Microsoft presenta a Beta 2 de Silverlight

Microsoft celebra estes días o congreso TechED:Developers, onde se deron a coñecer as principais novidades dirixidas aos desenvolvedores, abrindo o evento o propio Bill Gates, na que será a súa última intervención pública no seu cargo actual, pois o deixará o vindeiro 1 de xullo.
Ao TechED: Developers acudiron máis de 6.500 desenvolvedores, que puideron coñecer detalles sobre aplicacións coma o Visual Studio 2008 ou a última versión CTP de Microsoft Sync Framework, así como ver varias demostracións, aínda que o máis importante foi o anuncio da Beta 2 de Silverlight, o engadido para o navegador que Microsoft desenvolveu en resposta á tecnoloxía Flash, e que achega moitas posibilidades multimedia ás páxinas web, e que a propia NBC Universal empregará para informar sobre os vindeiros Xogos Olímpicos.

Como exemplo de Silverlight 2 presentouse unha web de memorabilia da popular marca Hard Rock, que nos permite acceder a imaxes de alta resolución de máis de 70.000 obxectos da historia do Rock que teñen repartidos por todo o mundo. Coa nova tecnoloxía de Silverlight é así posible facer un zoom sen que o usuario perciba o momento entre o que se salta da imaxe básica a unha de alta resolución.