Aberto o prazo de inscrición para o Congreso de Networking que organiza AJEVigo

A Asociación de Jóvenes Empresarios de Galicia (AJE), fundada en Vigo hai máis de 20 anos, vai celebrar próximamente o seu IV Congreso Internacional, que este ano se centrará principalmente en proporcionarlle aos mozos e mozas emprendedores do noso país, as ferramentas de cooperación, marketing en redes sociais e internacionalización que precisan para encamiñar o seu futuro profesional.
Networking, creando redes é o título baixo o que se desenvolverán as xornadas desta edición, nas que participarán, coma de cote, entre 200 e 300 emprededores e empresarios chegados de España e Portugal.

O Congreso AJE, que xa ten aberto o prazo de inscrición, contará con especialistas en estratexias para a creación e consolidación de proxectos empresariais innovadores, así como con obradoiros de Networking para que os participantes, en palabras da presidenta da Asociación, Patricia García, “poidan coñecerse entre eles e establecer colaboración con clientes, provedores e inversores”.
Os relatores escollidos pola organización do evento coñecen e dominan á perfección as ferramentas TIC e posúen un alto grao de creatividade, necesaria para calquera estratexia de Networking.
Xa que logo non podía faltar Emilio Duró, un dos relatores convidados, coñecido pola súa actitude forte e optimista incluso en momentos de crise.
Duró é un prestixioso consultor de empresas multinacionais que, tal e como demostrou recentemente no late-night Buenafuente, está convencido de que “os fracasos profesionais rara vez se deben a cuestións técnicas, e son máis ben por causas emocionais”.
Outro convidado de excepción será Jesús Encinar, elexido un dos 25 españois máis influíntes de Internet e considerado un dos 5 CEOS españois máis reputados, que achegará a súa particular “fórmula para crear empresas de éxito optimizando ao máximo os recursos económicos.
Á presenza de Encinar e Duró hai que engadirlle a de Ana Díaz, PR Manager do servizo de Ebay para mercados emerxentes, que narrará de primeira man a súa experiencia en recoñecidas empresas como Match.com, Porter Novelli España e agora tamén Ebay.
O Congreso desenvolverase en Vigo os días 30 de xuño e 1 de xullo de 2011, e o prezo de inscrición é de 50 € para asociados e estudantes, de 90 € para membros de asociacións amigas e de 140 € para as persoas non asociadas.