Startup Galicia celebrará o venres 18 de setembro en Santiago de Compostela unha eSmorGa previa ao nosday 2026, unha xuntanza informal destinada a reunir a comunidade galega vinculada ao emprendemento, a innovación e o investimento.
O encontro terá lugar a partir das 20.00 horas no Fogar do Santiso, na rúa do Franco, e está concibido como un afterwork para reencontrarse con membros da comunidade, coñecer novos proxectos e establecer contactos antes da celebración do nosday.
A entrada inclúe dúas consumicións e petiscos. A organización presenta a cita como unha oportunidade para comezar a actividade arredor do nosday nun ambiente distendido, con conversa e networking.
Nosday 2026
O nosday 2026 preséntase como o evento máis riquiño, unha cita que reúne a comunidade galega de emprendemento e tecnoloxía nun ambiente próximo, acolledor e honesto. A organización destaca que o programa se constrúe arredor de charlas directas e sen artificios, pensadas para poñer en valor historias reais de profesionais e fundadores que están a impulsar proxectos no país.
O evento reivindica que en Galicia están a suceder iniciativas realmente incríbles e que o ecosistema emprendedor vive un momento de crecemento sostido. Por iso, o nosday funciona como escaparate e punto de encontro para quen queira coñecer de preto esta realidade.
A edición deste ano recupera o espírito das orixes ao volver ao Auditorio ABANCA, despois de dous anos no Hotel Monumento, reforzando así a identidade comunitaria que caracteriza o encontro.
O programa combina charlas, networking e a presentación de proxectos, con participación de perfís destacados do ecosistema galego e internacional. O evento conta tamén co apoio de colaboradores e patrocinadores vinculados á innovación, que contribúen a consolidar o nosday como unha das citas de referencia para o emprendemento en Galicia.
