Apple podería ter devolto máis de 5 millóns de iPhone 5 defectuosos a Foxconn

Que a fabricación do iPhone 5 foi moi dificultosa era evidente nos primeiros días da súa comercialización, con numerosas unidades que amosaban rabuñaduras ao sacalos da súa caixa e outros fallos de fabricación, e dende medios chineses están a dar conta do volume da problemática, cifrando entre 5 e 8 millóns o número de unidades devoltas a Foxconn o mes pasado, que teñen que pasar por un proceso de reparación que suporía para o fabricante uns 200 iuans (24,9 euros) por dispositivo, o que claramente estaría a afectar ás contas da compañía chinesa.
Dende Foxconn xa tiñan advertido das dificultades de fabricación do iPhone 5, e aseguran ter incrementado os seus controis de calidade, co que agardan poder manter o ritmo de produción que se lles demanda, entregando un volume de unidades sen erros aceptable. Desta volta foi especialmente complicado cumprir cos obxectivos de Apple, pois a compañía de Cupertino reduciu a distancia entre os lanzamentos internacionais do iPhone 5, converténdose no seu lanzamento máis agresivo, o que, como podemos ver, afectou aos controis de calidade nos seus procesos de ensamblado.