Valoran en 31,5 millóns de euros os danos e prexuízos causados por Rojadirecta

Hai preto de 3 anos chegou á Audiencia Provincial da Coruña o contencioso entre LaLiga, Mediapro e o creador da páxina web galega Rojadirecta, solicitando a fiscalía 4 anos de cadea para o creador de Rojadirecta, Igor Seoane, e penas de entre 2 anos e 3 meses para os seus colaboradores, así como o cesamento da actividade de Rojadirecta, mentres que a acusación solicitaba unha pena de 6 anos para Seoane e unha multa de seis millóns de euros.
Agora escríbese un novo episodio dunha persecución xudicial contra Rojadirecta (da que xa dabamos conta en 2007) que agora reflicte a sanción máis alta fixada en España por piratear fútbol, xa que o Xulgado Mercantil nº 2 da Coruña fixou a indemnización que terán que satisfacer a empresa Puerto 80 e o seu administrador, Igor Seoane, nun total de 31,6 millóns de euros (dos que a metade recaerían persoalmente en Seoane como administrador solidario), para resarcir os danos e prexuízos ocasionados a Mediapro pola emisión de partidos de LaLiga. Esta cantidade sería a que Puerto 80 tería que ter pagado para ter acceso ao sinal subministrado aos seus usuarios.
Rojadirecta facilitaba o acceso a retransmisións deportivas a través de ligazóns, obtendo ingresos millonarios a través da publicidade (informes periciais de 2022 evidenciaron ingresos de máis de 11 millóns de euros nunha das contas da sociedade).
Cómpre salientar que a sanción que vén de darse a coñecer corresponde a un proceso civil, o proceso penal iniciado hai preto de 3 anos continúa en curso. Tampouco debemos esquecer o feito de que a páxina web de Rojadirecta continúa a operar con total normalidade para usuarios que se conectan dende fóra de España (ou para os que empregan unha VPN para eludir as restricións xeográficas).