Apple presenta oficialmente o seu iPad

Despois dunha longa espera e multitude de rumores, tivo lugar a presentación de Apple na que deron a coñecer o seu novo produto estrela, o iPad, un dispositivo baseado nunha pantalla multi-táctil de 9,7 polgadas cunha resolución de 1.024 x 768 píxeles (cun recubrimento oleofóbico coma o iPhone 3GS) e uns 700 gramos de peso que sorprende por funcionar cun procesador Apple A4 a 1 GHz (o que indicaría que a compañía de Cupertino opta agora por fabricar o cerebro dos dispositivos deste tipo) e que, pese a que se falaba que sería revolucionario, finalmente vén a ser unha especie de iPod Touch de grande tamaño, compatible con moitas das aplicacións de tal trebello, pero orientando o seu uso á reprodución de vídeo, a visualización de páxinas web, os xogos e a lectura.

Coma aconteceu co iPhone, os xogos tamén terán un rol importante no iPad

A interface do iPad é moi semellante á do iPhone, contando con grandes iconas e con algunhas aplicacións de escritorio portadas ao novo trebello, de xeito que agora a reprodución multimedia en vez de ser semellante á dun iPod, é como a de utilizar iTunes nun Mac. A súa potencia permítelle reproducir vídeo en alta definición, tanto almacenado no propio dispositivo como a través de YouTube e gozará de multitude de aplicacións, xa que o SDK para o iPhone actualizarase para facilitar a adaptación dos programas actuais ao novo dispositivo. De feito, as aplicacións actuais para iPhone/iPod Touch poderán verse a tamaño normal no iPad e incluso dobrando os píxeles para poder adaptalas a pantalla completa, o que agradecerán especialmente os xogos, que serán un dos pratos fortes do trebello, polo que durante a presentación deste tablet amosaron cómo corría no mesmo algún título coma o Need for Speed Shift.
Steve Jobs felicitou a Amazon polo éxito da súa plataforma de libros electrónicos Kindle, e anunciou a aplicación iBooks, que chega para facerlle a competencia, pois accederá a unha iBook Store na que mercar libros para o iPad, dispositivo que podería ter certo éxito para a lectura de libros e revistas, aínda que dende Apple tamén atopáronlle usos máis profesionais, de xeito que adaptaron a súa suite ofimática iWork para funcionar co novo dispositivo, que permitirá así visualizar e editar documentos coa aplicacións Keynote, Numbers e Pages.

O iPad orienta boa parte do seu uso na lectura de libros, revistas e páxinas web

Entrando a analizar o hardware, estamos ante un trebello que mide 242,8 x 189,7 x 13,4 milímetros, pesa 680 gramos no modelo con Wi-Fi e 730 gramos no modelo que incorpora tamén conectividade 3G, Wi-Fi n, Bluetooth 2.1, acelerómetro, sensor de luz ambiental, conector de auriculares estándar, altofalantes, micrófono e saída de vídeo a través de conector base, mentres que os modelos máis avanzados tamén contarán con conectividade GSM/EDGE/UMTS/HSDPA, compás dixital e A-GPS. Venderase en capacidade de 16, 32 e 64 Gb, contará cunha batería recargable cunha autonomía de ata 10 horas. Aparte da pantalla táctil, controlarase tamén mediante botóns externos que permite acender/apagar, espertar/durmir, enmudecer, subir e baixar o volume e ir ao inicio.
No tocante aos seus prezos, o modelo básico de 16 Gb custará 499 dólares nos EE.UU., incrementando 100 e 200 euros para as versións de 32 e 64 Gb respectivamente, mentres que o modelo que, aparte de Wi-Fi, tamén inclúe 3G (ou sexa, máis próximo ao iPhone que ao iPod Touch), os prezos van dende 629 a 829 dólares, aínda que haberá que agardar para coñecer os prezos que terán en Europa.
A súa chegada ás tendas norteamericanas agárdase para dentro de 60 días, e os modelos con 3G tamén poderán asociarse a tarifas de datos móbiles con prezos competitivos negociados por Apple.
Pero este novo dispositivo que prometen tan bonito, ten as súas eivas, coma o feito de que estea moi pechado ao control de Apple, non conte con capacidades de multi-tarefa (de xeito que non permite o uso de aplicacións en segundo plano, o que en certos escenarios de uso supón un problema notable), o seu navegador web non inclúe soporte de Flash, non funciona coma móbil (parece ser que nin sequera conta coa aplicación para SMS, pese a que a meirande parte das conexións de banda larga móbil aceptan tal función) e carece de cámara (o que limita o uso de aplicacións de videoconferencia, que si permiten outros dispositivos que puideron verse no CES de Las Vegas hai poucos días).
De todos os xeitos, estamos ante un produto que terá o seu público, e podería ser o grande éxito de Apple para a tempada, pois lembremos que os resultados económicos da compañía por mor do iPhone foron moi positivos, e este novo produto podería avanzar nesta dirección sen vampirizar o mercado de equipos portátiles de Apple.