Ineo pasa a ocupar a vicepresidencia da confederación nacional do sector, CONETIC

Ineo, a Asociación Multisectorial de Novas Tecnoloxías da Información e Comunicación de Galicia, está a reforzar a súa presenza na confederación nacional de empresas do sector, CONETIC. Este proceso de afianzamento das compañías galegas na dita organización española, que foi dado a coñecer o pasado venres trala participación de Ineo nunha asemblea do comité executivo de CONETIC en Madrid, vai ter unha serie de vantaxes importantes para o eido tecnolóxico na nosa terra, sobre todo á hora de beneficiárense as compañías de proxectos e axudas en colaboración coa Administración Central. Por exemplo: a iniciativa Insertic 2008, un programa de tipo formativo posto en marcha en colaboración co Ministerio de Traballo e que ten un orzamento para este ano de 640.000 euros. “Mediante este programa, as firmas de Ineo teñen a posibilidade de contar con futuros traballadores cun perfil profesional moi demandado polo mercado tecnolóxico, respondéndose deste xeito ás necesidades de cualificación permanente dos profesionais do sector TIC de Galicia a prol de asegurar a mellora das competencias individuais e o seu desenvolvemento persoal”, informa Ineo nun comunicado.
Para a organización galega, que concorreu na dita reunión ocupando xa o posto da vicepresidencia, o feito de que se teñan as afianzado ligazóns con CONETIC supón tamén un importante respaldo para as empresas galegas, sobre todo se temos se temos en conta que ese respaldo vén dunha confederación integrada hoxe por 14 asociacións empresariais TIC do eido autonómico e que representan a 1.573 empresas e case 60.000 traballadores, e que ao a longo de dous anos de vida ten desenvolvido (CONETIC) un bo número de accións colaborativas a prol do sector dixital.
Na dita reunión celebrada en Madrid, informa Ineo, sentáronse tamén os acordos para os vindeiros proxectos e actividades en materia de cooperación empresarial, promovéndose diferentes iniciativas co Instituto Nacional de Tecnoloxías da Comunicación (INTECO), co que Ineo xa ten traballado ao longo de 2007 desenvolvendo xornadas en Vigo e A Coruña e nas que participaron ata 400 empresarios galegos.

Novo corpo directivo de CONETIC

Coa designación a pasada semana das novos cargos, decidiuse que o posto da presidencia fose ocupado por ASCENTIC (organización cántabra do sector), a secretaría por ETICOM (Andalucía) e tesourería por ATAN (Navarra). O comité complétase coas vocearías de ESTIC (Valencia) e AETICAL (Castela e León).