Este será, principalmente, o eixe temático da primeira sesión. Na segunda, trataranse as boas prácticas na ofimática con recomendación sobre os formatos nos que se deben comprimir e gardar documentos, como realizar un documento de texto ou unha presentación así sobre que ferramentas de utilidade en ofimática poden usar os usuarios. O enxeñeiro e coordinador da Oficina de Software Libre da USC, Enrique Estévez, encargarase de desenvolver este tema, conta a USC. Como remate, a actividade centrarase na comunicación na rede, afondando en cuestións como a mensaxeiría instantánea, o correo electrónico ou as redes sociais. Esta sesión contará coa presenza de Denís Fernández, presidente da Asociación Grupo de Usuarios de Linux de Galicia.
Máis actividades
Con todo, e tal como sinalamos ao comezo deste texto, a oferta formativa da Oficina de Software Libre da USC non remata co devandito curso sobre boas prácticas. Segundo nos conta Enrique Estévez, coordinador do dito departamento, a listaxe de accións non deixa ren sen cubrir. Cómpre que lles botemos un ollo a cada un dos cursos, posto que todo indica a que a programación en aberto será unha das grandes estratexias do noso sector TIC ao longo dos anos vindeiros, con todo o que isto implica de estandarización en termos de programación aberta a nivel administrativo, educativo e empresarial.
· Traballo diario con Ubuntu. O sistema operativo e do proxecto ABALAR.
· Localización de aplicativos ao galego. Aprende traducindo.
· Deseño e autoedición con software libre: logotipos, revistas e retoque fotográfico.
As actividades son de especial importancia a tódolos niveis, tanto para estudantes como docentes e profesionais das TIC.
