A compostelá Sdweb participa en Cornellá no principal encontro europeo sobre Drupal

A empresa galega Sdweb, responsable entre outras cousas de ter localizado ao galego o xestor Alfresco e máis dunha serie de importantes desenvolvementos sobre a base de Drupal, ten novidades que contarnos sobre a súa presenza en escenarios exteriores. Máis polo miúdo, Sdweb, con sede física en Compostela, vai estar presente no Drupal Executive Meetup, un encontro profesional que reúne ás principais empresas europeas especializadas no desenvolvemento do CMS, o xestor de contidos Drupal. O evento, que vai pola súa terceira convocatoria, celebrarase os días 11 e 12 de abril na cidade de Cornellà. Trátase, en termos máis concretos, dun evento centrado en artellar a rede europea de desenvolvedores da comunidade xerada arredor do devandito sistema libre.
Dito doutro xeito: estamos ante un encontro anual para establecer sinerxías entre aquelas empresas e profesionais que participan activamente neste comunidade achegando e desenvolvendo código fonte en moi diferentes eidos (comercio electrónico, redes sociais, portais corporativos, etc). O primeiro encontro deste tipo celebrouse en Bruxelas con máis de 60 asistentes e tivo a súa segunda edición en Amsterdam. Na terceira edición, acolle o evento a cidade de Cornellà (Catalunya) no seu Centro Tecnolóxico para a Difusión da Cultura Tecnolóxica (Citilab). Os responsables de Sdweb – Solucións Dixitais salientan ao fío da repercusión desta xuntanza o espírito de colaboración que se extrae dela, e máis o seu alcance europeo. Así nolo explican: “A filosofía desta cita é totalmente colaborativa con reunións permanentes, o que facilita establecer moitas liñas de traballo en conxunto con outras empresas europeas fortemente especializadas en Drupal e poder presentar a nosa oferta a proxectos máis grandes así como a desenvolver produtos e servizos especializados”.