Principia na Coruña o Congreso Europeo de GNOME de 2012

Esta mañá a Facultade de Informática da Coruña acolleu a apertura do Congreso Europeo de Desenvolvedores e Usuarios de GNOME (GUADEC) que ata o 1 de agosto congregará a preto de 300 expertos en Software Libre procedentes de boa parte do mundo, e que participarán en 4 conferencias maxistrais, 97 relatorios e diversos obradoiros que converterán a este encontro nun foro internacional para a investigación e o desenvolvemento do proxecto GNOME.
Para a celebración deste encontro cóntase coa colaboración da Universidade da Coruña e a Xunta de Galicia, así como co patrocinio de empresas e entidades tecnolóxicas como Google, Red Hat, Canonical, Collabora, Igalia, Openshine e Open Invention Network, e o apoio da Linux Foundation, GNOME Hispano e GHANDALF.

Na inauguración do Congreso interviñeron Karan Sandler, directora executiva da GNOME Foundation; José María Casanova Crespo, coordinador xeral de GUADEC 2012; Francisco J. Tsao, presidente de GPUL; Alberto Valderruten Vidal, decano da Facultade de Informática e Adrián Lence Paz, director da Área de Infraestruturas e Telecomunicacións da Axencia para a Modernización Tecnolóxica de Galicia (AMTEGA), quen agradeceu aos presentes que tiveran a ben celebrar este evento internacional en Galicia, destacando tamén o feito de que este contorno para GNU/Linux contribúa de xeito considerable á localización de escritorios informáticos á nosa lingua.

Tras este acto de benvida tivo lugar unha conferencia inaugural a cargo de Jacob Appelbaum, experto en seguridade en Internet e membro de Wikileaks e do Proxecto Tor, que abordou o tema da privacidade e o anonimato na Rede.
Appelbaum non é a única figura relevante que participará neste encontro, podendo destacarse a outros persoeiros como Federico Mena, quen iniciou o proxecto GNOME xunto a Miguel de Icaza en 1997.
Nos vindeiros días trataranse numerosos temas de interese como as innovacións tecnolóxicas e novas aplicacións en GNOME, os avances de GNOME en accesibilidade (para facilitar que persoas con diversidade funcional poidan empregar equipos informáticos), GNOME en dispositivos móbiles, a localización e internacionalización do proxecto GNOME e mesmo o uso de GNOME no ensino (a través de Sugar e o proxecto OLPC).