#traduceTED premia a calidade do subtitulado en galego de vídeos científicos

O concurso #TEDSaúde, impulsado hai oito anos polo Servizo de Normalización Lingüística da USC para promover o subtitulado en galego de charlas e vídeos TED de ciencias da saúde, amplíase nesta nova edición e ábrese ao lexendado de vídeos TED de divulgación científica en calquera ámbito, cambiándolle o título a #traduceTED.
Para participar, hai que inscribirse no concurso entre o 15 de xullo e o 27 de setembro.
Pode presentarse ao concurso calquera persoa, nunha das dúas modalidades de participación: a modalidade A é a reservada para o alumando, PDI ou PAS da USC durante o ano 2024 e a modalidade B está aberta a persoas adultas alleas á USC.
Para participar compre subtitular ao galego cando menos unha charla ou vídeo TED de divulgación científica a través da plataforma que emprega TED.com e as persoas inscritas na modalidade A poderán participar ademais nun obradoiro de formación sobre o manexo da aplicación que se emprega para subtitular.
Os mellores traballos de subtitulado presentados en cada modalidade serán recoñecidos cun dos seguintes premios: na modalidade A o primeiro premio será de 300 euros, o segundo de 250 e o terceiro de 200, e todos eles ademais recibirán un diploma honorífico; na modalidade B o primeiro premio son 300 euros e o segundo son 250 euros e os dous recibirán ademais diploma honorífico.
O prazo de entrega dos subtítulos remata o 31 de outubro. Un xurado valorará os traballos de lexendado presentados ao concurso e elixirá os merecentes de premio en cada modalidade, tendo en conta os criterios explicitados na convocatoria.