R recibe este domingo o recoñecemento da Fundación Curros Enríquez pola súa defensa da lingua e cultura galegas

A Fundación Curros Enríquez e o Concello de Celanova están estes días a ultimar os preparativos para a entrega do XXIX Premio Celanova, Casa dos Poetas, que se celebra o vindeiro día 8 de setembro. Como lembraremos, o galardón irá dar este ano ao operador galego de telecomunicacións R, un premio que recollerá o propio conselleiro delegado da compañía, Arturo Dopico. O recoñecemento a R vén dado pola súa aposta firme a prol da nosa lingua e polas importantes contribucións que ten feito a prol de normalizala en relación aos recursos propios da Sociedade do Coñecemento. O premio -organizado pola Fundación Curros Enríquez de Celanova (Ourense)- consta dunha medalla de prata, obra do escultor Acisclo Manzano, que reproduce por unha cara a casa de Curros Enríquez e pola outra cinco “C” que simbolizan a letra pola que comezan os elementos identificativos deste premio: “Casa, Curros, Celanova, Castor e Celso”.
Volvendo á preparación dos actos do vindeiro domingo, dicir que estes comezarán ás 11,30 horas cunha ofrenda floral e un recitado de versos de Celso Emilio e de Curros Enríquez diante do monumento do primeiro, con motivo do seu 34 cabodano. Esta parte do acto contará coa participación musical do grupo de gaitas do Concello de Celanova.
Ás 12 horas, acompañados polos sons do grupo de gaiteiros celanovés terá lugar un cortexo cívico ata o Auditorio Municipal Ilduara de Celanova onde se desenvolverá o acto solemne de entrega do premio que nesta ocasión contará coa presencia da Presidenta do Parlamento de Galicia, Pilar Rojo Noguera, continuando coa tradición iniciada coa apertura da casa museo de convidar para este día a un representante institucional para presidir a mesa de entrega do premio e a clausura do acto. Nesta ocasión, o acompañamento musical do acto solemne de entrega do premio correrá a cargo do Dúo D’Acord, formado pola acordeonista e profesora do Conservatorio de Música de Ourense, Celia Adrián, e a violinista Ana María Davó. A xornada rematará cunha vista á Casa dos Poetas onde volverán soar os acordes do grupo de gaitas do Concello de Celanova.