Porriño Eco-Necta, un proxecto que busca mellorar a formación e a empregabilidade de 20 veciños e veciñas que estaban en situación de desemprego. O programa ten dúas vertentes: unha medioambiental e outra dixital.
Por unha banda, Eco-Necta complementa o coidado do entorno grazas a 10 alumnos-traballadores dedicados á conservación de montes e á limpeza de camiños en parroquias como Atios, Budiño, Cans, Chenlo, Mosende, Pontellas e Torneiros.
Pola outra, outros 10 participantes céntranse na área tecnolóxica para desenvolver unha nova aplicación municipal que mellorará a comunicación veciñal. “E virá complementar a nova e innovadora web que está a pór en marcha o Concello do Porriño”, explicou o alcalde do municipio, Alejandro Lorenzo.
O rexedor acudiu xunto á delegada da Xunta, Ana Ortiz, o concelleiro de Medio Ambiente, Carlos González, e a de Emprego, Teresa Veloso, á xornada inaugural destes obradoiros, onde os docentes marcaron os obxectivos para os vindeiros nove meses (o tempo que durará este programa) para adquirir novas capacitacións e mellorar o proceso de empregabilidade.
Alejandro Lorenzo quixo poñer en valor o dobre beneficio deste programa dual: “Con esta iniciativa non só ofrecemos unha oportunidade de futuro a persoas en desemprego, senón que investimos directamente no coidado do noso patrimonio natural en todas as parroquias e na modernización e dixitalización dos servizos municipais para estar máis preto da veciñanza”.
Sinalou que un dos piares fundamentais do obradoiro de Actividades auxiliares en conservación e mellora de montes é a realización de tarefas esenciais para a seguridade e o mantemento do contorno, tales como limpeza e accesibilidade (mantemento de camiños municipais, marxes e drenaxes nas parroquias de Atios, Budiño, Cans, Chenlo, Mosende, Pontellas, Torneiros e O Porriño) e prevención de incendios (traballos forestais en parcelas municipais e o mantemento das faixas secundarias de titularidade pública en Atios, Budiño e Pontellas).
Na especialidade de Desenvolvemento de aplicacións con tecnoloxía web, traballarase na creación dunha nova aplicación municipal para mellorar a comunicación directa entre a cidadanía e o Concello.

En Monforte o Concello entrega os diplomas da II fase dos obradoiros de dixitalización nas parroquias

S. P. — 2026-07-08T20:43:00Z

O alcalde de Monforte, José Tomé, fixo entrega este mércores 8 de xullo dos diplomas de participación na II fase dos cursos de dixitalización organizados polo Concello de Monforte de Lemos nas parroquias, en colaboración coa Deputación de Lugo. Os obradoiros, cunha duración total de 20 horas presenciais, desenvolvéronse neste caso nos locais sociais das parroquias de Chao do Fabeiro, Seoane e Piñeira.
A formación ofertada ten por obxectivo capacitar en habilidades tecnolóxicas básicas á veciñanza do ámbito rural mediante a aprendizaxe de accións como a sinatura dixital, o funcionamento de Ch@ve 365, o uso da aplicación do SERGAS, da sede electrónica, o teléfono móbil, e o uso seguro e consciente de Internet, entre outros aspectos relacionados coas TIC.
Estas accións formativas nas parroquias enmárcanse no programa E para dixitalizarse Lugo que promove a Deputación de Lugo en colaboración cos Concellos. Monforte adheriuse a esta iniciativa coa proposta de accións formativas dirixidas especificamente a capacitar en habilidades tecnolóxicas básicas á poboación do ámbito rural.
Estes cursos están dirixidos principalmente a persoas maiores ou en situación de desemprego, xente moza e mulleres do rural, aínda que están abertos a todas as idades e colectivos. O obxectivo, e ofrecer orientación e formación para facilitar a aprendizaxe das TIC como ferramenta de mellora da súa vida cotiá.
O alcalde felicitou aos asistentes pola súa participación nos cursos e animou a toda a veciñanza, e especialmente ás persoas maiores, a “perderlle o medo ás tecnoloxías, aproveitar as vantaxes que ofrecen e facer un bo uso delas”.
Así mesmo, recordou que a iniciativa púxose en marcha precisamente sendo el presidente da Deputación Provincial de Lugo, consciente da importancia de chegar a toda a poboación, especialmente no rural, para formar e capacitar á veciñanza nas novas tecnoloxías, esenciais a día de hoxe para aspectos básicos da vida cotiá.
Ademais do diploma de participación nas accións formativas, as persoas asistentes ao acto recibiron como agasallo un reloxo dixital e un bolígrafo.

Volve a idade de ouro da pirataría

Redacción — 2026-07-08T20:21:00Z

Ubisoft lanza este xoves Assassin''s Creed Black Flag Resynced, unha revisión do clásico publicado en 2013 que chega a PlayStation 5, Xbox Series X|S e PC. A nova versión actualiza a aventura protagonizada por Edward Kenway cun apartado gráfico renovado, cambios na xogabilidade e contidos inéditos que amplían a historia orixinal.
Ambientado no Caribe durante a Idade de Ouro da pirataría, o xogo mantén a campaña principal na que o corsario galés Edward Kenway acaba envolto no conflito entre Asasinos e Templarios mentres busca o Observatorio, un artefacto capaz de localizar calquera persoa mediante unha mostra do seu sangue. Esta edición incorpora novas misións narrativas, incluídas liñas argumentais centradas en Barbanegra e Stede Bonnet, un novo capítulo final titulado A World Without Gold e misións adicionais para os oficiais navais.
A xogabilidade tamén foi revisada. O sistema de combate incorpora novos ataques, execucións encadeadas, armas con habilidades diferenciadas e inimigos inéditos, mentres que o sixilo ofrece maior liberdade grazas á posibilidade de agacharse en calquera momento, novas ferramentas e o regreso do sixilo social. O parkour tamén recibe melloras con movementos máis precisos, salto manual e tirolesas repartidas polo escenario.
Os combates navais continúan sendo un dos piares da experiencia, agora con novos oficiais para o Jackdaw, habilidades adicionais, condicións meteorolóxicas dinámicas, melloras para a personalización do barco e o regreso da Frota de Kenway. Tamén será posible repetir os enfrontamentos contra os lendarios navíos do xogo orixinal.
A base de operacións en Great Inagua amplíase con novos edificios e melloras que desbloquean armas, traxes, ingresos pasivos e vantaxes para a tripulación, mentres que o modo Foto se incorpora por primeira vez a esta entrega.
No plano técnico, Assassin''s Creed Black Flag Resynced emprega o motor Anvil para ofrecer iluminación dinámica con trazado de raios, texturas de maior resolución e un sistema meteorolóxico dinámico herdado de Assassin''s Creed Shadows, capaz de recrear tempestades, trombas mariñas e cambios atmosféricos en tempo real.
A experiencia complétase cunha interface completamente personalizable, varios niveis de dificultade independentes para combate, sixilo, navegación e actividades, así como opcións para adaptar a información mostrada en pantalla segundo as preferencias de cada xogador.

Dende Sony aproveitan o lanzamento desta versión mellorada de Black Flag para presumir das posibilidades gráficas da PS5 Pro

A Xustiza da UE rexeita o recurso de Apple contra a súa designación como gatekeeper baixo a DMA

Redacción — 2026-07-08T19:52:00Z

O Tribunal Xeral da Unión Europea desestimou este mércores os recursos presentados por Apple contra a súa designación como gardián de acceso (gatekeeper) ao abeiro da Lei de Mercados Dixitais (DMA), unha decisión que reforza a posición da Comisión Europea na aplicación da normativa destinada a limitar o poder das grandes plataformas tecnolóxicas e favorecer unha maior competencia no mercado dixital. A sentenza tamén declara inadmisible o recurso da compañía relacionado co servizo de mensaxería iMessage.
A DMA, en vigor desde maio de 2023, establece unha serie de obrigas e prohibicións para as grandes plataformas dixitais consideradas esenciais para o acceso aos mercados. O seu incumprimento pode derivar en multas de ata o 10 % da facturación anual mundial da empresa. Apple, Meta e ByteDance recorreran distintos aspectos desta lexislación ante os tribunais europeos.
Apple levou o caso aos tribunais en 2024 despois de que a Comisión Europea cualificase como un único servizo básico de plataforma as cinco tendas de aplicacións presentes nos seus dispositivos (iPhone, iPad, Mac, Apple TV e Apple Watch). O Tribunal avalou este criterio ao considerar que todas elas cumpren a mesma función: conectar os desenvolvedores cos usuarios finais para facilitar a distribución de aplicacións.
A empresa tamén cuestionara que o sistema operativo iOS fose considerado unha vía esencial para que outras empresas accedan aos usuarios, unha clasificación que obriga a facilitar unha maior interoperabilidade con servizos de terceiros. Os xuíces confirmaron igualmente a decisión da Comisión Europea.
Respecto de iMessage, o Tribunal non entrou no fondo da cuestión ao declarar inadmisible o recurso. A resolución sinala que a clasificación do servizo como sistema de comunicación interpersoal independente da numeración non produce efectos xurídicos vinculantes por si mesma e lembra que actualmente iMessage non figura entre os servizos designados como gardiáns de acceso aos que se aplican as obrigas da DMA.
Tras coñecerse a sentenza, Apple reiterou as súas críticas á normativa europea. A empresa sostén que as obrigas impostas pola DMA exceden o que considera proporcionado e legal e advirte de que poden debilitar as garantías de privacidade e seguridade desenvolvidas ao longo das últimas décadas, ademais de expoñer os usuarios a novos riscos. A tecnolóxica asegurou que seguirá defendendo a innovación e a protección da privacidade dos seus clientes europeos.
A compañía aínda pode recorrer a decisión ante o Tribunal de Xustiza da Unión Europea, limitado ás cuestións de dereito.

Mario Kart Tour deixará de funcionar en setembro

Marcus Fernández — 2026-07-08T18:43:00Z

O xogo móbil Mario Kart Tour, que pretendía trasladar o éxito dos xogos de carreiras de Mario das consolas aos dispositivos móbiles, non conseguiu uns resultados á altura dos que pretendía Nintendo, polo que a finais de 2023 deixaron de engadirlle contido novo e agora, este xogo estreado hai 7 anos anuncia o remate do seu servizo.
A fin do servizo de Mario Kart Tour supón que a partir do vindeiro 30 de setembro o xogo dirá adeus e, en previsión diso, suspenden a posibilidade de realizar novas subscricións ao pase dourado do xogo e ás súas renovacións. Iso si, quen neste momento teña activa unha subscrición, poderá gozar da mesma sen cargo adicional ata a fin do servizo, mentres que os usuarios que xa teñan a subscrición caducada poderán gozar dos beneficios do xogo de balde a partir do 8 de agosto, no que deron en chamar tempada de vacacións, coa que queren agradecer a confianza aos que gozaron do xogo todo este tempo.

: Calendario dos beneficios do pase dourado de cara ao cesamento do servizo de Mario Kart Tour

OpenAI estrea modelos de voz máis naturais para a interacción en vivo

Redacción — 2026-07-08T16:10:00Z

OpenAI presentou GPT‑Live, unha xeración de modelos de voz deseñados para que falar cun sistema de intelixencia artificial resulte tan natural como conversar cunha persoa. A compañía de Sam Altman destaca que esta tecnoloxía funciona en modo full‑duplex, capaz de escoitar e responder ao mesmo tempo, o que permite unha comunicación fluída e sen quendas ríxidas.
A arquitectura de GPT‑Live procesa entrada e saída de maneira continua, tomando decisións en tempo real sobre cando falar, interromper ou manter o silencio. Esta aproximación evita pausas artificiais e reduce interrupcións provocadas por ruídos ou pequenas vacilacións do usuario, un problema habitual en sistemas anteriores baseados en detección de silencios . Ademais, o modelo pode realizar tarefas como tradución en directo e manter un ritmo conversacional máis natural.
Outra das innovacións clave é a delegación de tarefas complexas. Cando a conversa require busca na web, razoamento profundo ou execución de accións máis elaboradas, GPT‑Live deriva o traballo ao modelo GPT‑5.5, mantendo ao mesmo tempo a interacción co usuario e integrando os resultados sen romper o fío da conversa.
OpenAI asegura que as avaliacións internas mostran unha preferencia clara polos novos modelos fronte ao modo de voz avanzado anterior, tanto en fluidez como en comodidade de uso. GPT‑Live destaca tamén en probas de razoamento científico e en tarefas de busca complexa, así como en escenarios de soporte en telecomunicacións, onde mellora o rendemento en interaccións longas e con múltiples pasos.
A experiencia de ChatGPT Voice intégrase agora con esta tecnoloxía. Os usuarios poden interromper, facer pausas ou pedir que o sistema fale máis amodo, e este responde con sinais de escoita activa como “mhmm” ou “got it”, reforzando a sensación de conversa real . As voces foron remasterizadas e o sistema pode mostrar información visual en tempo real, como datos meteorolóxicos, deportivos ou financeiros, mentres se mantén a interacción por voz.
GPT‑Live comeza a despregarse globalmente en iOS, Android e ChatGPT.com. A versión GPT‑Live‑1 será a predeterminada para usuarios de Go, Plus e Pro, mentres que GPT‑Live‑1 mini será a opción por defecto para contas gratuítas. A compañía traballa para ampliar a compatibilidade con máis idiomas e para incorporar capacidades de voz con vídeo e compartición de pantalla nunha futura actualización.

O CITIC da UDC avanza na fase final do proxecto europeo PILLAR-Robots

S. P. — 2026-07-08T15:38:00Z

O Centro de Investigación en Tecnoloxías da Información e das Comunicacións (CITIC) da UDC participou o pasado mes de xuño na sexta reunión anual do proxecto europeo PILLAR-Robots, celebrada na sede de PAL Robotics, en Barcelona. Este encontro constitúe a última reunión anual do consorcio antes da finalización do proxecto, prevista para o último trimestre de 2026, no marco do programa Horizon Europe.
Como entidade coordinadora do proxecto, a Universidade da Coruña desempeña un papel fundamental na dirección das actividades técnicas e estratéxicas que marcarán a recta final de PILLAR-Robots. Neste contexto, o persoal investigador adscrito ao CITIC do Grupo Integrado de Enxeñaría (GII) participou activamente nas sesións de traballo xunto co resto de socios europeos.
Baixo a coordinación do investigador Richard Duro, o consorcio revisou os avances acadados nos distintos paquetes de traballo e definiu as accións necesarias para completar os obxectivos do proxecto. Durante as sesións técnicas, José Antonio Becerra Permuy presentou os últimos progresos do paquete de traballo WP5, centrado na integración da arquitectura cognitiva, mentres que Francisco Bellas expuxo o estado actual e as próximas liñas de desenvolvemento do caso de uso WP8, orientado a contornas sociais.
A representación do CITIC completouse coa participación dos investigadores Alejandro Romero, Emanuel Fallas, Fabián Álvarez e Jakub Müller, que contribúen activamente ao desenvolvemento das distintas liñas de investigación do proxecto.
Así mesmo, os socios do consorcio compartiron os avances acadados nos casos de uso vinculados aos ámbitos agroalimentario e industrial, así como en aspectos relacionados co impacto socioeconómico, a ética, a regulación e o asesoramento ético da iniciativa.
A reunión concluíu con diferentes obradoiros de integración e demostracións dos desenvolvementos tecnolóxicos realizados ata o de agora. Nesta fase final do proxecto, o equipo do GII liderará o traballo na aplicación de edutainment, ademais de contribuír ás tarefas de integración e validación que permitirán demostrar os resultados obtidos nesta iniciativa europea.

O Campus de Ferrol clausura o campus tecnolóxico Compartindo o Norte, no que participaron uns 30 estudantes

S. P. — 2026-07-08T15:16:00Z

O Campus Industrial de Ferrol acolleu esta mañá o peche oficial do Campus Tecnolóxico Interuniversitario Compartindo o Norte, unha experiencia formativa e inclusiva dirixida a mozos e mozas de entre 18 e 35 anos con discapacidade intelectual, do desenvolvemento e/ou do espectro autista.
Participaron na clausura vicerreitora do Campus de Ferrol e Responsabilidade Social, Ana Ares; a directora de Inserta Empleo en Galicia, Beatriz Gallego; a delegada territorial da Xunta de Galicia en Ferrol, Martina Aneiros; a concelleira de Política Social, Rosa Martínez; e a directora do Programa Espazo Compartido da Universidade da Coruña (UDC), Montse Muriano.
O Campus Industrial de Ferrol e a cidade departamental acolleron, durante os últimos oito días e por primeira vez, as iniciativas de Compartindo o Norte, unha iniciativa organizada pola Universidade da Coruña (UDC) e a Universidade de Cantabria (UC), en colaboración coa Fundación ONCE e co financiamento do Fondo Social Europeo Plus (FSE+), no marco da convocatoria Campus de Verano UniDiversidad 2026.
Nesta edición participaron un total de 30 estudantes: 21 pertencentes ao Programa Espazo Compartido da Universidade da Coruña (UDC) e nove ao Programa UniDiversidad da Universidade de Cantabria (UC). Durante a súa estadía en Ferrol estiveron aloxados na Residencia Universitaria, situada na rúa Sánchez Barcáiztegui.
A vicerreitora do Campus de Ferrol e Responsabilidade Social, Ana Ares, salientou que “unha sociedade avanza de verdade cando non deixa a ninguén atrás e cando entende que a diversidade non é un problema que resolver senón unha riqueza que cultivar”. Nesta mesma liña, recalcou que “na UDC queremos ser unha universidade na que a diversidade sexa unha fortaleza e non unha excepción”. Tamén aproveitou a súa intervención para agradecer todo o traballo realizado ás persoas participantes no campamento, ás súas familias, ao “extraordinario equipo humano de Espazo Compartido”, algo no que tamén incidiu a súa directora, Montse Muriano, ás entidades colaboradoras e á Fundación ONCE.
Tanto a delegada territorial da Xunta de Galicia en Ferrol, Martina Aneiros, como a concelleira de Política Social, Rosa Martínez, amosáronse moi agradecidas coa elección, por primeira vez, do Campus de Ferrol e da cidade departamental para a posta en marcha deste campamento inclusivo. Ambas as dúas convidaron ás persoas participantes a repetir esta experiencia e ás persoas organizadoras a repetir este campamento para o próximo ano.
Pola súa banda, a directora de Inserta Empleo en Galicia, Beatriz Gallego, felicitou a todas as partes implicadas e non descartou sumarse a algunha das actividades formativas ou de lecer en futuras edicións.
Impresión 3D, robótica e videoxogos
Ao longo dos oito días que durou este Campus Tecnolóxico os mozos e mozas inscritos participaron en obradoiros STEAM centrados, principalmente, na impresión 3D, na robótica e no deseño e desenvolvemento de videoxogos. Como peche a esta experiencia formativa e inclusiva, nos dous últimos días, traballaron, divididos en pequenos equipos, na elaboración dun proxecto colaborativo final denominado Ciencia Compartida e no que puxeron en práctica os coñecementos e competencias adquiridas no campus.
Durante a presentación dos proxectos, celebrada na mañá deste mércores 8 de xullo, compartiron pequenas réplicas da Torre de Hércules, da Ponte de Rande ou mesmo dunha das grúas do estaleiro de Navantia en Ferrol impresas en 3D.
Ademais, presentaron as demos de dous videoxogos de creación propia, un deles protagonizado pola figura mitolóxica da Serea do Orzán. Tanto no proceso de procura de información como no da propia elaboración do proxecto contaron co acompañamento e coa orientación do profesorado vinculado ao Programa Espazo Compartido da Universidade da Coruña (UDC), así como do persoal de Gazapo Xestión, centro formativo con sede en Narón.
O programa deste campus tecnolóxico interuniversitario inclusivo completouse cunha proposta formativa centrada no desenvolvemento de habilidades persoais e sociais. Ao longo dos últimos oito días, a rapazada traballou aspectos como a comunicación asertiva, a xestión emocional, a oratoria e o traballo en equipo, co obxectivo de dotar ás persoas participantes de ferramentas útiles para a súa vida persoal e profesional.
Ademais da formación, o campus incluíu unha amplo programa de actividades culturais, deportivas e de lecer. Entre elas, cómpre salientar as visitas a Exponav, ao Arsenal e ao barrio de Canido, así como as excursións á Fervenza do Belelle, á praia de Ares, ao Castelo de San Felipe ou ao Castro de Esmelle. A proposta lúdica completouse cunha actividade de deporte adaptado organizada en colaboración coa Fundación Enki.

A Deputación de Lugo achegará formación en IA e ciberseguridade ao persoal das administracións locais

S. P. — 2026-07-08T14:25:00Z

A Deputación de Lugo está a impulsar unha Administración Local máis moderna e preparada a través dunha nova edición do Plan Agrupado de Formación Continua. Este programa que a institución provincial desenvolve desde 1995 está consolidada como unha ferramenta estratéxica para mellorar a capacitación do persoal das entidades locais e contribuír á mellora dos servizos públicos que recibe a veciñanza.
A presidenta da Deputación, Carmela López, valorou esta iniciativa “que nos permite apoiar aos concellos, especialmente aos de menor tamaño, poñendo á súa disposición recursos e oportunidades de formación que dificilmente poderían asumir con medios propios”. E engadiu: “Investir na capacitación do persoal é investir nuns servizos públicos de maior calidade. Unha Administración moderna non depende só da tecnoloxía; depende, sobre todo, das persoas que a fan posíbel cada día”.
O Plan Agrupado de Formación Continua 2026 está dirixido aos 5.114 empregados e empregadas públicos das administracións locais da provincia e oferta este ano un total de 664 horas lectivas e 975 prazas en 21 accións formativas que se desenvolven entre xuño e novembro.
Este programa, con máis de tres décadas de traxectoria, reflicte, en palabras da Presidenta, “a aposta sostida da Deputación por acompañar aos concellos na mellora da súa capacidade de xestión, ofrecendo formación especializada que resulta especialmente valiosa para os municipios pequenos, que dificilmente poderían dispoñer dunha oferta destas características con recursos propios”.
A edición de 2026 reforza a aposta da Deputación de Lugo pola modernización da Administración Local incorporando materias de plena actualidade como a intelixencia artificial aplicada á xestión local, a ciberseguridade, as competencias dixitais avanzadas, a protección de datos, a contratación pública, a xestión orzamentaria, a atención á cidadanía ou a protección do medio ambiente, sen deixar de lado ámbitos esenciais para o funcionamento diario das entidades locais.
O Plan está deseñado para dar resposta ás necesidades de todas as escalas da Administración Local, tanto da Administración Xeral como da Especial, dando cobertura ao persoal técnico, de xestión, administrativo, auxiliar e subalterno, así como a colectivos específicos, entre eles as policías locais.
Outro dos piares desta iniciativa é facilitar o acceso á formación con independencia do concello no que desenvolva o seu traballo cada empregado ou empregada pública. Por iso, a maior parte das accións impártense en modalidade en liña, complementadas con telepresenza e videoconferencia, reducindo desprazamentos e favorecendo a conciliación.

Telefónica reforza a cobertura 5G en Ortigueira con motivo do Festival do Mundo Celta

S. P. — 2026-07-08T14:04:00Z


Unha actuación do festival nunha imaxe de David Bermejo

Telefónica reforzará cunha unidade móbil e actuacións de parametrización avanzada na súa rede 5G en Ortigueira a partir deste xoves 9 de xullo e ata o próximo día 12 de xullo para garantir a cobertura móbil de datos e voz durante o Festival Internacional do Mundo Celta.
A medida enmárcase dentro do Plan Verán activado pola compañía para “responder coa máxima calidade do servizo á alta demanda rexistrada nos eventos musicais, culturais e gastronómicos especialmente multitudinarios que se celebran en Galicia durante a época estival e que supoñen un aumento significativo do tráfico de voz e datos polo seu gran interese turístico”.
A unidade móbil que se despregará en Ortigueira con 5G de altas prestacións permitirá aumentar de forma temporal a capacidade e a velocidade de transmisión de datos, mellorando así a experiencia do usuario e garantindo a conectividade durante o festival.
Ademais de en Ortigueira, Telefónica mellorará a capacidade da súa rede móbil noutros 26 eventos que se desenvolverán en diversas localidades da provincia da Coruña, entre os que se atopan as Festas do Apóstolo de Santiago de Compostela, a Feira Franca Medieval de Betanzos, a Romaría da Barca de Muxía ou o Morriña Fest da Coruña.
No conxunto de Galicia, o plan estival da operadora inclúe o reforzo da cobertura nun total de 74 grandes eventos que se celebraron ou que se van celebrar nas próximas semanas e ata setembro en diversos puntos da xeografía galega. Tamén actuacións de optimización nas infraestruturas xa existentes, ademais de novos despregamentos no litoral -na Coruña, Arteixo, Ferrol, Pontevedra e Sanxenxo- e un dispositivo especial para a eclipse do próximo 12 de agosto.

O programa Innovación e Talento Novo celebrou o seu Demo Day

Redacción — 2026-07-08T10:54:29Z

A directora xeral de Traballo Autónomo e Economía Social, Marta Mariño, participou hoxe no Demo Day do Programa Innovación e Talento Novo, unha iniciativa impulsada pola Xunta a través da Rede de polos de emprendemento, a plataforma U4impact e as universidades públicas galegas. Durante o acto, celebrado no Centro de Orientación ao Emprendemento, salientou os catro proxectos desenvolvidos polo estudantado participante e destacou o valor da colaboración entre o ecosistema emprendedor e o ámbito universitario para impulsar solucións innovadoras con impacto real.
Entre as iniciativas presentadas cómpre destacar un proxecto que abordou a automatización da xestión das comunicacións con provedores loxísticos e de mantemento, desenvolvido por alumnado do Grao en Enxeñería Informática xunto con Mvico Experience.
Durante a presentación dos proxectos colaborativos, emprendedores da Rede de polos de emprendemento implicados nas iniciativas compartiron a súa experiencia e puxeron de relevo a importancia do talento novo e da cooperación co ámbito universitario. A xornada rematou cun espazo de networking destinado a favorecer novas conexións e futuras colaboracións.
O programa promovido pola Xunta, U4impact e as universidades públicas galegas pechou así unha nova edición dirixida ao alumnado que realizou o Traballo de Fin de Grao (TFG) durante o curso 2025-2026. A iniciativa buscou ofrecer un itinerario formativo compatible co último ano de carreira e facilitar as primeiras oportunidades profesionais mediante proxectos emprendedores desenvolvidos en colaboración coa Rede de polos de emprendemento e apoio ao emprego.

Entra en produción unha nova unidade SSD de Samsung orientada a servidores de IA

Redacción — 2026-07-08T10:10:00Z

Samsung Electronics anunciou o inicio da produción masiva das unidades SSD de uso empresarial PM1763, baseadas na interface PCIe 6.0 e orientadas a servidores de intelixencia artificial e computación de altas prestacións. O novo dispositivo está pensado para responder ao crecente volume de datos que requiren os procesos de adestramento e inferencia de modelos de IA, ofrecendo maiores velocidades de transferencia e unha arquitectura de controlador optimizada.
As unidades PM1763 combinan a memoria V-NAND de novena xeración de Samsung cun controlador de 4 nanómetros de novo desenvolvemento, mellorando tanto o rendemento como a eficiencia enerxética. O novo modelo de unidade SSD xa superou os procesos de validación para plataformas de IA de nova xeración e está preparado para atender as necesidades das futuras infraestruturas deste ámbito.
O SSD estará dispoñible con capacidades de 4, 8 e 16 TB. A versión de 16 TB acada velocidades de lectura secuencial de ata 28.400 MB/s e de escritura secuencial de ata 21.900 MB/s, máis do dobre que o modelo anterior, o PM1753.
Estas prestacións permiten, por exemplo, transferir un LLM de 40 GB en preto de 1,4 segundos, reducindo a latencia na comunicación entre procesadores e aceleradores e mellorando a eficiencia global do procesamento de cargas de traballo de IA.
As unidades PM1763 tamén están optimizadas para servidores con refrixeración líquida mediante tecnoloxía Direct-to-Chip (D2C), o que facilita manter o máximo rendemento durante períodos prolongados baixo cargas intensivas.
Samsung asegura ademais que a eficiencia enerxética mellora en máis de 1,8 veces respecto ao modelo PM1753, o que contribúe a reducir os custos operativos dos centros de datos.
A unidade incorpora tamén novas medidas de seguridade adaptadas ás necesidades das infraestruturas de IA. Entre elas figuran algoritmos de criptografía poscuántica (PQC), deseñados para facer fronte ás futuras ameazas derivadas da computación cuántica, así como compatibilidade co protocolo TEE Device Interface Security Protocol (TDISP), que reforza a protección das comunicacións de datos en contornas virtualizadas.

As Ray-Ban Meta desactivan a súa cámara se detectan modificacións no LED de gravación

Marcus Fernández — 2026-07-08T09:52:47Z

Recentemente a xornalista tecnolóxica Joanna Stern publicou unha reportaxe sobre a proliferación de servizos de modificación de lentes Ray-Ban Meta para inhabilitar o seu LED de gravación e así poder realizar gravacións de vídeo sen que outras persoas poidan decatarse.
Stern acudiu ao Marketplace de Facebook para localizar estes servizos de modificación de lentes Ray-Ban Meta e contratou un en New Jersey no que lle permitiron filmar a operación na que estragaban fisicamente o LED das lentes e aplicaban unha resina para que non se percibise a simple vista tal modificación.
Na investigación realizada por Joanna Stern en colaboración con NBC News atoparon ofertas deste servizo en máis de 30 estados, pese aos intentos de Meta (que curiosamente é a compañía responsable dun dos servizos nos que se promocionan).
Esta situación levou a que dende Meta publicasen un comunicado explicando o funcionamento do LED de gravación das súas lentes, lembrando que ten medidas para evitar que se tape (se as lentes detectan que o LED está tapado desactivan a toma de fotografías e vídeos) e dando conta dunha actualización para as lentes que detectarán cando o LED foi estragado fisicamente, situación na que desactivarán a cámara.
Tamén comentan que están a eliminar todos os anuncios de servizos de modificación de lentes, vetando ás contas de usuario que realicen tal práctica e incluso exercendo accións legais contra as persoas e empresas que comercialicen servizos deseñados a evitar esta medida de protección da privacidade dos usuarios.

: Boa parte dos anuncios dos servizos de modificación das Ray-Ban Meta publícanse no Marketplace de Facebook

Vídeo de Joanna Stern sobre a modificación das lentes Ray-Ban Meta

Ábrese o prazo para que ata 15 empresas accedan ao programa de internacionalización Galicia Avanza

S. P. — 2026-07-08T09:39:14Z

A Consellería de Economía (a través do IGAPE) e a Tecnópole (Parque Tecnolóxico de Galicia) veñen de abrir o prazo da quinta convocatoria de Galicia Avanza, programa de aceleración para a internacionalización de pemes galegas iniciado en 2022. Poderán acceder ao mesmo un total de 15 pequenas e medianas empresas consolidadas ou startups. As solicitudes deberán presentarse ata o 25 de xullo a través da páxina web de Galicia Avanza.
O obxectivo desta iniciativa, xestionada e coordinada por Tecnópole, é que solucións innovadoras galegas, de calquera ámbito ou sector, acaden ou fortalezan a súa presenza no mercado exterior no menor tempo. Á hora de seleccionar ás pemes, valorarase o potencial de internacionalización e o grao de innovación dos seus produtos ou servizos, o coñecemento do mercado internacional obxectivo, o potencial de crecemento no mercado exterior, a capacidade financeira da empresa e a súa experiencia previa no eido internacional. Tamén se primará a porcentaxe de mulleres nos seus cadros de persoal e o nivel de implicación das empresas beneficiarias na metodoloxía do programa.
Galicia Avanza ofrece un programa integral de apoio á internacionalización de oito meses de duración, con itinerarios personalizados en eidos como o estudo do mercado, a estratexia de mercadotecnia, a adaptación de produtos e servizos, a protección das marcas e deseños industriais ou intelectuais, así como a estratexia de acceso ao mercado. Traballarase tamén na detección de colaboracións con outras empresas, no acceso a novos segmentos de clientes, así como na captación de financiamento externo, entre outros aspectos. Ao longo do programa, as empresas participantes tamén recibirán mentoring, asesoramento e formación comercial e técnica.
Durante os dous primeiros meses, titores expertos prepararán itinerarios personalizados con cada unha das empresas, segundo as súas necesidades concretas. Durante os seguintes meses, o programa contratará os provedores de servizos profesionais que cubrirán as necesidades identificadas, a empresa levará a cabo as actividades definidas no seu plan de acción e farase un seguimento do mesmo. De xeito paralelo, as firmas beneficiarias poderán acceder a unha carteira de consultores expertos en diferentes materias e recibirán formación en temáticas relacionadas coas necesidades detectadas nos diagnósticos.
Nas catro edicións anteriores do programa impulsouse a internacionalización dun total de 111 pemes de toda a comunidade, pertencentes aos sectores máis diversos.

Telefónica reforza a cobertura 5G en Caldas de Reis con motivo do Festival PortAmérica

S. P. — 2026-07-08T08:49:26Z

Telefónica reforzará cunha unidade móbil e actuacións de parametrización avanzada na súa rede 5G en Caldas de Rei a partir deste xoves 9 de xullo e ata o próximo día 11 para garantir a cobertura móbil de datos e voz durante o multitudinario Festival PortAmérica.
A medida enmárcase dentro do Plan Verán activado pola compañía para “responder coa máxima calidade do servizo á alta demanda rexistrada nos eventos musicais, culturais e gastronómicos especialmente multitudinarios que se celebran en Galicia durante a época estival e que supoñen un aumento significativo do tráfico de voz e datos polo seu gran interese turístico”, sinalou a operadora, engadindo que a unidade móbil que vai despregar en Caldas de Rei con 5G de altas prestacións “permitirá aumentar de forma temporal a capacidade e a velocidade de transmisión de datos, mellorando así a experiencia do usuario e garantindo a conectividade durante o festival”.
Sergio Sánchez, director de Operacións, Rede e TI de Telefónica España, destaca: “Telefónica asume o reto de converterse na mellor vía de acceso dos cidadáns ás tecnoloxías dixitais. Contamos coa mellor rede para ofrecer máis e mellores servizos alí onde os nosos clientes máis o necesitan, especialmente en momentos de máxima concentración turística como é este período estival”.
Ademais de en Caldas de Reis, Telefónica mellorará a capacidade da súa rede móbil noutros 25 eventos que se desenvolverán en diversas localidades da provincia de Pontevedra, entre os que se atopan a Festa da Auga, de Vilagarcía de Arousa, a Festa do Carneiro ao Espeto, de Moraña, o Festival O Son da Muralla, de Salvaterra de Miño, as Festas do Monte, da Guarda, as Festas da Peregrina, de Pontevedra, ou a da Empanada, de Bandeira.
No conxunto de Galicia, o plan estival da operadora inclúe o reforzo da cobertura nun total de 74 grandes eventos que se celebraron ou que se van celebrar nas vindeiras semanas e ata setembro en diversos puntos da xeografía galega. Tamén actuacións de optimización nas infraestruturas xa existentes, ademais de novos despregamentos no litoral -na Coruña, Arteixo, Ferrol, Pontevedra e Sanxenxo- e un dispositivo especial para a eclipse do próximo 12 de agosto.
Telefónica é actualmente líder en 5G en España con máis do 95% da poboación e máis de 6.200 municipios cubertos na banda de 3.500 MHz (altas prestacións), na de 700 MHz ou en ambas as. No caso de Galicia, a cobertura 5G alcanza xa ao 95% da poboación, con máis de 280 municipios nos que se pode gozar desta tecnoloxía.

Alén Space participa na misión da ESA dirixida a reforzar a ciberseguridade dos sistemas espaciais

S. P. — 2026-07-08T08:11:46Z

A misión CyberCUBE da Axencia Espacial Europea (ESA), concibida para reforzar a protección dos activos espaciais fronte ao crecente número de ciberameazas, foi lanzada con éxito este martes 7 de xullo desde a Base da Forza Espacial de Vandenberg (California), a bordo dun foguete Falcon 9. A misión está liderada pola multinacional tecnolóxica GMV a través dos seus equipos de Romanía e España, e conta tamén coa participación da firma viguesa Alén Space, integrada en GMV desde 2023.
Segundo explica a empresa galega, a posta en órbita do satélite “marca o inicio dunha misión pioneira destinada a validar, en condicións reais de operación, tecnoloxías e capacidades avanzadas de ciberseguridade aplicadas á contorna espacial”.
CyberCUBE forma parte das actividades Cyber Evolutions do Centro de Operacións de Ciberseguridade (CSOC) da ESA, dentro do programa Cyber Security Resilience, unha iniciativa transversal impulsada pola Oficina de Seguridade da Axencia para reforzar a protección tanto dos seus sistemas corporativos como das súas misións espaciais.
CyberCUBE foi concibida como unha plataforma experimental en órbita que proporcionará á ESA unha contorna segura e flexíbel para demostrar novas tecnoloxías de salvagarda de información e comunicacións antes da súa incorporación a futuras misións europeas. O seu principal obxectivo é “validar as capacidades do CSOC para monitorar e analizar datos procedentes de activos espaciais reais”, salienta Alén Space, engadindo que “tamén permitirá poñer a proba novas capacidades de ciberseguridade embarcadas e recompilar información clave para mellorar a resiliencia dos sistemas espaciais fronte a ameazas emerxentes”.
Entre os experimentos previstos destacan a detección e protección fronte a accesos non autorizados aos sistemas de mando e control, a identificación e mitigación de ataques de jamming e spoofing, a monitoraxe dos sistemas a bordo e a validación de novos algoritmos e tecnoloxías de ciberseguridade, como a criptografía poscuántica (PQC). A plataforma tamén permitirá realizar exercicios prácticos e experimentos avanzados inspirados en escenarios reais de ciberdefensa. Con este obxectivo, a ESA lanzou unha convocatoria aberta para a presentación de propostas experimentais, convidando a investigadores, enxeñeiros e innovadores a probar novas tecnoloxías, métodos, algoritmos, protocolos e técnicas de ciberseguridade aplicadas a sistemas espaciais utilizando CyberCUBE.
GMV é responsábel de todo o ciclo de vida da misión, desde as fases iniciais de deseño e desenvolvemento ata o lanzamento, as primeiras operacións en órbita, a fase de posta en servizo (commissioning) e a transferencia do control operativo á ESA.
O segmento de voo baséase nun CubeSat 3U desenvolvido por Alén Space, equipado con avanzadas capacidades de procesamento reprogramábeis e unha carga útil deseñada especificamente para a monitoraxe da ciberseguridade. A plataforma aproveita a experiencia de Alén Space en misións de pequenos satélites e proporciona a contorna en órbita necesaria para ensaiar tecnoloxías de salvagarda das comunicacións en condicións operativas reais. Durante a súa permanencia en órbita, o satélite recompilará datos esenciais sobre vulnerabilidades, ameazas e mecanismos de protección con aplicación en futuros sistemas espaciais.
Ademais do segmento espacial, o equipo de GMV en España desenvolveu compoñentes clave do segmento terreo, entre eles o centro de control da misión de Alén Space, baseado na solución comercial FocusSuite de GMV, así como un flatsat representativo desenvolvido xunto ao equipo de Romanía, que permitirá simular e validar distintos escenarios operativos.
Pola súa banda, o Centro de Operacións de Ciberseguridade (CSOC) da ESA actuará como principal segmento usuario, xestionando as solicitudes de misión e procesando a información obtida para a súa análise desde o punto de vista da protección tecnolóxica.
As operacións do satélite xestionaranse desde o Centro Europeo de Seguridade e Educación Espacial (ESEC) da ESA, situado en Redu (Bélxica), mentres que a infraestrutura FOX do Centro Europeo de Operacións Espaciais (ESOC) proporcionará as capacidades de comunicación en banda S e banda X necesarias para a descarga de datos a alta velocidade e a mostraxe de radiofrecuencia.
Unha vez completadas con éxito as fases de lanzamento e operacións iniciais en órbita (LEOP), así como a posta en servizo do satélite, o equipo de GMV en Romanía transferirá o control operativo de CyberCUBE á ESA para o inicio das operacións nominais.
“O aumento das ameazas dirixidas contra infraestruturas críticas e sistemas espaciais converteu a ciberseguridade nunha prioridade estratéxica para o futuro do sector”, salientan dende Alén Space, engadindo que “CyberCUBE proporcionará á ESA unha plataforma única para probar, validar e madurar tecnoloxías nunha contorna operativa real, reducindo riscos e acelerando a súa adopción”.
Guillermo Lamelas, conselleiro delegado de Alén Space, salienta que “CyberCUBE é un claro exemplo de como os pequenos satélites poden contribuír a validar tecnoloxías críticas en condicións operativas reais. Estamos satisfeitos de achegar a plataforma CubeSat 3U para unha misión que axudará a reforzar a ciberseguridade dos futuros sistemas espaciais europeos”.
Alén Space está especializada no deseño, fabricación e operación de pequenos satélites para todo tipo de aplicacións. A empresa con sede en Nigrán (España) proporciona servizos para a realización de misións completas no espazo e tecnoloxía de vangarda para a fabricación de pequenos satélites.

Tony Hawk's Pro Skater 1 + 2 e The Planet Crafter chegarán a Xbox Game Pass o 21 de xullo

Redacción — 2026-07-07T21:39:15Z

Microsoft anunciou a segunda quenda de incorporacións ao catálogo de Xbox Game Pass para o mes de xullo, cunha selección de títulos na que destacan Tony Hawk''s Pro Skater 1 + 2, The Planet Crafter e a chegada da versión 1.0 de Palworld. A lista inclúe tamén o lanzamento de Gears of War: Reloaded e varias estreas dispoñibles desde o primeiro día no servizo.
O catálogo xa recibiu Winds of Arcana: Ruination, un Metroidvania de acción en 2,5D con énfase na narrativa e na exploración, dispoñible para a nube, consola, dispositivos portátiles e PC para os subscritores de Game Pass Ultimate, Game Pass Premium e PC Game Pass.
O 9 de xullo incorporarase Gears of War: Reloaded, unha remasterización do primeiro Gears of War desenvolvida con Unreal Engine e optimizada para a actual xeración de plataformas. A nova edición inclúe todo o contido publicado tras o lanzamento do xogo orixinal, como un acto adicional para a campaña, mapas multixogador, personaxes e elementos cosméticos. Ese mesmo día estrearase tamén Tamashika, un shooter arcade centrado na precisión, a rapidez e a supervivencia.
O 13 de xullo chegará Ascend to Zero, un roguelike de acción no que o control do tempo será a principal mecánica de combate. Ao día seguinte sumarase PBA Pro Bowling 2026, unha simulación de birlos que incorpora física avanzada, progresión profesional e xogadores oficiais da Professional Bowlers Association.
A partir do 15 de xullo estarán dispoñibles Quarantine Zone: The Last Check, un título de xestión ambientado nunha cidade asolada por unha epidemia zombi, e Mavrix by Matt Jones, un xogo multixogador de ciclismo de montaña en mundo aberto deseñado en colaboración co deportista Matt Jones. O 17 de xullo incorporaranse FixForce, un cooperativo de extracción no que varios robots deben reparar estruturas, e Fogpiercer, un roguelike de construción de barallas para PC.
O 21 de xullo será a quenda de dúas das incorporacións máis destacadas. The Planet Crafter propón transformar un planeta hostil nun mundo habitable mediante a recollida de recursos, a construción dunha base e a modificación progresiva do ecosistema, tanto en solitario como en cooperativo en liña.
Ese mesmo día chegará tamén Tony Hawk''s Pro Skater 1 + 2, recompilación que reúne as dúas primeiras entregas da popular saga de monopatín completamente refeitas en alta definición. A colección recupera os patinadores profesionais, os escenarios e as manobras clásicas, ademais de incorporar contido adicional.

Call of Duty: Modern Warfare III destaca entre os novos xogos de PS Plus

Redacción — 2026-07-07T21:29:00Z

Os subscritores de PlayStation Plus poden reclamar desde este 7 de xullo e ata o vindeiro 3 de agosto os tres xogos mensuais incluídos na promoción de xullo: Call of Duty: Modern Warfare III, For the King II e CrossCode. A selección combina un shooter de grande orzamento, un RPG de fantasía con compoñente cooperativo e unha aventura de acción de estética retro.
Call of Duty: Modern Warfare III (PS5 e PS4) chega coa campaña que continúa os acontecementos de Modern Warfare II, na que o capitán Price e a Forza Operativa 141 deben deter ao ultranacionalista Vladimir Makarov. O paquete tamén incorpora un modo multixogador que recupera os 16 mapas orixinais de Modern Warfare 2 (2009) con melloras gráficas e novas mecánicas, ademais do modo Modern Warfare Zombies, que permite por primeira vez colaborar con outros equipos nun amplo mapa aberto cheo de zombis.
For the King II (PS5 e PS4) propón unha aventura de rol que mestura mecánicas de roguelite e xogos de mesa. A historia sitúa os xogadores no reino de Fahrul, onde a raíña Rosomon somete á poboación mentres establece alianzas con forzas malignas. O título permite xogar tanto en solitario como en cooperativo para ata catro participantes e incorpora un motor gráfico renovado con melloras nas mecánicas de xogo.
A terceira incorporación é CrossCode (PS5 e PS4), un xogo de rol de acción en dúas dimensións inspirado nos clásicos de 16 bits. O xogo combina exploración de alxubes, resolución de crebacabezas e un sistema de combate dinámico no marco dunha historia de ciencia ficción. A progresión baséase na obtención de equipamento e habilidades que permiten adaptar a estratexia de combate ás debilidades dos inimigos.

Nothing presenta un móbil económico

Marcus Fernández — 2026-07-07T21:17:00Z

O vindeiro día 17 chegará ao mercado europeo o novo Nothing Phone (4b), un smartphone de gama media dispoñible en tres cores distintas (azul, branco e negro), 8 GB de RAM e 128 GB de almacenamento que sorprende por chegar a un prezo de 329 euros, moi por debaixo do habitual nesta marca, que para móbiles económicos tiña a marca CMF, pero que a crise das memorias levounos a que este ano non vaia lanzar novos terminais desta liña (pois resulta inviable o lanzamento dun móbil que consideren digno a un prezo de 249-279 euros).
Este novo smartphone ten unhas características bastante modestas, acompañadas por un deseño rechamante e por funcionalidades propias da marca como un sistema de notificacións LED na parte traseira do dispositivo.
O Nothing Phone (4b) chegará cun procesador Qualcomm Snapdragon 6 Gen 4 (propio de móbiles de entrada); a súa cámara principal de 50 Mpíxeles con estabilización óptica está acompañado por un ultra grande angular e unha cámara frontal de 16 Mpíxeles; a súa pantalla super AMOLED de 6,77 polgadas ten resolución Full HD+ e unha frecuencia de refresco de ata 120 Hz; integra altofalantes estéreo; goza de conectividade Wi-Fi 6, Bluetooth 6.0 e NFC; e a súa batería de 5.200 mAh pode cargarse por cable a 33 watts (ofrecendo tamén carga inversa a 7,5 watts). Aínda que estamos ante un móbil cun prezo axustado, ten certificación IP64 fronte á auga e ao po.
Nothing promete que este smartphone recibirá 3 anos de actualizacións de Android e 6 anos de parches de seguridade.

Vídeo promocional do Nothing Phone (4b)

España impulsa unha coalición internacional para protexer a infancia fronte aos riscos da IA

Redacción — 2026-07-07T20:42:00Z

España presentou, xunto con preto dunha vintena de países e organizacións internacionais, a Coalición Internacional para os Dereitos e a Protección da Infancia na Era da Intelixencia Artificial, unha iniciativa constituída no seo das Nacións Unidas co obxectivo de garantir que o desenvolvemento e a despregadura da IA respecten a seguridade, o desenvolvemento saudable e os dereitos dos menores.
A iniciativa, promovida por España co apoio de Francia, Kenya e a Unión Europea, oficializouse durante o primeiro Diálogo das Nacións Unidas sobre a Gobernanza da Intelixencia Artificial, celebrado en Xenebra. Ademais de España, adheríronse á coalición Austria, Brasil, Bulgaria, Canadá, Chequia, Corea do Sur, O Salvador, Estonia, Francia, Indonesia, Italia, Xapón, Kenya, Luxemburgo, Marrocos e os Países Baixos. Tamén participan organismos internacionais como UNICEF, a UNESCO, a Oficina do Alto Comisionado das Nacións Unidas para os Dereitos Humanos, a Unión Internacional de Telecomunicacións, a Oficina das Nacións Unidas para as Tecnoloxías Dixitais e Emerxentes e a Comisión Europea.
O ministro para a Transformación Dixital e da Función Pública, Óscar López, mostrou a súa satisfacción pola ampla adhesión á proposta e advertiu dos riscos dunha evolución tecnolóxica sen garantías. «Non cometamos coa IA os mesmos erros que coas redes sociais. Os dereitos dos menores non poden desaparecer no mundo dixital. Cada día, nenos e adolescentes de todo o mundo acceden a sitios onde lles poden facer dano. É o noso deber protexelos. Algúns multimillonarios estiveron gañando moito diñeiro cos datos dos nosos nenos. Isto debe rematar. É hora de que sexan responsables», afirmou.
O documento fundacional da coalición recoñece que a rápida despregadura dos sistemas de IA está a transformar os espazos dixitais nos que os menores aprenden, se comunican e interactúan. Aínda que estas tecnoloxías ofrecen novas oportunidades, tamén incrementan riscos como a manipulación, a exposición a contidos prexudiciais, a creación de pornografía e material de abuso sexual infantil mediante deepfakes ou a segmentación algorítmica dos menores.
Os asinantes comprométense a promover sistemas de IA seguros, fiables e respectuosos cos dereitos da infancia, fomentar a cooperación entre administracións, organismos internacionais, empresas tecnolóxicas, sociedade civil e expertos, así como favorecer o intercambio de boas prácticas. Tamén apostan por garantir que a opinión dos menores se teña en conta no deseño, a despregadura e a gobernanza dos sistemas de intelixencia artificial que lles afectan, de acordo co seu dereito a seren escoitados.
Durante a súa intervención, Óscar López apoiouse nas conclusións do primeiro informe do Panel Científico da IA para lembrar que os menores están expostos a algoritmos manipuladores, noticias falsas, pornografía e ciberacoso. O ministro defendeu unha gobernanza da IA baseada en normas, seguridade desde o deseño, evidencia científica e supervisión humana, así como mecanismos eficaces de verificación da idade que preserven a privacidade.
Tamén repasou algunhas das medidas impulsadas por España neste ámbito, entre elas a promoción na Unión Europea da prohibición dos sistemas de IA destinados a xerar deepfakes sexuais sen consentimento e pornografía infantil, o desenvolvemento dunha ferramenta interoperable de verificación da idade a escala europea, a futura Carteira Dixital para acreditar a maioría de idade en Internet e a tramitación dunha lei que pretende impedir o acceso ás redes sociais aos menores de 16 anos, reforzar a transparencia dos algoritmos, protexer a saúde mental dos menores e esixir maiores responsabilidades aos directivos das grandes plataformas dixitais.

A Xunta destaca o papel da IA na modernización de Xustiza

Redacción — 2026-07-07T18:55:00Z

Antes da inauguración da XXVIII Escola de Verán do Poder Xudicial no Pazo de Mariñán, o conselleiro de Presidencia, Xustiza e Deportes, Diego Calvo, acompañado polo director xeral de Xustiza, José Tronchoni, asinou o convenio de colaboración co Consello Xeral do Poder Xudicial e a Deputación da Coruña para apoiar o desenvolvemento desta iniciativa.
Xa no acto inaugural, Diego Calvo destacou que a Escola de Verán se consolidou como un punto de encontro de referencia para membros da carreira xudicial de toda España, favorecendo a súa formación e o intercambio de coñecemento.
A edición deste ano está dedicada ao impacto da intelixencia artificial na Administración de Xustiza. O conselleiro subliñou a importancia de espazos como esta Escola para que os profesionais poidan analizar e debater tanto as oportunidades como os desafíos que supón a incorporación desta tecnoloxía á actividade xudicial.
Neste sentido, apuntou que a intelixencia artificial pode contribuír a optimizar a xestión da información, automatizar determinadas tarefas e facilitar o labor dos profesionais, aínda que advertiu da necesidade de garantir en todo momento a protección dos dereitos fundamentais. Tamén lembrou que a Xunta dispón dun Plan de medidas de mellora da ciberseguridade no ámbito xudicial, co que se reforzou a protección dos equipos informáticos empregados polos profesionais e se impulsaron accións formativas para previr ameazas dixitais.
Calvo incidiu ademais no compromiso da Xunta coa modernización da Administración de Xustiza mediante a incorporación de novas tecnoloxías. Nesa liña, lembrou que o Goberno galego aprobou o Plan Senda 2028, dotado con 24,4 millóns de euros (dos que 6,9 millóns proceden de fondos europeos Feder), co propósito de mellorar os servizos dixitais da xustiza e avanzar cara a un sistema máis eficaz e accesible. O plan sitúa a intelixencia artificial como un dos seus eixes e pretende adaptar a xustiza dixital galega ao novo marco legal definido pola Lei orgánica 1/2025 de medidas en materia de eficiencia do servizo público de xustiza.
Sobre a implantación desta normativa estatal en Galicia, o conselleiro sinalou que supón unha transformación organizativa de grande complexidade, ao substituír unha estrutura vixente desde o século XIX. No caso galego, a reforma afectou aos 45 partidos xudiciais e implicou a reorganización de máis de 3.000 funcionarios da Administración de Xustiza.

O Goberno impulsa unha nova lei para reforzar o control sobre a imaxe persoal na era dixital

Redacción — 2026-07-07T18:38:00Z

O Consello de Ministros aprobou o proxecto de Lei Orgánica de protección civil dos dereitos á honra, á intimidade persoal e familiar e á propia imaxe, unha norma que substituirá a lexislación vixente desde 1982 co obxectivo de adaptala ao ámbito dixital e ofrecer unha maior protección fronte aos novos riscos derivados da difusión de contidos en Internet e do uso da intelixencia artificial.
O texto inicia agora a súa tramitación parlamentaria no Congreso dos Deputados tras incorporar as observacións recibidas durante o período de información pública e as achegas de organismos como o Consello Xeral do Poder Xudicial, o Consello Fiscal, o Consello de Consumidores e Usuarios e a Axencia Española de Protección de Datos.
Un dos cambios máis destacados consiste en considerar, por primeira vez, unha intromisión ilexítima o uso da voz ou da imaxe dunha persoa sen autorización con fins publicitarios ou comerciais mediante intelixencia artificial ou outras tecnoloxías semellantes, como os deepfakes. A norma tamén prevé a adopción de medidas para evitar que a difusión de contidos lesivos continúe nos servizos dixitais.
O proxecto aclara ademais que o feito de publicar fotografías ou vídeos nas redes sociais non implica que terceiros poidan reutilizalos libremente noutras plataformas ou canles de difusión. A valoración do consentimento terá en conta a finalidade para a que foi concedido, o contexto no que se produciu, o ámbito de difusión previsto e as expectativas razoables da persoa afectada.
A protección das vítimas de delitos tamén se reforza ao considerar unha intromisión ilexítima calquera utilización dos feitos delituosos por parte do autor que poida causarlles un novo prexuízo, xa sexa co propósito de danalas ou de obter un beneficio económico. Esta previsión abrangue, entre outros casos, determinadas producións do xénero coñecido como true crime.
Os menores verán ampliadas as garantías previstas na lei. A idade mínima para prestar consentimento sobre o uso da propia imaxe fíxase nos 16 anos e establécese que, mesmo existindo autorización, haberá intromisión ilexítima se se menoscaba a súa honra. Ademais, será obrigatoria a intervención do Ministerio Fiscal nos procedementos nos que a persoa prexudicada sexa menor de 18 anos.
A iniciativa amplía tamén a protección das persoas falecidas ao permitir que poidan prohibir mediante testamento, ou a través dunha persoa designada para ese fin, o uso da súa imaxe ou da súa voz con fins comerciais ou similares.
A norma mantén as excepcións xa recollidas pola lexislación de 1982 e pola xurisprudencia, como as actuacións autorizadas pola autoridade competente ou a difusión de comunicacións privadas cando o seu contido teña interese informativo pola materia tratada ou polas persoas implicadas.
Como novidade, introdúcese unha excepción específica para o uso de intelixencia artificial cando afecte a persoas con proxección pública. Nestes casos, preservarase a liberdade de expresión sempre que a tecnoloxía se empregue con fins creativos, satíricos ou de ficción e se informe de forma expresa de que se utilizou este tipo de ferramentas.
O proxecto regula ademais, por primeira vez, os criterios que deberán empregarse para determinar a gravidade do dano moral causado por unha intromisión, entre eles a reincidencia, a vulneración dun ou varios dereitos fundamentais, a gravidade das expresións utilizadas, a repercusión social e o beneficio obtido polo responsable. A indemnización resultante non poderá ter carácter simbólico.
Xunto á publicación da sentenza condenatoria, que deberá realizarse a cargo do condenado e cunha difusión equivalente á da intromisión, tamén se incorpora a posibilidade de solicitar a súa publicación no Boletín Oficial del Estado.

A división de Samsung responsable da fabricación de memorias prevé beneficios históricos

Redacción — 2026-07-07T17:57:19Z

Samsung Electronics prevé rexistrar este ano uns resultados históricos grazas ao forte impulso da demanda de semicondutores para intelixencia artificial. As declaracións dun dos principais directivos da división de chips reforzaron as previsións do mercado, que tamén apuntan a un trimestre de récord tanto para Samsung como para SK Hynix.
Kim Yong-kwan, presidente e responsable de xestión corporativa, estratexia e operacións da división Device Solutions (DS), asegurou durante unha reunión interna celebrada a pasada semana que o beneficio operativo deste exercicio debería situarse en liña co consenso do mercado. Segundo fontes do sector citadas pola prensa surcoreana, o directivo destacou que o beneficio anual previsto superará o acumulado obtido pola empresa nos máis de corenta anos transcorridos desde a súa entrada no negocio dos semicondutores.
As estimacións dos analistas sitúan o beneficio operativo anual de Samsung arredor dos 300 billóns de wons (uns 187.000 millóns de euros). Kim tamén subliñou a sólida xeración de caixa da empresa e avanzou que continuará incrementando os investimentos, que xa superan os 40 billóns de wons anuais (52.700 millóns de euros), para responder á crecente demanda de chips destinados á intelixencia artificial.
As previsións tamén apuntan a que Samsung podería marcar un novo récord trimestral (estimado en 84,6 billóns de wons, o que serían uns 52.700 millóns de euros) no segundo trimestre. De confirmarse esta cifra cando publique os seus resultados preliminares, superaría o beneficio operativo trimestral de 53.540 millóns de dólares rexistrado por nVIDIA no seu primeiro trimestre fiscal, converténdose no maior beneficio operativo trimestral obtido ata agora por unha empresa tecnolóxica.
SK Hynix tamén se prepara para presentar uns resultados moi sólidos. A compañía publicará as súas contas o vindeiro 29 de xullo e espérase que alcance un beneficio operativo de 64,44 billóns de wons (40.100 millóns de euros). Se ambas empresas cumpren as expectativas, o beneficio operativo combinado aproximarase aos 149 billóns de wons (92.800 millóns de euros) nun único trimestre, un nivel sen precedentes para os dous fabricantes surcoreanos.
Con todo, parte dos analistas consideran que o mercado esixirá resultados que superen amplamente as previsións, ante o temor de que o ciclo alcista das memorias poida estar preto do seu teito. Durante esta campaña de resultados prestarase especial atención á duración dos contratos de subministración de memoria a longo prazo e á evolución dos prezos despois do terceiro trimestre.
Os investidores tamén seguen de preto a próxima estrea de SK Hynix no mercado estadounidense mediante a cotización de certificados ADR. HSBC elevou recentemente o seu prezo obxectivo para a compañía desde 2,9 ata 4 millóns de wons por acción, argumentando que a operación mellorará o acceso dos investidores internacionais ao valor e reforzará as iniciativas favorables aos accionistas.

Licitado o equipamento do Centro Galego de Artes Dixitais con financiamento da UE

S. P. — 2026-07-07T16:58:00Z

A Xunta anunciou este 7 de xullo a licitación da contratación do equipamento tecnolóxico do futuro Centro de Artes Dixitais de Galicia na Cidade da Cultura. Cun investimento máximo de 2,6 millóns de euros, este proxecto conta con financiamento da Unión Europea a través de 1,5 millóns de euros procedentes de fondos FEDER. A infraestrutura encara así a súa recta final no Gaiás, co obxectivo de que abra as súas portas ao público no segundo semestre do Xacobeo 2027.
Dende a Xunta engadiron que a obtención de investimento comunitario para a adquisición deste equipamento foi unha realidade “grazas á colaboración entre a Axencia para a Modernización Tecnolóxica de Galicia (AMTEGA) e a Fundación Cidade da Cultura. Deste xeito, o financiamento europeo cubrirá o 60% do proxecto, reducíndose significativamente a achega da Xunta, que queda rebaixada a 1 millón de euros”.
A través desta contratación, dotarase o centro con tecnoloxía punteira no eido das experiencias inmersivas e de realidade virtual e aumentada, así como instalacións audiovisuais de última xeración. Inclúese, por exemplo, unha gran pantalla perimetral de 75 metros de longo; ou a dotación dunha sala con sistemas de proxección envolvente e son inmersivo, que permitan activar ademais outras sensacións, ou vibración a través de chalecos hápticos.
“Trátase dun amplo abano de tecnoloxías dixitais que permitirán ofrecer ao público galego experiencias inmersivas de primeiro nivel e converter o centro nun novo atractivo turístico, pero tamén operar como un catalizador que impulse a innovación cultural e a creación contemporánea”, engadiu a Xunta, sinalando que o Centro Galego de Artes Dixitais representa a primeira e única infraestrutura desta natureza coa que contará Galicia, “situando así a nosa Comunidade nunha posición de liderado no eido da creación dixital en España”. Para a súa materialización non foi necesaria a construción dun edificio novo xa que a Xunta adaptou un espazo xa existente e en desuso na Cidade da Cultura, os aparcadoiros subterráneos do que inicialmente ía ser o Teatro da Música (un dos edificios non rematados do proxecto orixinal do Gaiás).
En decembro rematáronse os traballos de adecuación do espazo e actualmente estanse a levar a cabo as derradeiras actuacións para finalizar a cuberta e o acondicionamento exterior, asegurando unha integración coa arquitectura singular do complexo.

Nova plataforma audiovisual de balde: Squirrel+

Marcus Fernández — 2026-07-07T16:19:00Z

Actualmente na grella da TDT tempos dúas canles en aberto baixo a marca Squirrel, que agora se expande na forma dunha plataforma de vídeo baixo demanda chamada Squirrel+ dende a que pretenden ofrecer cine, animación, motor e deportes, totalmente de balde e sen esixir rexistro.
A nova plataforma xa está operativa, aínda que polo momento con poucos contidos e cunha estética que pode resultar moi familiar (semella que empregan a solución Galgo da valenciana Tyris, popular entre as plataformas OTT das televisión autonómicas españolas).
Actualmente Squirrel+ achega películas como Universal Soldier: Regeneration, Bunraku, Baaria, Ataque Terrorista, Teniente Corrupto e Un Trabajo Embarazoso, anticipando que máis adiante contará tamén con Lee Miller, Frankie y los Monstruos, Cleaner: Rescate Vertical, Hellboy: El Hombre Retorcido, Movida Celestial e Buena Suere, Pásalo Bien, No Mueras; para a cativada conta coa serie de animación Agent 203; e integra contidos deportivos como Canal Motor con resumos e directos de competicións europeas e asiáticas da GTWC, a tempada 8 do magazine semanal Conexión Surfing, coberturas de numerosas carreiras e competicións (como a Spartan Race) e mesmo competicións de vela.
Conforma así unha oferta audiovisual complementaria á que podemos atopar outras plataformas tradicionais e en liña, que podemos consumir directamente dende a pantalla do ordenador coa opción de poder proxectar os contidos a pantallas de maior tamaño mediante a tecnoloxía Google Cast.

A Cátedra Inditex-UDC impulsa tres programas de formación en IA verde

S. P. — 2026-07-07T15:10:00Z


Exterior do edificio do CITIC no Campus de Elviña na Coruña (UDC)

A Cátedra Inditex-UDC de IA en Algoritmos Verdes abriu o prazo de preinscrición da nova edición do seu programa formativo, integrado por un Curso de Experto en IA e Algoritmos Verdes e dúas microcredenciais universitarias centradas no deseño, a implementación e as aplicacións prácticas de algoritmos verdes para a intelixencia artificial.
Segundo informou o CITIC da UDC, a iniciativa ofrece unha formación especializada nun dos ámbitos con maior proxección dentro do sector tecnolóxico, onde a crecente implantación da intelixencia artificial está impulsando a demanda de profesionais capaces de desenvolver modelos máis eficientes desde o punto de vista computacional e enerxético, contribuíndo así a unha IA máis sustentábel.
A oferta está dirixida tanto a estudantes e titulados que desexen orientar a súa carreira cara a un eido con amplas oportunidades laborais como a profesionais que busquen actualizar as súas competencias e incorporar coñecementos sobre sustentabilidade e eficiencia no desenvolvemento de solucións baseadas en intelixencia artificial.
Cun enfoque eminentemente práctico, o programa aborda contidos relacionados coa aprendizaxe automática eficiente, o deseño respectuoso co medio de modelos de IA, a análise de datos, o procesamento da linguaxe natural, a visión por computador e as aplicacións da IA verde na Industria 4.0 e 5.0.
A nova edición inclúe tres accións formativas:
-Curso de Experto en IA e Algoritmos Verdes, de 25 créditos ECTS, que se impartirá entre outubro de 2026 e febreiro de 2027 en modalidade presencial no CITIC da UDC.
-Microcredencial Algoritmos Verdes para a IA: Aplicacións Prácticas, tamén de 6 créditos, que se desenvolverá entre novembro e decembro de 2026 en modalidade virtual.
-Microcredencial Algoritmos Verdes para a IA: Deseño e Implementación, de 6 créditos ECTS, que se vai celebrar entre setembro e outubro de 2026 en modalidade híbrida.
O prazo de preinscrición permanecerá aberto ata o 10 de xullo para o Curso de Experto e a microcredencial Aplicacións Prácticas, e ata o 15 de xullo para a microcredencial Deseño e Implementación.
Con esta nova edición, a Cátedra Inditex-UDC reforza o seu compromiso coa formación de profesionais capaces de liderar o desenvolvemento de tecnoloxías de intelixencia artificial máis eficientes e sustentábeis, contribuíndo á transición cara a un modelo tecnolóxico máis consciente e aliñado cos retos ambientais e industriais actuais.
Toda a información sobre a inscrición, programa e matrícula está dispoñíbel na páxina web da Cátedra INDITEX-UDC de IA en Algoritmos Verdes.

César Fieiras avalía nun libro a fonda transformación sufrida polo ecosistema mediático trala irrupción da IA

S. P. — 2026-07-07T14:42:00Z

O investigador lucense do grupo Novos Medios César Fieiras Ceide vén de publicar o libro IA, innovación y medios. 150 entrevistas para comprender el cambio, editado por Tirant Humanidades e dispoñíbel en acceso aberto a través do repositorio Minerva. A publicación sostén que “a innovación é xa un elemento esencial para a supervivencia e competitividade dos medios de comunicación”.
A obra analiza como a innovación, a intelixencia artificial e a experiencia de usuario están a reconfigurar o ecosistema mediático a partir dun traballo de campo desenvolvido entre 2019 e 2025, no que o autor realizou máis de 150 entrevistas con profesionais de medios de comunicación de máis de trinta países, corpus principal sobre o que se constrúe o volume.
O libro conta cun prólogo de Charlie Beckett, profesor de Xornalismo no Departamento de Medios e Comunicacións da London School of Economics and Political Science (LSE) e director do proxecto Polis JournalismAI.
A partir destas voces, o traballo ofrece unha lectura comparada e aplicada sobre os cambios que atravesan as organizacións mediáticas e sobre as decisións coas que están a construír a súa versión futura. O traballo inclúe persoas vinculadas á dirección editorial, á innovación, á estratexia, ao produto, á tecnoloxía, aos datos e ao traballo diario das redaccións.
A investigación identifica seis grandes eixos de innovación que están a redefinir o sector: a reorganización interna das redaccións, a transformación dos produtos informativos, a automatización de procesos mediante IA, o desenvolvemento de plataformas propias, a reconexión coas audiencias novas e a exploración de novas narrativas inmersivas.
Ao longo de 16 capítulos, a obra examina como a intelixencia artificial está a modificar as rutinas profesionais, os modelos de gobernanza, a relación coas audiencias e a experiencia do usuario, á vez que aborda os desafíos éticos, regulamentarios e editoriais derivados da súa aplicación práctica.
O autor sostén que “a IA non substituirá o valor diferencial do xornalismo, senón que obrigará a redefinilo”. E engade: “Nunha contorna cada vez máis automatizada, a credibilidade, o criterio editorial, a supervisión humana e a capacidade de xerar confianza emerxen como activos estratéxicos para os medios”.
A publicación traslada a “un formato narrativo e con vocación de transferencia” parte do percorrido investigador desenvolvido polo autor nos últimos anos, recollido previamente na súa tese doutoral e en máis de 100 contribucións académicas, entre artigos científicos, capítulos de libro e participacións en congresos.
O obxectivo, sinala o autor, “é achegar este coñecemento a profesionais do sector, alumnado de Comunicación e persoas interesadas nas transformacións actuais dos medios, mantendo o rigor académico e unha orientación aplicada”.
O traballo enmárcase nas liñas de investigación do proxecto OpenPSM (PID2024-160337OB-I00 - Medios de comunicación públicos abertos na era a Intelixencia artificial: valor público, sociedade inclusiva e innovación ecosistémica), financiado polo Ministerio de Ciencia e Innovación, a Axencia Estatal de Investigación (AEI) e os fondos FEDER da Unión Europea. Ademais, intégrase nas actividades do grupo de investigación Novos Medios, da Facultade de Ciencias da Comunicación da Universidade de Santiago de Compostela sobre innovación, intelixencia artificial, transformación dixital, medios de servizo público, experiencia de usuario e evolución dos modelos profesionais e organizativos do xornalismo.
César Fieiras Ceide é doutor en Comunicación (cum laude) pola Universidade de Santiago de Compostela, onde exerce como docente e investigador. O seu traballo céntrase na análise das propostas de innovación, a repercusión transversal da intelixencia artificial, e a importancia crecente da experiencia de usuario nos medios de comunicación. Investiga como a tecnoloxía está a redefinir o papel estratéxico das organizacións mediáticas nun ecosistema cambiante e como integran a IA para crear servizos de valor engadido, optimizar a relación coas audiencias e reposicionarse na economía da atención. Acumula máis de 100 contribucións entre revistas científicas, volumes colectivos de referencia e a participación nos principais congresos internacionais da área, articulando rigor metodolóxico e unha perspectiva aplicada orientada a comprender a transformación real dos medios e a posíbel débeda cognitiva que xerará a IA sobre os xornalistas.

A Business Factory Food selecciona 16 proxectos innovadores para a súa VIII edición

S. P. — 2026-07-07T14:01:00Z

A iniciativa Business Factory Food (BFFood), a aceleradora especializada do sector agroalimentario promovida pola Xunta de Galicia e impulsada polo Clúster Alimentario de Galicia (CLUSAGA), xa ten definidos os proxectos que formarán parte das fases de aceleración e consolidación da súa VIII edición.
Trala celebración do PitchDay, o pasado 2 de xullo no Edificio Fontán da Cidade da Cultura de Galicia, o comité de selección escolleu 10 startups para incorporarse ao programa de aceleración e 6 proxectos para o programa de consolidación, entre as 21 iniciativas que presentaron as súas solucións innovadoras para responder aos principais retos da industria alimentaria.
A xornada foi inaugurada por Roberto C. Alonso Ferro, director de CLUSAGA, quen puxo en valor o nivel das candidaturas presentadas; acompañado por Patricia López Quintiá, subdirectora de Innovación Empresarial do IGAPE, quen destacou a traxectoria da Business Factory Food, que xa impulsou 87 proxectos emprendedores, moitos deles convertidos hoxe en empresas que xeran emprego, innovación e valor engadido en Galicia.
As novas firmas innovadoras seleccionadas para a fase de aceleración desenvolverán solución orientadas á dixitalización, sustentabilidade, novos produtos, automatización, rastrexabilidade e innovación de procesos no sector agroalimentario.
Os proxectos seleccionados son:
-BIOSentinel (España): sistema de monitoraxe en tempo real da carga bacteriana en granxas mediante biosensores ópticos e intelixencia artificial para previr patóxenos.
-Fluenzia (Galicia): plataforma modular de automatización intelixente para facilitar a robotización das pemes da industria alimentaria.
-Ostras (Galicia): plataforma de crowdsourcing para rescatar alimentos próximos a caducar mediante unha aplicación móbil con intelixencia artificial.
-Kresko RNAtech (Arxentina): desenvolvemento de ingredientes funcionais baseados en ARN bioactivo para a próxima xeración de alimentos funcionais.
-Agrosintex (Arxentina): aditivo alimenticio para gando bovino que reduce emisións de metano nun 95%.
-TutorIA – Galifritas (Galicia): centro de emprego tecnolóxico inclusivo con IA para produción de snacks.
-BioRefQui (Chile): sistema de extracción para recuperar compostos de alto valor de residuos agroindustriais.
-Hermia – Infood Protein (Chile): biorrefinería circular que transforma residuos agroindustriais usando insectos.
-Thales (Turquía): tecnoloxía de atomización patentada para a hixienización sostíbel da industria láctea que reduce o consumo de auga nun 90%.
-Chocolates by Peruxiñas (Galicia): liña de chocolate Bean to Bar sen aditivos químicos.
Ademais, quedaron na listaxe de reserva os proxectos: Neurociencia Luyef (Chile), Galaxy Pack SAS (Colombia) e NanoBioFood (Colombia).
Na fase de consolidación incorporaranse seis empresas cun maior grao de madurez empresarial, que recibirán apoio para acelerar o seu crecemento e expansión comercial.
Os proxectos seleccionados son:
-ComexSoft: plataforma SaaS de intelixencia de mercado que transforma datos do sector alimentario en información estratéxica para mellorar a innovación, os prezos e a comercialización.
-Diversa Natural Functional Platform: plataforma tecnolóxica que desenvolve nanosistemas lipídicos para mellorar a estabilidade e aplicación de ingredientes naturais en alimentación funcional e nutracéutica.
-Gloop: desenvolve cubertos comestíbeis sustentábeis como alternativa aos plásticos dun só uso na canle HORECA (Hoteis, Restaurantes e Cafeterías), reducindo residuos e fomentando a economía circular.
-Fuxe Fuxe: xeles de nutrición deportiva elaborados con ingredientes naturais e superalimentos, cunha proposta baseada en rendemento e unha identidade galega e orientados a deportistas.
-Aguas Lérez: marca galega de auga mineral con gas orientada á restauración premium que destaca pola súa baixa mineralización e enfoque sostíbel.
AWÁ Nutrition: desenvolve suplementos de nutrición deportiva e funcional de orixe vexetal a partir de ingredientes da biodiversidade andina e amazónica.
Segundo CLUSAGA, a VIII edición da Business Factory Food “confirma a crecente proxección internacional do programa”. Entre os proxectos seleccionados figuran startups procedentes de España, Arxentina, Chile, Turquía e Ecuador, favorecendo a transferencia de coñecemento e a conexión co ecosistema agroalimentario galego.
Os equipos traballarán da man dun amplo ecosistema de innovación integrado por empresas tractoras, con mentores pertencentes a CLUN, CONGALSA, El Nogal, Casa Grande de Xanceda, Vegalsa, Hijos de Rivera, Valora Marine Ingredients, Bodegas Casa Montepío e Nueva Pescanova.

O sábado celébrase a cuarta edición da feira de videoxogos Rianxo Gaming

S. P. — 2026-07-07T12:08:00Z

O vindeiro sábado volve un dos grandes eventos informáticos da tempada na contorna da costa galega: a feira Rianxo Gaming, que chega á súa cuarta edición achegando na praza de Castelao (Campo de Arriba) da vila rianxeira unha completa xornada de lecer, creatividade e formación gamer (durante todo o día). O evento, de acceso totalmente gratuíto, estenderase desde as 11:00 ata as 22:30 horas.
O programa vén con múltiples actividades para seareiros dos videoxogos ou para visitantes en xeral: xogo libre, mostra de xogos retro, arcades, tendas, xantar, música e unha ampla variedade de torneos. Agárdase contar cunha importante afluencia de público.
O evento está promovido polo Concello de Rianxo e a produción técnica é de Lúa Gaming, a empresa galega de deportes en liña e eventos.
Programa do sábado 11 de xullo
11:00 h – Apertura oficial de portas.
11:30 h – Torneo de Rocket League.
12:30 h – Torneos retro de Tekken 4 e Call of Duty: Black Ops II.
13:00 h – Podcast en directo co equipo de Recuncho Gamer.
16:00 h – Torneo de Mario Kart.
16:30 h – Torneos retro de Pokémon Stadium e Dragon Ball Z: Budokai Tenkaichi III.
17:00 h – Torneo de Brawl Stars.
18:00 h – Torneo de EA Sports FC 26.
20:30 h – Entrega de premios comentada por Tai Beatbox.
21:30 h – Concerto de peche a cargo de Akawave.
Zonas Temáticas permanentes
Áreas de Xogo: Zona Retro, Arcade, PC Gaming e Arena de Realidade Virtual (VR).
Tecnoloxía e Drons. Demostracións e voos interactivos coa Galicia Whoop League.
Zona Indie. Presentación de proxectos de estudios galegos como Golpes e Broucadas, Pis-to-le-ro e Fraga.
Lecer Alternativo. Espazo de xogos de mesa e tendas.

Novos auriculares sen fíos de Nothing con cancelación de ruído adaptativa

Redacción — 2026-07-07T11:57:07Z

Nothing ampliou a súa gama de auriculares sen fíos coa chegada dos Nothing Ear (3a), un modelo que aposta por un transdutor dinámico de 12 mm, cancelación activa de ruído adaptativa de ata 45 dB e certificación Hi-Res Wireless con compatibilidade co códec LDAC. Os auriculares teñen un prezo de 99 euros.
Cada auricular integra tres micrófonos MEMS (seis en total) que, xunto cun algoritmo ENC para a redución do ruído ambiental durante as chamadas, buscan mellorar a captación da voz. Tamén incorpora modo Transparencia.
A autonomía chega ata as 10 horas de reprodución por carga empregando o codec AAC coa cancelación de ruído desactivada, ou ata 42 horas combinando os auriculares co estoxo de carga. Co codec LDAC, a duración redúcese ata 6 horas sen ANC e 4,5 horas con ANC. A carga realízase mediante USB-C e require aproximadamente 70 minutos para completar a batería. A carga rápida permite obter ata unha hora de reprodución con só cinco minutos de carga dos auriculares ou ata dez horas de uso combinando auriculares e estoxo tras dez minutos conectados.
Os Nothing Ear (3a) empregan Bluetooth 6.0, ofrecen conexión dual para dous dispositivos simultaneamente e son compatibles con Android 8.0 ou superior e iOS 13 ou posterior. Admiten os codecs SBC, AAC e LDAC, ademais de Google Fast Pair e Microsoft Swift Pair para simplificar o emparellamento.
Entre as funcións adicionais destacan o modo de baixa latencia, a certificación IP54 de resistencia á auga e ao po tanto nos auriculares como no estoxo, e a posibilidade de iniciar a gravación de chamadas ou realizar capturas de audio mediante combinacións de xestos configurables.

Detectan portas traseiras en routers da marca Tenda

Redacción — 2026-07-07T10:55:00Z

Nos últimos anos fixéronse moi populares as solucións Wi-Fi mesh para solucionar os problemas de cobertura da Internet no fogar e, en tendas como Amazon, emerxeu un fabricante chinés con propostas moi atractivas pola súa relación calidade-prezo: Tenda.
Pero dende Centro de Coordinación do Equipo de Resposta de Emerxencias Informáticas do Instituto de Enxeñaría de Software da Universidade Carnegie Mellon veñen de proxectar unha sombra de dúbida sobre a marca chinesa, xa que detectaron varias versións do firmware de produtos da marca Tenda que contarían con portas traseiras (métodos non documentados para poder acceder aos routers como administrador).
No fallo de seguridade detectado existiría un contrasinal mestre, que non se correspondería a ningunha conta de usuario determinada, e que facilitaría o acceso como administrador dos routers da marca Tenda (concretamente aos modelos FH1201, W15, AC10, AC6 e AC5).
Queda por saber se estamos ante un fallo de seguridade accidental ou unha actuación maliciosa como denuncian reiteradamente dende EE.UU. ao recear dos dispositivos de fabricación chinesa.

R e MasOrange completan a despregadura do plan UNICO 5G Rural

Redacción — 2026-07-07T10:30:00Z

R e MasOrange completaron a implantación da cobertura móbil 5G nos 245 concellos galegos de menos de 10.000 habitantes incluídos no programa UNICO 5G Redes Activas. A infraestrutura prevista xa está construída ou activada na súa totalidade, un avance que permitirá ofrecer unha cobertura 5G case total en Galicia antes de que remate o ano, segundo as previsións do operador.
O proxecto permite que fogares e empresas de zonas rurais ou de difícil acceso dispoñan de conectividade 5G SA, unha tecnoloxía que ofrece menor latencia, maior estabilidade e mellores prestacións para servizos avanzados. A iniciativa desenvolveuse co apoio do programa UNICO 5G Redes Activas, financiado polos fondos europeos NextGenerationEU e xestionado polo Ministerio para a Transformación Dixital e da Función Pública no marco do Plan de Recuperación, Transformación e Resiliencia.
A actuación estendeu a cobertura 5G SA ao 80 % dos concellos galegos, nos que reside aproximadamente o 20 % da poboación da comunidade. A elevada dispersión demográfica converteu a extensión desta infraestrutura nun importante reto técnico.
Entre os municipios beneficiados atópanse Negueira de Muñiz, o concello menos poboado de Galicia, con 237 habitantes segundo o INE de 2025, así como A Teixeira (347 habitantes), Larouco (443), Pontedeva (467) e Ribeira de Piquín (492). En total, o programa abrangue 245 municipios galegos.
A maiores deste plan, R asegura que continúa ampliando a súa cobertura móbil mediante outras actuacións dirixidas a núcleos especialmente illados, incluídas aldeas e parroquias con moi poucos habitantes, co obxectivo de reducir a fenda dixital e facilitar o acceso aos servizos dixitais en igualdade de condicións coas áreas urbanas.
O director de R e responsable territorial de MasOrange en Galicia, Alfredo Ramos, afirmou que «falarmos de 5G UNICO Rural é falarmos de igualdade de oportunidades, a base para que calquera persoa en Galicia poida formarse, traballar e emprender dende o rural en condicións similares ás das cidades». Tamén destacou que a aposta da compañía pretende poñer a tecnoloxía «ao servizo das persoas, do campo, da industria agroalimentaria e da sostibilidade», favorecendo que o talento poida permanecer ou regresar ao rural.
Durante 2026 tamén se incorporaron novas solucións para mellorar a cobertura no interior dos edificios. Entre elas figura cachocobertura R, un sistema baseado nunha femtocelda autoinstalable que permite ofrecer sinal móbil en vivendas e negocios onde, por características construtivas, a cobertura exterior resulta insuficiente. O operador tamén lembra a dispoñibilidade do servizo VoWiFi, que permite realizar chamadas a través da rede wifi cando a cobertura móbil é limitada.
R destaca igualmente a expansión do seu servizo Internet Rural, que emprega tecnoloxía 5G para proporcionar acceso de banda larga fixa en zonas sen cobertura de fibra óptica. A solución xa está dispoñible en preto de 300 concellos galegos e prevé chegar a arredor de 300.000 inmobles, con velocidades de ata 1 Gbps e conectividade Wi-Fi 6.

Mobify reivindica o seu alugueiro de longa duración fronte á escalada de prezos do verán

Redacción — 2026-07-07T09:59:02Z

Mobify asegura contar coa tarifa de alugueiro de longa duración máis económica de Galicia para este verán, cunha proposta que combina prezos fixos e entrega do vehículo no lugar que escolla o cliente. A empresa galega destaca especialmente o seu paquete de 60 días por 979 euros, o que equivale a 16,32 euros diarios durante os meses de xullo e agosto.
A compañía contrapón esta oferta á evolución habitual do mercado estival, marcado polo incremento da demanda e a subida das tarifas, especialmente nas oficinas situadas en aeroportos e estacións. Segundo os comparadores de prezos, os alugueiros no aeroporto de Santiago poden situarse en agosto ata un 50 % por riba da media anual, mentres que as asociacións do sector prevén a maior campaña da súa historia, coa incorporación de 92.800 vehículos ás frotas españolas entre maio e setembro.
A comparación realizada por Mobify sobre reservas efectuadas o 2 de xullo para dúas semanas de alugueiro en Ourense mostra diferenzas significativas entre a tarifa anunciada e o custo final cando se eliminan as franquías ou se engaden coberturas adicionais.
En Europcar, un utilitario anúnciase desde 27,12 euros ao día (379,65 euros en total), aínda que o cliente asume unha franquía de 2.783 euros por danos ou roubo. A eliminación desa franquía incrementa o prezo ata os 52,38 euros diarios, mentres que a modalidade con proteccións ampliadas alcanza os 64,07 euros ao día.
Avis ofrece un vehículo similar na estación intermodal de Ourense desde 610,25 euros por dúas semanas (43,59 euros diarios), cunha franquía de 1.365 euros tanto para danos como para roubo. A cobertura sen franquía eleva a factura ata os 943,85 euros (67,42 euros ao día), aos que se poden sumar servizos opcionais como asistencia en estrada, segundo condutor ou cadeira infantil.
Enterprise completa a comparativa cun alugueiro inicial de 656,88 euros para o mesmo período. Coas proteccións adicionais e a asistencia en estrada, o custo ascende ata os 1.216,75 euros, o que supón 86,91 euros diarios.
Segundo os datos recompilados por Mobify, as tarifas son aínda máis elevadas no aeroporto de Santiago e na estación da Coruña. Enterprise alcanza os 1.384,93 euros por dúas semanas en Santiago, mentres que na Coruña Enterprise sitúase en 1.197,09 euros, Europcar en 1.044,07 euros e Avis en 1.022,56 euros. A empresa tamén sinala recargas adicionais por servizos como condutores menores de 25 anos ou cadeiras infantís.
Fronte a estas cifras, Mobify comercializa un paquete de 15 días por 429 euros (28,60 euros diarios), con quilometraxe incluída, seguro básico, entrega e recollida sen custo adicional e unha pequena preautorización bancaria en lugar das habituais franquías elevadas.
O director executivo de Mobify, José Manuel Martínez, sostén que «cada verán lemos o mesmo: ringleiras nos mostradores, fianzas bloqueadas na tarxeta e prezos que se duplican en agosto. A nosa resposta é un coche a 16,32 euros ao día que ademais levamos á porta. A comodidade non ten por que ser un luxo».

Entrega do vehículo onde o precise o usuario

Mobify basea boa parte da súa proposta nun modelo de entrega programada. A reserva realízase mediante a aplicación móbil e o vehículo entrégase no domicilio, no lugar de traballo ou en estacións de tren e autobús das cidades onde opera, sen necesidade de acudir a unha oficina física.
A devolución tamén pode efectuarse noutra zona de servizo da compañía, permitindo, por exemplo, recoller un vehículo en Ourense e devolvelo na Coruña sen recarga adicional.
Martínez considera que o modelo tradicional está orientado principalmente aos aeroportos, mentres que en Galicia existen outras necesidades de mobilidade. «O rent-a-car clásico está pensado para o aeroporto. Galicia non funciona así: aquí o turista dorme nun hotel da Costa da Morte, o peregrino remata o Camiño no Obradoiro e o veciño necesita o coche no seu portal. Por iso invertemos a lóxica: que o coche chegue onde está a persoa, e non ao revés».
A empresa asegura manter tarifas fixas durante todo o verán: 49,90 euros por un día, 38 euros diarios nun alugueiro semanal, 28,60 euros por día en quincena, 24,63 euros por día durante un mes e 16,32 euros diarios no paquete de 60 días.
Tamén conserva as súas modalidades de vehículo compartido para desprazamentos curtos. XaRent ofrece paquetes desde 15 euros por catro horas con combustible incluído, mentres que Share aplica unha tarifa por quilómetro. A frota está formada por modelos de Fiat, Peugeot, MG, Toyota e BYD con distintivos ambientais ECO e CERO, e presta servizo en Santiago de Compostela, A Coruña, Ourense, Allariz, O Carballiño, Celanova e Ribadavia.

A mobilidade, un reto nun contexto de récord turístico

Mobify sitúa a súa proposta nun escenario de forte crecemento do turismo en Galicia. Segundo datos do INE e do Clúster Turismo de Galicia, a comunidade superou en 2024 os 8 millóns de visitantes e rexistrou 13,6 millóns de noitadas, mentres o gasto medio do turista internacional alcanza os 170 euros diarios.
A empresa sostén que unha parte importante do territorio galego continúa con escasa cobertura de transporte público, especialmente en destinos como a Costa da Morte, a Ribeira Sacra ou o interior da provincia de Ourense.
«Somos unha empresa galega e poñemos os nosos prezos ao servizo de que ninguén quede sen ver Galicia por non poder moverse. Mentres o mercado sobe en agosto, nós publicamos as nosas tarifas todo o ano e mantémolas», afirma Martínez.
Segundo a compañía, o seu paquete de longa duración tamén resulta máis competitivo que algunhas ofertas de operadores de vehículo compartido en Madrid, que publican alugueiros diarios entre 22,9 e 35,5 euros.
Martínez defende que o servizo non pretende substituír outros medios de transporte. «Non competimos co taxi, nin co autobús nin co tren: complementámolos. Quen chega a Galicia en AVE ou en avión necesita un último tramo, e ese tramo resolvémolo nós sen que ninguén teña que mercar un coche nin asumir os elevados custos do alugueiro tradicional durante agosto».

Os obradoiros Girl STEAM chegaron á Fonsagrada e á Caniza da man do CPETIG

S. P. — 2026-07-07T09:07:00Z

Este luns 6 de xullo as localidades da Fonsagrada (Lugo) e A Caniza (Pontevedra) acolleron unha nova xornada dupla dos obradoiros Girl STEAM, unha iniciativa organizada polo Colexio Profesional de Enxeñaría Técnica en Informática de Galicia (CPETIG) en colaboración coa Axencia para a Modernización Tecnolóxica de Galicia (AMTEGA) e a rede de aulas CeMIT.
Baixo o título Casa Domótica Accesible, o obradoiro propón un reto tan actual como divertido: deseñar unha casa respectuosa cos recursos naturais e eficiente. A través desta actividade práctica, a rapazada aprende a aplicar a tecnoloxía para crear espazos máis intelixentes, sustentábeis e libres de barreiras para todas as persoas.
O principal obxectivo do programa Girl STEAM é romper fendas de xénero e espertar vocacións tecnolóxicas temperás, promovendo un uso consciente, crítico e puramente creativo das ferramentas dixitais entre a mocidade galega, segundo informou o CPETIG.
Os obradoiros combinan actividades prácticas de robótica, creación audiovisual e programación creativa, fomentando valores e competencias clave para o desenvolvemento persoal e profesional da mocidade.
Este ano traballase co kit de placas Arduino e empregarase Mblock como contorna de programación.
No desenvolvemento dos obradoiros búscase trasladar mensaxes e elementos transversais como a igualdade, o sentido crítico ante a tecnoloxía, o uso creativo da tecnoloxía, máis aló do mero uso e consumo, a colaboración e o traballo en equipo e a importancia das artes como ferramenta de desenvolvemento.
As persoas interesadas en asistir a esta formación poden consultar as actividades programadas a través da páxina web da Rede CeMIT, na que poderán realizar a súa inscrición.
Os obradoiros Girl STEAM do CPETIG arrincaron en Betanzos e Pontevedra e a previsión é chegar esta tempada a unha vintena de concellos con 30 sesións prácticas e participativas.

O XVIII Criterium Aeronáutico contará con exposicións, videoxogos e simuladores gratuítos

S. P. — 2026-07-07T08:24:00Z

Miguel Fernández Méndez, responsábel de Formación e Economía na Deputación de Lugo, e máis Francisco Abelleira, presidente do Real Aeroclub de Lugo, presentaron este luns 6 de xullo a décimo oitava edición do Criterium Aeronáutico. Para a celebración deste evento, que terá lugar no Aeródromo de Rozas do 10 a 12 xullo, a institución provincial realiza unha achega económica de 10.000 euros.
Miguel Fernández recordou que esta cita “forma parte do calendario da nosa provincia e cada ano demostra a súa capacidade para atraer público, sorprender e seguir medrando”. Recalcou a capacidade de “achegar a aeronáutica á cidadanía, facela accesible e demostrar que detrás da tecnoloxía hai talento, formación, innovación e moitas persoas traballando para mellorar o noso futuro”.
E engadiu: “Rozas representa moi ben esa forma de entender a provincia. Un lugar que soubo evolucionar sen perder a súa identidade. Un espazo que proxecta Lugo cara o futuro e que nos sitúa como un territorio capaz de liderar iniciativas punteiras”, avanzou o Deputado Provincial.
Pola súa banda, o Presidente do Real Aeroclub de Lugo destacou que “este é un evento de referencia a nivel nacional e incluso internacional con visitantes chegados de diferentes puntos de Portugal”. Así mesmo, deu a coñecer algunhas das propostas que se inclúen na programación deste ano, na que “haberá todo tipo de exposicións aeronáuticas, un simulador de voo cedido polo Ciclo de Aeromecánica do CIFP As Mercedes; avións acrobáticos; voos de introdución en distintas aeronaves, ou un globo aerostático da Federación Aeronáutica Galega, entre outras actividades”.
Abelleira finalizou a súa intervención agradecendo a colaboración da institución provincial “sen o seu apoio sería moi complicado que puideramos organizar este evento, que esperamos siga medrando ano tras ano”.
O acceso a este evento aeronáutico é libre e gratuíto e o horario xeral da programación de actividades e das exposicións será de 10:00 a 14:00 e de 16:00 a 20:00 horas.
Durante a fin de semana reuniranse aeronaves, pilotos, afeccionados e visitantes de toda a Península nun dos encontros aeronáuticos máis destacados do país.
Ao longo das xornadas haberá actividades para todos os gustos, incluídas exposicións de vehículos áreos non tripulados (UAV-drons) e sistemas RPA (polas súas siglas en inglés Robotic Process Automation ou Automatización Robótica de Procesos), que é unha tecnoloxía de software que utiliza robots ou bots para automatizar tarefas dixitais, neste caso concreto relacionadas coa aeronáutica.
Tamén haberá exposicións aeronáuticas, voos, acrobacias, demostracións de globos e actividades para a rapazada. Nenos e maiores poderán tamén empregar simuladores de voo e videoxogos relacionados coa aeronáutica. Amais, contarase cunha visita de medios aéreos de Forzas e Corpos de Seguridade do Estado e de empresas aeronáuticas.
Máis información en Facebook e en Instagram.

As novas sedes da Deputación da Coruña en Ferrol e Santiago contarán con cadanseu centro de coworking

S. P. — 2026-07-07T08:11:59Z

A Deputación da Coruña vén de compartir os detalles dos seus proxector para contar con presenza de seu en Ferrol e máis en Santiago. En ámbolos casos achegaranse servizos a persoas emprendedoras para dar forma alí aos seus proxectos.
En Ferrol
No caso de Ferrol, vense de adxudicar o contrato para a adquisición do edificio que acollerá a súa nova sede institucional en Ferrol. O contrato foi adxudicado á empresa Nuvoo 21 S.L. por un importe de 930.000 euros. O inmóbel elixido é o antigo edificio de Banesto, situado no número 12 da rúa Rubalcava, na esquina coa rúa Magdalena, nun emprazamento céntrico do barrio da Magdalena.
O edificio conta cunha superficie total de 1.147 metros cadrados construídos e 964 metros cadrados útiles, distribuídos en planta semisoto, andar baixo, dous andares altos e baixo cuberta. Trátase dun edificio histórico, construído no ano 1950, que tradicionalmente acolleu oficinas dunha entidade bancaria en boa parte dos seus andares.
Coa adquisición deste edificio, a Deputación quere dar “un novo paso” para reforzar a súa presenza institucional en Ferrol e “achegar os servizos provinciais á cidadanía da cidade e da comarca”. A nova sede permitirá dispoñer dun espazo propio, moderno e funcional, no que se integrarán servizos administrativos e tributarios, así como novos usos vinculados á actividade económica, cultural e social.
A partir de agora, a Deputación iniciará os trámites necesarios para executar as obras de reforma interior do predio, co obxectivo de adaptalo ás necesidades da institución provincial e aos usos previstos. O proxecto permitirá acondicionar o edificio como sede institucional e contará ademais cunha oficina tributaria, espazo de coworking que se integrará na rede provincial, salas de reunións, auditorio e aula de formación, ademais de espazos para actividades públicas e usos institucionais.
A futura sede contará cunha área de recadación de arredor de 200 metros cadrados, con zona de espera, espazo de atención ao público e traballo, despacho independente para a xefatura de zona, almacén e arquivo, aseos con accesibilidade e dependencias auxiliares.
Como dixemos, tamén albergará un espazo de traballo colaborativo duns 100 metros cadrados, unha sala de reunións e un auditorio ou aula de formación con capacidade para arredor de 75 persoas.
En Santiago
En Santiago, a Deputación da Coruña adxudicou o contrato para a adquisición do inmóbel que acollerá a súa nova sede. Foi adxudicado á Cámara de Comercio de Santiago de Compostela por un importe de 850.000 euros. A nova sede estará situada no número 44 baixo da rúa San Pedro Mezonzo, no Ensanche compostelán, “nunha zona céntrica, con elevada actividade comercial e administrativa e moi próxima á estación intermodal Santiago de Compostela-Daniel Castelao, situada a uns 200 metros”, segundo destacou a Deputación, salientando tamén a existencia de paradas de transporte urbano no contorno inmediato, a máis próxima a 90 metros, así como a boa dispoñibilidade de aparcadoiros públicos nas proximidades.
O local conta cunha superficie rexistral de 835 metros cadrados e unha superficie catastral de 874 metros cadrados.
A partir de agora, a Deputación iniciará os trámites necesarios para executar as obras de acondicionamento e reforma interior d local, co obxectivo de adaptalo ás necesidades e aos usos previstos. A futura sede acollerá a oficina de recadación tributaria de Santiago, un espazo de traballo colaborativo ou coworking, sala de reunións, auditorio e aula de formación, ademais de dependencias institucionais para actos, encontros e presentacións.
A zona de recadación disporá de máis de 200 metros cadrados, con área de espera pública, espazo de atención e traballo con capacidade para 17 postos e despacho independente para a xefatura de zona. O inmóbel contará tamén con zona de arquivo e almacén, aseos con accesibilidade, sala de reunións de arredor de 39 metros cadrados, un auditorio e aula de formación de máis de 110 metros cadrados e un espazo institucional duns 90 metros cadrados.
O local ocupa integramente a planta baixa do edificio, ten acceso directo desde a rúa San Pedro Mezonzo e dispón xa dun itinerario sen barreiras arquitectónicas. A memoria sinala ademais que o local se atopa totalmente acondicionado, con fachada rematada, acabados interiores en bo estado e conexión ás redes de subministración de electricidade, auga para consumo, saneamento e telecomunicacións.
O presidente da Deputación, Valentín González Formoso, destacou que esta actuación forma parte da aposta do goberno provincial por "achegar a Deputación á cidadanía, ofrecer servizos útiles e abrir a institución á actividade económica, social e cultural".