A compatibilidade retro de Xbox en PC apunta xa a Xbox 360

A chegada de BLiNX: The Time Sweeper, Conker: Live & Reloaded, Crimson Skies: High Road to Revenge e Fuzion Frenzy ao programa de compatibilidade retro de Xbox para Windows podería ser só o primeiro paso dun plan moito máis ambicioso. A análise técnica realizada por XCT.LIVE dos ficheiros distribuídos por Microsoft revela que estes títulos non empregan un emulador específico para a Xbox orixinal, senón que se executan sobre a mesma infraestrutura de compatibilidade retro desenvolvida para Xbox 360, o que abre a porta á futura incorporación do catálogo desa consola.
Os paquetes distribuídos a través da Microsoft Store aparecen identificados internamente como Xbox360BackwardCompatibil. e fan uso do emulador Xenon Fusion (XeFu), empregado durante anos na compatibilidade retro de Xbox One e Xbox Series. Segundo a investigación, Microsoft adaptou esta tecnoloxía ao PC, conservando boa parte da súa arquitectura.
O estudo dos executables indica que o código dos xogos da Xbox orixinal non se interpreta en tempo real nin se recompila mediante técnicas JIT. Pola contra, cada título inclúe unha biblioteca precompilada para procesadores x64 xerada previamente por Microsoft. O propio emulador comproba as versións destes compoñentes antes de cargalos, mentres que os módulos do sistema de Xbox 360 tamén se distribúen como bibliotecas precompiladas.
A análise tamén revela que o sistema gráfico reproduce o funcionamento da GPU Xenos da Xbox 360 sobre DirectX 12. Para iso incorpora shaders específicos que recrean características exclusivas do hardware orixinal, como a memoria eDRAM de 10 MB, os formatos de cor propios da consola ou o teselador mediante shaders modernos. Os shaders dos xogos tradúcense a DXIL en tempo de execución, o que explica a aparición da mensaxe «Compiling Shaders» durante a primeira execución.
O audio rediríxese desde as chamadas orixinais de XAudio cara a un backend moderno baseado en XAudio2, mentres que a entrada dos mandos pasa por GameInput para emular dispositivos XInput, incluídos os efectos de vibración. Os vídeos empregan Media Foundation e, polo momento, non existe soporte para teclado nin rato.
Cada xogo crea ademais un disco duro virtual completo na carpeta de datos do usuario, reproducindo a estrutura interna da Xbox orixinal, incluídas as particións de caché e directorios históricos como TDATA. As partidas sincronízanse mediante o sistema de gardado na nube de Xbox, xa operativo nesta primeira versión.
A interface está desenvolvida con .NET 8 e WinUI 3 e permite modificar parámetros como a resolución interna (ata catro veces a orixinal), sincronización vertical, filtrado anisotrópico, nivel de antialiasing, latencia de audio ou selección da GPU e do monitor. A análise confirma que estas opcións corresponden directamente aos parámetros internos do emulador.
Entre as curiosidades atopadas figura a presenza de imaxes de disco sen cifrar, o que permitiu extraer directamente os executables XBE dos xogos. Tamén apareceron demos ocultas e aplicacións antigas que permanecían intactas desde principios dos anos 2000, como unha demostración de Voodoo Vince dentro de Crimson Skies ou unha de RalliSport Challenge incluída en BLiNX.
A investigación descubriu ademais referencias internas a Xbox One e Xbox Series, o que reforza a idea de que Microsoft reutilizou a infraestrutura de compatibilidade retro xa existente nas súas consolas para levala a Windows.
Esta base técnica é precisamente a que leva a concluír que a compatibilidade con xogos de Xbox 360 para PC podería estar moito máis próxima do que parecía. Se o emulador xa é capaz de executar código da Xbox 360, o salto desde estes catro títulos da Xbox orixinal ata unha biblioteca moito máis ampla de xogos desa xeración sería, polo menos desde un punto de vista técnico, considerablemente máis curto.
Microsoft non confirmou oficialmente que vaia incorporar xogos de Xbox 360 ao programa de compatibilidade retro en Windows, nin publicou unha folla de ruta, pero parece bastante probable que, tras unha fase de incorporación de xogos da Xbox orixinal, dean o salto a Xbox 360, o que sería unha magnífica nova de cara ao goce das coleccións de xogos de xeracións anteriores de consola.