xAI podería estar a queimar mil millóns de dólares ao mes

Bloomberg asegura que a compañía de intelixencia artificial de Elon Musk, xAI, está a gastar preto de mil millóns de dólares mensuais no desenvolvemento dos seus modelos avanzados de IA, moi por riba dos ingresos actuais, segundo fontes coñecedoras das contas da empresa. O ritmo de gasto pon de relevo as esixencias financeiras sen precedentes do sector da IA, especialmente para xAI, que está a ter dificultades para xerar ingresos á mesma velocidade que os seus competidores.
Para cubrir ese enorme déficit, a empresa está en proceso de captar 9.300 millóns de dólares entre débeda e capital. Segundo os termos compartidos cos investidores, máis da metade desa cantidade podería gastarse nos vindeiros tres meses. Ao longo de 2025, xAI espera consumir uns 13.000 millóns de dólares, segundo os fluxos de caixa apancados revelados a investidores.
Fundada en 2023 e responsable do chatbot Grok, xAI apenas conta con ingresos estimados de 500 millóns de dólares este ano, fronte aos 12.700 millóns que se prevén para OpenAI, segundo Bloomberg. Para 2026, xAI agarda superar os 2.000 millóns de dólares en facturación, e aspira a ser rendible en 2027.
Entre os factores que elevan os custos figuran a adquisición masiva de chips especializados e a construción de infraestruturas propias, en lugar de alugar servidores como fan outras empresas. A compañía tamén espera aproveitar os datos da rede social X, da que forma parte desde a recente fusión, para adestrar os seus modelos sen ter que pagar por conxuntos de datos externos.
A empresa pechou recentemente unha rolda de financiamento de 4.300 millóns de dólares en capital e planea captar outros 6.400 millóns o ano que vén. Ademais, está a ultimar con Morgan Stanley unha operación de débeda por valor de 5.000 millóns para financiar a súa rede de centros de datos.
Esta información publicada por Bloomberg foi considerada por Elon Musk como un disparate, aínda que non refutou ningún detalle dos difundidos.