Apple decepciona na Macworld Expo

A tarde do Día de Reis foi o momento elixido para a presentación de Apple durante a Macworld Expo, nun acto que aparte de carecer da presenza de Steve Jobs e de ser a derradeira participación da compañía de Cupertino nesta feira tecnolóxica, destacou por ser unha rotunda decepción, por non anunciarse ningún produto realmente novo como se viña rumoreando.
Os asistentes non puideron ver nin o agardado SnowLeopard (nova versión do Mac OS X que leva anunciada varios meses), o Mac mini renovado, o iPod Touch de grande tamaño (falábase dunha posible versión con pantalla de 7 ou 9 polgadas) ou mesmo un iPhone nano (rumor insistente que non parece ter moito sentido) e tiveron que conformarse con ver actualizacións nos paquetes de aplicacións iLife ’09 e iWorks ’09, xunto coa presentación dunha renovación do MacBook Pro con pantalla de 17 polgadas (que se trata dun equipo de alta gama e prezo elevado que o afasta do mercado de consumo, polo que non resulta especialmente relevante).
Para moitos resulta de máis interese o anuncio de que iTunes amplía o seu catálogo de cancións sen protección DRM, así como a eliminación do prezo fixo por canción, de xeito que agora podemos atopar temas a 0,69, 0,99 e 1,29 euros, que incluso se poderán descargar no iPhone dende conexións 3G (ata o momento só se podía facer por Wi-Fi ou a través un ordenador). Os usuarios que queiran liberar do DRM a temas adquiridos anteriormente poderano facer pagando 0,30 euros por cada tema (0,60 euros no caso dos vídeos e o 30% do prezo orixinal no caso dos álbums completos).
Entre as melloras de iLife ’09 podemos destacar que o iPhoto incorpora tecnoloxía de recoñecemento facial (moi útil para a organización de fotografías) e soporte de xeolocalización de imaxes e o iMovie incorpora novos temas e a posibilidade de crear mapas de viaxe animados, mentres que no iWork ’09 podemos destacar a posibilidade de compartir documentos, follas de cálculo e presentacións de xeito sinxelo a través de iWork.com. Aínda que se miramos ao peto, resulta máis interesante o feito de que Apple decidise lanzar o Mac Box Set, un paquete que inclúe iWork ’09, iLife ’09 e Mac OS X 10.5 (Leopard) por só 169 euros (cando os seus prezos por separado serían de 79, 79 e 129 euros respectivamente).