Hi Coruña retoma a súa actividade tras o verán cunha nova edición dos seus encontros tecnolóxicos, que a partir de setembro pasan a denominarse Tech by Hi (retomando o formato das Jueves Tech, pero cun cambio de marca). A primeira sesión desta nova etapa celebrarase o 17 de setembro, de 18:00 a 19:00 horas, e contará coa participación de Coinscrap Finance.
A empresa galega de tecnoloxía financeira está especializada no desenvolvemento de solucións para bancos e aseguradoras capaces de transformar os datos das transaccións en experiencias personalizadas para os seus clientes. As súas ferramentas incorporan intelixencia artificial para facilitar funcións como o aforro intelixente, a análise dos gastos ou a xeración de recomendacións en tempo real a partir dos hábitos financeiros dos usuarios.
Coinscrap Finance traballa actualmente con entidades bancarias de España e Latinoamérica e centra a súa actividade no desenvolvemento de tecnoloxías destinadas a facilitar a xestión das finanzas persoais e mellorar a relación entre as entidades financeiras e os seus clientes.
A sesión estará protagonizada por David Conde, CEO e cofundador de Coinscrap Finance. Conde conta con máis de sete anos de experiencia no sector fintech e está especializado en innovación e transformación dixital no ámbito financeiro, con especial atención ao uso de tecnoloxías avanzadas e análise de datos para mellorar a eficiencia operativa e a toma de decisións.
O executivo é tamén asesor e planificador financeiro europeo certificado por EFPA España e membro da Asociación Española de Fintech e Insurtech. Antes de fundar Coinscrap Finance participou na creación de Senseivision, empresa dedicada ao desenvolvemento de axentes de intelixencia artificial para entidades bancarias que posteriormente foi adquirida maioritariamente por unha entidade financeira.
