O vindeiro Foro Unirede abrirase cunha xornada sobre emprendemento

Dentro de pouco máis dun mes celebrarase a terceira edición do Foro Unirede, que tras 2 anos celebrándose con grande éxito na Facultade de Ciencias da Comunicación de Santiago de Compostela traslada a súa sede a Pontevedra, repartindo as súas actividades en 2 xornadas: o venres 22 terá lugar Unirede Emprende, mentres que o sábado 23 é cando se desenvolverá o encontro tradicional.
Unirede Emprende será unha xornada con relatorios sobre a importancia da web social na implantación de proxectos empresariais, contando con experiencias de emprendedores que basean o seu éxito no contorno virtual e no apoio de técnicas de marketing en liña.
Completarán o programa obradoiros sobre Twitter e Facebook, e sobre a implantación dunha marca 2.0; e os asistentes poderán consultar as súas dúbidas puntuais sobre como implantar un plan de empresa de marketing ou social media nos seus proxectos.
O Foro Unirede do día 23 de novembro procurará servir de escaparate dos logros da web 2.0 en Galicia, para fomentar a interacción entre os distintos actores do social media na nosa comunidade e difundir entre a sociedade as vantaxes e posibilidades de desenvolver a web social nos distintos sectores económicos.
Este evento tamén busca consolidarse como un punto de encontro para o sector 2.0, que aproveita este tipo de actividades para facer networking. Amais, a xornada contará con contidos segmentados sectorialmente nas seguintes categorías: Marketing/Comunicación, Turimos/Gastronomía, Tecnoloxía, Moda e Tendencias, Cultura e Industriais Culturais.