Trasno anuncia novas versións en galego de OpenOffice e LibreOffice ao tempo que se solidariza coas vítimas do Alvia

Os membros do Proxecto Trasno comezaron esta semana dando novos froitos procedentes do seu importante labor de tradución de programas abertos nacionais e internacionais á nosa lingua: por unha banda a nova versión de Apache Apache OpenOffice e, pola outra, a máis recente entrega de Libreoffice. Estas achegas en galego déronse a coñecer xusto antes da triste traxedia do tren de Santiago, cousa que xerou que viñesen acompañadas de sinais de loito e condolencia por parte da comunidade Trasno, que amosou a súa solidariedade coas vítimas e familiares do accidente, unha homenaxe á que se unen outras entidades do software libre galego, como Mancomún precisamente.
Polo que atinxe á suite ofimática Apache OpenOffice 4.0, dicir que vén cunha nova e máis moderna interface de usuario, con melloras na interoperabilidade con Microsoft Office, maior compatibilidade gráfica e moitas outras melloras que se poden ver polo miúdo nas notas da nova versión, dispoñíbeis en galego. Salientar, iso si, que conta coa súa interface de usuarios cen cen por cen traducida á nosa lingua, sobre a que se mantén, informa Trasno, “unha compatibilidade de estilo e terminoloxía coa súa irmá LibreOffice en beneficio dos usuarios”. De querermos descargar OpenOffice en galego abonda con ir á páxina de descargas do proxecto, onde podemos obter tanto o paquete completo para unha instalación en Windows, Linux ou Mac como os paquetes de idioma por se xa temos instalada a versión 4.0 pero non contamos coa interface e os recursos lingüísticos no noso idioma. Ademais é posible descargar extensións para esta suite dende a nova páxina de extensións de OpenOffice.
No que atinxe a LibreOffice 4.1, sinalar que inclúe unha longa listaxe de optimizacións no eido de compatibilidade de documentos, medrando as oportunidades de compartir coñecemento cos usuarios de software privativo mentres se mantén o deseño orixinal e os seus contidos. Engadir a incorporación de tipos de letra en Writer, Calc, Impress e Draw e o fornecemento de funcionalidades de Apache OpenOffice, como a barra lateral de Symphony (versión de OpenOffice de IBM). Podemos obter LibreOffice 4.1 en galego dende a páxina do proxecto. As extensións para esta suite están dispoñibles na páxina de extensións de Libreoffice, infórmase dende Mancomún e Trasno.