O CITIC organiza unhas xornadas sobre oportunidades financiamento en I+D para empresas TIC

O Centro de Investigación en Tecnoloxías da Información e as Comunicacións (CITIC) organiza cos representantes do CDTI o Fórum Colaboración Universidade-Empresa: Oportunidades de financiamento en I+D a empresas TIC co obxectivo de presentar as oportunidades de financiamento nas convocatorias do 7º Programa Marco de I+D para o sector TIC, así como os mecanismos do Fondo Tecnolóxico para Galicia. O encontro terá lugar o 15 de outubro na sede da Fundación Barrié sita no Cantón Grande coruñés.
Estas xornadas están enmarcadas dentro dunha serie de actividades que a Universidade da Coruña (UDC) organizará durante o mes de outubro para fomentar a transferencia de coñecemento entre a Universidade e as empresas.
O Forum pretende ser un punto de encontro entre as empresas do sector TIC galego e os investigadores das diversas Áreas Tecnolóxicas do CITIC, coa finalidade de fomentar a colaboración e o coñecemento mutuo e informar das actividades de investigación aplicada que se realizan no CITIC.
Durante a xornada, o CDTI presentará as últimas convocatorias publicadas dos programas de financiamento europeos para proxectos TIC, en concreto:
· Call 10 (aberta dende o 10 de xullo e pecha o 15 de xaneiro)
· Call 11 (aberta dende o 18 de setembro e pecha o 16 de abril)
· Smart Cities and Communities (aberta dende 10 de xullo e pecha 4 de decembro)
· Future Internet PPP (aberta dende o 16 de maio e pecha o 10 de decembro)

Así mesmo, o CDTI describirá as novidades respecto aos proxectos PID do CDTI co financiados polo Fondo Tecnolóxico, partida especial dos fondos FEDER europeos destinada a promover a I+D+i empresarial nas rexións de converxencia, entre as que se encontra Galicia. Cómpre subliñar que existe aínda un orzamento de entre 50 e 60 millóns de euros do Fondo Tecnolóxico destinado a Galicia para proxectos de I+D+i que é preciso solicitar antes de finais deste ano para a súa execución ata finais de 2014.
Ao finalizar a xornada as empresas interesadas (previa solicitude por correo electrónico seguindo o procedemento detallado no documento PDF no que se inclúe o programa das xornadas) poderán ter reunións bilaterais cos representantes do CDTI e/ou os responsables das áreas tecnolóxicas do CITIC.