O marketing por correo electrónico centrará varias actividades formativas na Coruña

O espazo de coworking sito na Avenida Novo Mesoiro da Coruña, WeKCo, ten programadas esta semana un par de actividades dedicadas ao marketing por correo electrónico, que comezan cun seminario de balde sobre Aspectos básicos do e-mail marketing que terá lugar o vindeiro mércores ás 19:30 horas e no que David Bodero Vales-Villamarín abordará temas como a importancia que mantén o correo electrónico no panorama actual, os distintos tipos de e-mail marketing, as súas vantaxes para a creación de marca e as características que diferencia ao concepto doutros métodos de comunicación empresarial. Rematará cunha serie de consellos básicos a ter en conta no desenvolvemento dunha estratexia propia de e-mail marketing.

Por outra banda, o vindeiro día 11 botará a andar un completo obradoiro sobre Mailchimp, que desenvolverase os sábados pola mañá ata o 1 de xuño (agás o sábado posterior ao Día das Letras Galegas), e que terá un custo de 120 euros (para empresas, sendo bonificable a través da Fundación Tripartita para o Emprego). Nesta ocasión tamén será David Bodero o encargado de impartir esta actividade formativa que ilustrará sobre as boas e malas prácticas de e-mail marketing, a xestión de listaxes de subscritores, como deseñar as campañas e como analizar os seus resultados.
Recoméndase aos asistentes ao curso que acudan co seu ordenador portátil, sendo tamén recomendable que conten con algunha páxina web, blog ou perfil social, coa súa imaxe corporativa e unha listaxe inicial de contactos para poder experimentar cun caso real durante as 3 xornadas de 4 horas cada unha.
A ferramenta empregada para o e-mail marketing será MailChimp, sobre o que se realizarán distintas prácticas, de xeito que os asistentes non só aprenderán a usar MailChimp, senón que rematarán o curso cunha ferramenta personalizada e en funcionamento para o seu proxecto.