Esta semana Perplexity presentou Comet, un navegador web deseñado para responder ás necesidades actuais dunha Internet que xa non se limita a ser unha fonte de consulta, senón que se converteu no espazo onde traballamos, vivimos e nos relacionamos. Comet busca superar os límites dos métodos tradicionais de navegación baseados en lapelas e ligazóns, para ofrecer unha experiencia máis integrada e contextual.
Propón unha transición da simple navegación á cognición: En lugar de acumular páxinas abertas, o navegador agrupa toda a actividade nunha única interface intelixente que comprende o contexto do usuario e axuda a manter o foco.
O asistente integrado en Comet permite, por exemplo, buscar alternativas a un produto nun só paso, comparar informacións con outras xa consultadas ou pedir explicacións sobre conceptos complexos directamente sobre o contido dunha páxina web.
Para poder descargar Comet precisamos estar subscritos a Perplexity Max (que ten un prezo de 200 dólares/mes), aínda que o resto de usuarios tamén poden inscribirse na lista de agarda que irá abrindo acceso a novos usuarios ao longo do verán. Os usuarios que teñan acceso á aplicación tamén poderán convidar a outros usuarios.
Da resposta á acción
Unha das principais innovacións de Comet é a súa capacidade para transformar a navegación en acción directa. Os usuarios poden pedir que se reserve unha reunión, se envíe un correo ou mesmo que se realice unha compra esquecida, sen abandonar o contexto da súa actividade principal. Isto supón, segundo Perplexity, unha fusión entre o pensamento en voz alta e a execución de tarefas complexas, todo dentro da mesma experiencia de usuario.
Os usuarios poden subliñar textos para obter explicacións, explorar ideas relacionadas sen perder o fío da lectura ou pedir contrapuntos. A ferramenta aprende dos hábitos de pensamento de cada persoa para ofrecer unha asistencia cada vez máis personalizada e proactiva.
Vídeo promocional do navegador web de Perplexity
