Nintendo sorprende presentando unha Wii Mini en Canadá

As novas consolas de Nintendo serán as grandes estrelas desta campaña de Nadal, pero parece que en Canadá non queren dar por morta a vella Wii, e relánzana cun novo deseño en negro mate e vermello brillante a un prezo reducido (99,99 dólares, o que serían ao cambio uns 77,27 euros) co que buscan gañarse aos consumidores que aínda non se fixeran con tal consola e prefiran agardar a mercar a súa sucesora. A Wii Mini, ao adoptar un tamaño inferior, tamén ten que prescindir da compatibilidade con xogos e mandos de GameCube (como xa fixera a Wii que lanzou Nintendo o ano pasado). A consola tamén prescindirá dos modos de xogo en liña, posto que carece tanto de porto Ethernet coma de Wi-Fi.
A Wii Mini comezará a venderse en Canadá a partir do 7 de decembro, e é de agardar que logo chegue ao resto de mercados, aínda que a súa compra non parece do máis recomendable (pese a que a Wii conte cun catálogo de máis de 1.300 xogos), posto que o ciclo de vida da Wii achégase á súa fin coa Wii U e, de feito, dende Nintendo aseguran que non están a desenvolver novos xogos para Wii, senón que están a centrar os seus esforzos na Wii U e na Nintendo 3DS.