A USC impulsa un congreso internacional para debater sobre as posibilidades das TIC no ensino

A Universidade de Santiago (USC), en colaboración coa de Córdoba (Arxentina) vai organizar unha xuntanza intercontinental destinada a intercambiar experiencias e puntos de vista arredor dos sistemas educativos e do potencial das novas tecnoloxías e servizos para renovalos, facelos máis eficaces, produtivos e, en definitiva, mellores. Este evento, en boa medida unha tentativa de arredar as consecuencias negativas da crise mundial para o ámbito docente, insírese nun proxecto de cooperación entre as ditas institucións educativas, destinado ao fortalecemento de áreas dedicadas ao ensino con tecnoloxías da información.
O I Congreso Internacional Coñecemento Tecnoloxías e Ensino: políticas e prácticas universitarias diríxese tamén a brindarlles ás institucións universitarias, en xeral, novos azos para acadar vixencia, á vista de nin a fortaleza nin a tradición son de abondo para sobrevivir. Neste senso, o congreso amósase como “unha aposta cara a un novo rumbo do pedagóxico, posibilitando un debate por e para universitarios arredor das principais problemáticas destas institucións educativas”, sinalan as dúas entidades.
Segundo engade Adriana Gerwerc, coordinadora do evento, a principal función deste encontro é “permitir que a universidade como institución se repropoña de novo o seu papel, as súas funcións e o seu lugar na actualidade, proxectando a voz dos estudantes cara a comunidade social perante o conxunto de demandas cruzadas procedentes dos organismos e axencias nacionais e internacionais”.
A celebración do congreso desenvolverase os días 6, 7 e 8 de febreiro do ano vindeiro no Centro Galega de Arte Contemporánea, o CGAC, en Santiago de Compostela. Esta iniciativa insírese nun programa de actividades levadas a cabo pola Rede UNISIC (Universidade e Sociedade da Información e o Coñecemento) en cooperación coa AECID (Axencia Española de Cooperación Internacional para o Desenvolvemento). A Rede UNISIC naceu en 2006 a partir do establecemento de proxectos comúns entre as universidades de Chile, Arxentina e Bolivia coordinadas pola Universidade de Santiago.