O marketing e as redes sociais a debate en Compostela este mércores

O Grupo Correo Gallego organiza para este mércores unha nova edición do seu Foro que baixo o título de Redes sociais e comercio electrónico pretende achegarse aos fenómenos de Facebook Twitter e Tuenti e o seu impacto no comercio electrónico, para o que contarán coa presenza do especialista en recursos de marketing na Rede Jesús López Cortiñas, quen realizará o relatorio inicial tras a inauguración do encontro por parte do presidente da Deputación de Lugo, José Ramón Gómez Besteiro.
A López seguirao Manuel Pan Collazo, xerente de Abertal Networks, consultora galega dedicada ao contorno dixital, que servirá de antesala a un coloquio no que Pablo Rivera (Deputación de Lugo), Daniel Cerqueiro (EGANET), Luís S. Fernández Díaz (Federación Galega de Comercio), Miguel Conde Lobato (Bap Conde), Miguel López Crespo (UCGAL) e Antonio Rodríguez del Corral (Cluster TIC Galicia) intercambiarán puntos de vista sobre a evolución do comercio electrónico e as novas fórmulas publicitarias. Pechará o encontro a directora da AMTEGA, Mar Pereira.
Este Foro do Grupo Correo Gallego celébrase no Hotel Monumento San Francisco a partir das 10:00 horas, sendo a súa entrada libre.