O especialista en seguridade Ross Anderson estará nas Xornadas de Criptografía do GPUL

Ross Anderson, doutor da Universidade de Cambridge e un dos principais expertos internacionais no ámbito da seguridade tecnolóxica, estará os días vindeiros na Coruña para participar na cuarta edición do Obradoiro de Criptografía que organiza GPUL na Facultade de Informática. Anderson, ligado ao prestixioso Security Group, falará na FIC sobre criptoloxía, seguridade e sobre a fronteira ou os límites da investigación nestes dous eidos.
Lembrar que Anderson ten participado en varios desenvolvementos criptográficos como as primitivas Bear, Lion ou Tiger, ou no código de cifrado de bloques Serpent. Tamén ten investigado as relacións da economía e a seguridade, e é un defensor das liberdades no mundo dixital, segundo informa o Grupo de Programadores e Usuarios de Linux.
A achega de Anderson (programada para o mércores 16 de maio ás 10.00 horas no dito centro) complementarase con diversas charlas e obradoiros de especialistas locais nos devanditos ámbitos temáticos, que amosarán as técnicas máis innovadoras e recentes nas que están a traballar. O obradoiro desenvolverase entre os días 14 e 16 de maio, no salón de actos da Facultade, no andar 0. No caso de querer rexistrarnos nesta actividade, cómpre ter en conta que se pode facer a través da Rede, nunha ligazón específica.