O Codex Sinaiticus, unha Biblia do século IV, estará dispoñible na Rede

Que unha Biblia do século IV apareza en Internet, perpetuándose nela logo duns 1.600 anos de acceso restrinxido para o común dos mortais, semella un proceso de rehabilitación por partida dupla: por unha banda ponse en valor un documento histórico de gran importancia (o Codex Sinaiticus) e, pola outra, ponse en valor un xeito de ollar á cultura que nunca se debeu ter perdido, o xeito colectivo e aberto de ollar. O proceso, segundo fan saber Elpais.com e Elmundo.es, vai por pasos. En primeiro lugar, habilitaranse na Rede as 43 páxinas da obra conservadas na Biblioteca Universitaria de Leipzig (Alemaña), amais de algunhas do Vello Testamento que alberga hoxe a British Library de Londres.
A versión dixital, que será presentada na Internet en edición fácsimil a partir do vindeiro xoves, non achegará unicamente texto, senón tamén unha serie de posibilidades de manexo interesantes. É dicir, non é que poidamos meterlle man ao texto e varialo ao noso antollo, pero si que poderemos mover parágrafos e ata intercalar a versión en grego e a alemá da obra en cuestión. Serán en total 390 pergamiños os que se se porán a disposición dos internautas o ano que vén, documentos escritos en grego antigo que incluirán a totalidade do Novo Testamento e a medade do Vello. Sinalar ademais que se trata dunha das Biblias máis antigas do mundo, a parte do Codex Vaticanus, que tamén é do século IV.