xAI merca X

Parte do equipo de xAI

Elon Musk anunciou por sorpresa que a súa compañía xAI vén de adquirir X nunha operación en accións na que se valora a xAI en 80 mil millóns de dólares e a X en 33 mil millóns de dólares (cantidade de restar unha débeda de 12 mil millóns de dólares á valoración de 45 mil millóns de dólares inicial).
Esta operación non debería supor ningún cambio na práctica, máis aló dunha operación de maquillaxe que camufle os malísimos resultados económicos de X baixo o paraugas de xAI, compañía de intelixencia artificial fundada hai un par de anos, e que dado que é un sector en emerxencia non ten problema en captar financiamento externo.
Musk asegura que co movemento empresarial pode agora, de xeito oficial, combinar datos, modelos, computación, distribución e talento de ambas compañías, aínda que non está nada claro se realmente estamos ante unha promesa sen contido, pois non podemos esquecer que, por exemplo, no ámbito da Unión Europea non é legal que os contidos xerados polos usuarios poidan empregarse para adestrar sistemas de IA sen o seu consentimento expreso, polo que a vantaxe que podería ter xAI ao contar cos usuarios de X é bastante discutible.
Tamén son discutibles os datos de uso de X que sostén Musk, pois cando fala de 600 millóns de usuarios activos, non estaría a empregar as métricas habituais do sector, pois o número real de usuarios activos ao mes estimadas por outras fontes sería de menos da metade, dando a entender que as valoracións realizadas nesta última operación están realizadas para mitigar os malos resultados de X a nivel económico.