Google Earth incorpora vídeos de YouTube localizados xeograficamente

A aplicación informática de Google que permite percorrer todo o planeta dende o aire amosando imaxes tomadas por satélite e outros métodos, Google Earth, vén de incluír unha nova capa de datos ó seu servizo, de xeito amosa vídeos de YouTube segundo a súa localización, podendo reproducilos no navegador ou no programa de escritorio.
Os usuarios de YouTube xa hai tempo que poden xeolocalizar os seus contidos, e agora esta información se pode aproveitar para moverse por todo o planeta descubrindo os vídeos que se tomaron en cada punto.
Con esta nova incorporación a Google Earth podemos ir á Praza do Obradoiro a ver un vídeo do Botafumeiro, descubrir a gravación dun concerto de Berrogüetto en Ferrol ou contemplar a celebración dunha voda en Boente. Ábrese un novo xeito de navegar polos vídeos de YouTube, así como de facer turismo sen erguernos de diante do ordenador.