A XI edición do programa Scratch Day comezará este venres, 11 de setembro, na aula CeMIT de Guitiriz, cunha programación dirixida a rapaces de entre 7 e 15 anos que se desenvolverá ata o 10 de outubro en catro concellos galegos. A iniciativa, organizada polo Colexio Profesional de Enxeñaría Técnica en Informática de Galicia (CPETIG) e a Axencia para a Modernización Tecnolóxica de Galicia (AMTEGA), busca achegar a programación informática á infancia e fomentar vocacións no ámbito STEAM.
As actividades desenvolveranse nas aulas CeMIT de Guitiriz, Tui, Fisterra e Celanova ao longo de setembro e outubro. O programa pretende contribuír a derrubar os estereotipos arredor da programación e amosar que a creación de software pode ser unha actividade accesible para a rapazada.
A primeira xornada terá lugar o 11 de setembro en Guitiriz, seguida da sesión de Tui o día 12. Fisterra acollerá unha nova actividade o 26 de setembro, mentres que a programación continuará en Celanova durante outubro.
O programa pecharase o 10 de outubro cunha xornada no Salón de Convencións do edificio CINC da Cidade da Cultura, en Santiago de Compostela.
As actividades do Scratch Day forman parte do convenio de colaboración entre o CPETIG e AMTEGA para promover a formación e o desenvolvemento de competencias dixitais en Galicia.
