Alertan inxustificadamente dun troiano para Android

Os smartphones actuais son máis parecidos a un ordenador que a un teléfono móbil, polo que tamén teñen os seus problemas de seguridade, coma veñen de advertir dende Kaspersky Lab, compañía de seguridade informática que asegura ter detectado «o primeiro programa malicioso clasificado coma Troiano-SMS (..) para smartphones co sistema operativo Android», que leva por nome Trojan-SMS.AndroidOS.FakePlayer.a, e que podería ter infectado a un certo número de móbiles.
O troiano en cuestión sería unha aplicación que faise pasar por un reprodutor multimedia que, unha vez instalado no móbil, envía mensaxes de texto sen intervención do usuario a números Premium, o que serviría para engordar o peto dos ciberdelincuentes a costa da factura telefónica do usuario, aínda que cómpre facer moitas precisións sobre esta potencial ameaza: – non é a primeira ameaza de seguridade para Android, senón que xa existían varias, pero normalmente falamos de probas de concepto que non chegan a dispersarse – só afectaría a usuarios rusos, pois os números de tarificación adicional cos que comunícase a aplicación son de tal país – o troiano non está dispoñible no Android Market, polo que precisa dunha instalación manual por parte do usuario (o que limita a súa difusión a uns poucos usuarios inconscientes)
O feito de que Kaspersky asegure que a primeiros de 2011 vai lanzar unha aplicación de seguridade para dispositivos móbiles tamén leva a entender que o seu comunicado responde a un alarmismo inxustificado, dando lugar ao primeiro troiano mediático para Android, que non debería preocupar aos usuarios de terminais co sistema operativo móbil de Google, pois sempre que utilicen fontes fiables para a instalación de aplicación poderían estar a salvo de ameazas de seguridade (lembremos que o Android Market incluso incorpora a posibilidade de borrado remoto de aplicacións no caso de que os seus responsables detectasen algún programa conflitivo).