Os concellos españois suspenden en Administración Electrónica

A Asociación pro Dereitos Civís, Económicos e Sociais (ADECES) e a Asociación de Internautas (AI) presentaron os resultados do I Estudo sobre a e-Administración local tras analizar a implantación da Administración Electrónica en 25 concellos españois entre os que están A Coruña e Pontevedra, que casualmente representan a cara e a cruz da moeda, xa que o concello coruñés foi un dos 6 que superaron unha nota dun 5 (ou sexa, aprobando) mentres que Pontevedra levou a peor puntuación do Estado a bastante distancia do resto de concellos analizados.
En resumo poderiamos dicir que os concellos españois suspenden en e-Administración (cunha nota media dun 4,36), con só un 28% do total de trámites dixitalizados e con só 3 concellos (Murcia, Bilbao e San Sebastián) superando o 50% de servizos interactivos. Curiosamente, grandes concellos coma Madrid e Barcelona, son os de peor implantación dos servizos interactivos, xa que aínda que superan ao resto en números absolutos, en termos relativos están bastante por debaixo da media española.
Cómpre destacar que cando falamos da e-Administración a nivel autonómico os resultados son substancialmente mellores, polo que o estudo o que vén a indicar é que o ámbito local supón o punto feble da Administración Electrónica no Estado, pois practicamente limítanse a facilitar a presentación de queixas, a descarga de documentos, a realización de consultas e o pagamento de taxas, pero esquecen moitos outros trámites que poderían facerse por vía telemática para dar un mellor servizo ao cidadán (como a solicitude de axudas ou a renovación da tarxeta da ORA).